Клавикорд

Moй клавикорд. Инструмент Пола Мауриция, 2001, намальовани по Йоганови Албрехта Гаси

Карл Ф. Е. Бах, Шлєбодна фантазия у Фис дуру.

Клавикорд (инструмент достал назву зоз латинского слова клавис або клавус (clavis-clavus, ключ-гвозд) и греческого слова hord, a значи струна, (франц. clavicorde,). То струнови музички инструмент зоз клавиятуру.Звук ше достава на клавикорду зоз вдереньом малого металного „млаточка” (танґента) по месинґовей або челїчней струни.

Историят

Настал у Европи и єден є з предходнїкох клавира попри монохорда, клавсена, як цо бул и чембало, алє ше клавикорд розликує по иницированю/доставаню звука. Бул заступени и хасновало ше го ше под час епохи Ренесанси, прейґ Барока, по Класицизем. У прешлосци ше го найбаржей хасновало як инструмент за вежбанє, соло музикованє и як помоц за компонованє.

Схема и часци клавикорда:

Клавикорд конструовани у вчасним 14. вику. Бул барз популарни од 16. до 18. вику, углавним у нємецких жемох, Скандинавиї и Иберийским полуострове. Вельки прихильнїк того инструменту бул Карл Филип Емануел Бах. По 1850. рок, музичаре престали хасновац клавикорд.

Схема клавикорда:

(A/B) типки; (1A/1B) танґенти (млаточки); (2A/2B) полуги типкох; (3) струни; (4) резонантне дно; (5) мост; (6) заглушовач

Клавикорди хасновани насампредз за домашнє музикованє, алє исновали и вариянти зоз вецей клавиятурами (мануали) и зоз педалу, та их орґуляше хасновали за вежбанє.Велькосц клавикорда завишела од типа и тонского обсягу, так же були мали инструменти у форми кнїжки по релативно вельки зоз целом резонанци длужини до 1,5 метери.

Гасов клавикорд зоз 1763 року.

Клавикордска музика досцигла вершину у 17. и 18. вику, а по початок 19. вику у Заходней Европи заменєл го клавир (такв. хамерклавир). У велїх державох - царствох (Ческа, Словацка и Мадярска) музичаре-аматере предлужели грац на клавикорду.

Познати композиторе як цо були: Й. С. Бах, його синове Кристиян. Фридрих Емануел Бах, В. А. Моцарт, тиж и Лудвиґ ван Бетовен, писали дїла за клавикорд.

Файти клавикорда

Исновали два файти клавикордох:

• Шлєбодни клавикорд, зоз подполним комплетом струнох, на хторим кажда типка одвитує окремней струни.

• Повязани клавикорд з прагами, зоз меншим комплетом струнох, до хторих танґенти звичайно два або три, прейґ типки вдеря до истей струни на розличних местох.

Клавикорди рижних файтох и дизайнох.

Дизайн повязаного клавикорда значно оможлївює менше число струнох, алє онєможлївює источасне гранє одвитуюцих нотох.

Способ доставаня звука

Понеже клавикорд продукує цихи, слабши звук, цо нєдостаток того инструмента, та прето нє може участвовац у камерних ансамблох. Кед ше прицишнє типка, вона зоз вдереньом иницирує и виволує вибрацию струни, алє источашнє остава у контакту зоз типку и огранїчує єй рухомосц. Зоз вибрированьом ше достава тремоло ефект (Bebung). Зоз тоту характеристику клавикорд оможлївює музичарови блїзши контакт зоз жридлом звука и дава простор за финеси и окремни музични вираз у граню. Дакеди клавикорд конструовани так же вецей млаточки можу вдериц по истей струни и зоз тим ше поєдноставює инструмент, а окреме олєгчує його штимованє. Нєшка на клавикорду граю музичаре хтори заинтересовани за вчасну, такв. стару музику, поготов музику Барока. Клавикорд ше з часу на час зявює як инструмент у сучасней рок музики.

Галерия

• 
  Клавикорд повязани з прагами у Намиру, Белгия.
• 
  Лепант клавикорд, Музей музики, Париз.
• 
  Клавикорд зоз 1977. року, аутор Кит Хил.
• 
  Танґенти-млаточки хтори дорушую струни и иницирую клавикордов звук.
• 
  Нукашнї деталї резонанци клавикорда, Музей у Барселони.
• 
  Ґравирани клавикорд з педалами зоз 18. вику.
• 
  Клавикорд зоз педалами
• 
  Клавикорд з педалами (18. вик).

Литература

• Зимин П. Н. История фортепиано и его предшественников. (язик: русийский)

Вонкашнї вязи

• Историја клавикорда