Кетишка

Кетишка (серб. апцес; од мадь. kötés = вишиванє, вишивка; штриканє) - широка вишивана або ткана, звичайно червена пантлїка ушита по длужини поштред партка. Кетишку ше нє ткало дома, алє куповало у дутяну (платняри) або од тарґовцох хтори ходзели по обисцох и приношели робу з иножемства. Кетишку ше укладало медзи два поли партка. З ню ше злучовало тоти два виткани поли, понеже нє було таки широки кросна яка ширина була потребна за парток. Кетишка була єдней файти украс на шветочним партку.

Поли партку хтори ше хасновало на кажди дзень нє злучовало ше з кетишку, алє з вулом истей фарби як и цифри на партку, и то зоз геклїчку або з иглу.

Дзепоєдни ґаздинї тримаю же тото слово з мадярского язика, алє же значи скапчованє двох и двох фалатох платна (одприлики: два и два - кет иш кет).

Ґалерия

Кетишка ручно пришита на партку.
Ткани парток зоз ручно пришиту кетишку (прикладнїк зоз Р. Керестур)
Кетишка, пантлїка хтора ше пришива по штредку же би злучела два поли партка.
Кетишка, пантлїка ручно робена
Кетишка червеней фарби, ушита поштред партка злучує два поли тканого партка.
Руски парток, ручно ткани на кроснох, поштред партка кетишка (Руска одлога у Дюрдьове)

Литература

Словнїк руского народного язика I, А – Н, Нови Сад 2017, б. 593.