Кляґ

Кляґ (серб. сириште, карп.укр. кляґ, чес. kľag (прен. – нєсмачна мачанка або юшка; слаби чловек), поль. klag; карпатске пастирске слово, од рум. shiag, тото од старших словох clagum, quaglum, а тоти од лат. soagulum) – часц целячого жалудка як средство за правенє сира. Нєшка кляґ мож купиц у предавальнї, а скорей ґаздинї сами мушели правиц кляґ. Як кляґ ше хасновало фалаток целячого жалудка лєбо черева, хтори ше умило и мочело у води.

Сир направени з кляґом ше вола кляґани сир, а за поступок правеня такого сира ше гвари кляґац: цепле млєко ше дакус посолї и улєє до ньго кляґу. Млєко закляґане теди кед ше згрудкави, позбива. Потим ше го усипе до груднїци и обеши на палїчку же би ше одцекало. Скорей ґаздинї кладли закляґани сир до древеней ванїчки (шафлїка) и добре го прицисли зоз денком (древена округла дещичка велькосци ванїчки). На ванїчки єст уха до хторих ше кладзе дещичку, а вона ма у штредку шруб. На сир ше положи денко и як ше закруца шруб, так денко прициска сир. У ванїчки сир стал даскельо днї, тельо кельо ше сцело же би бул стари.

Литература

Словнїк руского народного язика I, А – Н, Нови Сад 2017, б. 605

Вонкашнї вязи

Šta je sirište. vebsajt slatina.rs

Sirište. Vikipedija na bosanskom jeziku, 4. august, 2006.