Кармик

Кармик (од слова кармиц) то оградзени простор за карменє швинї. Кармики на дилїни (вола ше их ище и з „дилїнами”) були направени з дескох, закрити з билим черепом. На сподку були дески, хтори стали на цеглох або на древе. Кармики нє мали обори. Кармики на дилїни, односно, кармики зоз патосом зоз дескох ше у нєшкайшим чаше нє прави.

Покарма ше швиньом сипе з вонка до валовкох. Валовок бул кущичко випущени же би ше до ньго покарма лєгчейше сипала, прикрити є з деску, хтора була приправена за дески кармика. Кед ше сипе поживу подзвигнє ше деску, а кед ше усипало, деску ше враци на место, так же вона налєгує на валовок. Кед ше карми швинї, нє муши ше уходзиц нука до кармика.

Кармики можу буц и под чардаком. Долня часц чардака ше мурує з цеглох, та ту були кармики, а горня часц ше прави з латкох и ту ше сипе кукурицу у чуткох. Таки чардаки можу оддзельовац преднї двор од заднього, та так кармики патра до гумна. Таки кармики ше прави на штред двора попрейга. Познєйше ше почало правиц и кармики з оборами. Обори були опрез кармика. Нє були закрити, лєм оградзени з десками.

Сучасни кармики

Сучасни кармики ше находза у заднєй часци другого двора и звичайно ше у нїх карми, окрем швиньох, и заяци, кури, препилки, кози и друга живина и дробни статок. Збудовани су зоз твардого материялу, зоз цеглох, а над нїма збудовани чардак. Зоз таким способом будованя ше баржей вихасновює простор у дворе.

Литература

• Олена Папуґа, Руске обисце, 2012.рок, бок 46,47