Прейдз на змист

Комин

Материял зоз Википедиї
Випатрунок комина сконца 19. и у 20. вику. Зоз „шапку” на верху и обложеним з плехом при дну, коло крова же би ше нє злївала атмосферска вода коло комина до пойда.

Комин (серб. димњак и оџак; слц., чес. кomín; поль. komin; нєм. Kamin, а тото од лат. cami:nus = огнїско) - отвор за одвод диму зоз пеца:

Комин ше на широко почал муровац. Вон ґарадичи мал, з цеглами ше заверало комин. А дзири були на бокох. Комин мал осем дзири около, знаш, два на єдним, два на другим, два на трецим, два на штвартим – осем дзири.

Комин часц хижи, будинку або индустрийного обєкту хтори наменєни за одводзенє диму односно ґазох хтори настали зоз згорйованьом. Комин може буц з цеглох (муровани) або з бетонских цивох, або з цивох з даякого иншакого материялу, напр. прохрому.

На найстарших хижох дим з огнїска ше одводзело прейґ пойда, а у 15. вику ше зявюю комини хтори иду понад закрица и одводза дим з хижох. Перши комини були древени, односно з древа и иловачи, алє познєйше ше, углавним пре процивогньово условия, мурує комини з цеглох.

Функциї комина

[ушориц | ушор жридло]

Комин насампредз одредзени за одводзенє спальовинох односно диму з обєктох. Комин ше кладзе на пеци, камини и други зогриваци обєкти и функционує як єдноставна воздушна пумпа. Горуци спальовини маю нїзшу густосц воздуху и комин на їх место уцицує швижи воздух. Прицисок хтори женє воздух през комин вола ше „цаганє комина“ хторе завиши од його висини и димензийох. Прето у индустриї комини велького капацитету на погонох високи. Висина коминовей глави (часц комина над закрицом) дефинована з предписанями и одредзує ше ю так же шапка комина муши буц на висини од 0,5 метери над верхом закрица або на оддалєносци 1,5 метери од зукоснїни закрица.[1]

Фабрични комин то будовательни обєкт хтори служи за одводзенє диму и других чкодлївих ґазовитих субстанцох з места дзе наставяю до атмосфери. На векшей висини дзе ше комин закончує вше єст моцнєйши витор хтори дим з челїчарньох, рафинерийох, розпущовальнох, циментарньох итд. розноши на рижни боки.

Фразеолоґия

[ушориц | ушор жридло]

♦ Вироснул як за комином = Кед дахто длуго, од єшенї до яри, нє видзел дзецко, а воно досц виросло, пове: вироснул як за комином;

♦ И за комином би вирос = гвари ше о дачим цо барз лєгко рошнє: Ґордонь би и за комином вирос (= вшадзи добре рошнє);

♦ Тот би и за комином вирос = гвари ше напр. за хлапца кед нє ма условия, а барз рошнє.

Литература

[ушориц | ушор жридло]
  • Словнїк руского народного язика I, А-Н Нови Сад 2017, б. 616.
  • Техничар 4, Грађевинска књига-Грејање и проветравање, Предраг Зрнић Београд 1989.
  • Priručni slovnik naučni ČS Akademia vied, Praha 1966.

Вонкашнї вязи

[ушориц | ушор жридло]

Референци

[ушориц | ушор жридло]
  1. ↑ „Карактеристике инсталације димњака”.