Капут

Капут калсичного кроя

Капут (хл. род) - слово новшого походзеня мадяризем або сербизем. Од серб. капут „исте”, (мадяр. уяш ,,хлопски кратки капут.”) а то, прейґ турского kaput, од ит. cappa santa; (од того и серб. капа –шапка по руски).

Капуцик.демунитив од капут, одноши ше на дзецинске облєчиво.

Капут спада до файти облєчива, хтори припада жимским шматом. Ноши ше звичайно под час жимнєйшей часци рока, позно вєшенї и вжиме, пре защиту цела од нїзких температурох.

Историят

Историйно, предпоставя ше же на капути постоя зоз давних часох прето же ше и прачловек на даяки способ защицовал од жими. Вироятнє то були облєчива зоз шерсци подобни бундом зоз скори зоз рижних животиньох. Найстарши капути тоти хтори ношели блукаюци номади евроазийских степох. Предпоставя ше же капути и вельо старши, пренайдзени при таримских мумийох старих 4 тисячи роки и при мумийох Ециї старих пейц тисячи роки.

Походзенє капута заходного стила можу ше провадзиц през вельо епохи. Обачує ше же су рижнородно ушити; зоз рукавами (длугших и кратших), узки и широки и на предку закапчани. У цеку историї капути меняли свою форму спрам часу и модного стила. Концом 18. вика и спочатку 19. викака капут ношело племство и висши пасма дружтва, покля нє постал доступни шицким дружтвеним пасмом.

Основни опис капутох

Ширши капут за шедланє коньох.

Капути можу буц рижнородно кроєни и ушити, можу буц рижних длужинох и ширинох, тиж зоз рижних материялох. Дараз капути були зоднука поставени зоз додатним цеплим материялом (вателин) та були и чежши. Нєшка капути вельо лєгчейши, алє су ушити зоз квалитетнєйших цеплєйших (часто синтетичних або комбинациї зоз природнима материялами) и нєт потреби за додатнима поставами, окрем тей естетскей сатенскей постави хтора пришита знука, же би скрила нукашнї шити рубци и пришити кишенки. Длужина капутох варирує, звичайно су по колєна, або ище дакус нїжей лєбо кратки капути (як якни) дакус висше над колєнами. Капчаю ше напредку з ґомбичками або зоз даякима капчами (ридко зоз цибзаром), даєдни капути маю и ремень хтори ше вяже лєбо ше го капча.

Капут ше облєка  по верх других облєчених шматох хтори ценши. Ноша их хлопи и жени шицких возростох, старши особи, младши, а тиж и дзеци. Капут вше ма ґалєр хтори приблїжно истей форми на шицких капутох, а часто є напретку отворенши такв. ,,вируцени'' (як и шал-ґалєр) и звичайно ше теди коло шиї ноши шал и пре цеплоту, а и пре елеґанцию кед ше добре склада (напр. зоз фарбу капута, обую, ташну и под.). Розкошнєйшим елеґантним женским капутом часто додати и пришити за ґалєр, а и на рукавох, даяки бундички (зоз природней шерсци, лєбо синтетичней). Женски капути найчастейше узши як хлопски. Капут ма длугоки рукави, обовязно є зоднука поставени зоз ценшим платном, найчастейше синтетичним гадвабом, звичайно ма кишенки, а дзекеди и капулячу.

Новши часи допринєсли же би ше шило и ношело рижнофарбово капути, окреме женски. За хлопох ше ище вше шиє капути цмейших фарбох, та окрем чарней доминує цма белава, ниянси шивей фарби або кафова.

Материяли за капути

Платна за капути грубши, ткани зоз рижнима типами тканя (напр. твид, до клаша, такв.букле, просте тканє итд.). Материяли зоз хторих ше шиє капути углавним грубши; можу буц зоз памуку, волни (мохер, шетлнад), штофу, скори и под., а нєшка зоз синтетичних материялох хтори ше лєгко отримує, аж мож капут и райбац, цо донєдавна нє було можлїве.У таких случайох капути ше ношело на такв. хемийне чисценє до специялизованих роботньох за таки наменки.

Галерия

• 
  Чловек у капуту
• 
  Капут
• 
  Хлопски капути дакеди
• 
  Женски капут - униформа
• 
  Святочни капут дакеди

Литература

• Antongiavanni, Nicholas (2006). The Suit. New York: HarperCollins Publishers. ISBN 978-0-06-089186-2.
• Byrd, Penelope (1979). Male Image: men's fashion in England 1300-1970. London: B. T. Batsford Ltd. ISBN 978-0-7134-0860-7.
• Doyle, Robert (2005). The Art of the Tailor. Sartorial Press. ISBN 978-0-9683039-2-4. Publications, Stratford, Ontario.
• Croonborg, Frederick: The Blue Book of Men's Tailoring. Croonborg Sartorial Co., New York and Chicago, 1907

Вонкашнї вязи

Potražite natuknicu kaput u Wikirječniku, slobodnom rječniku.