Йоган Ґутенберґ
| Йоган Ґутенберґ | |
|---|---|
Йоган Ґутенберґ | |
| Цале мено | Йоханес Ґенсфлайш
цур Ладен зум Ґутенберґ |
| Датум народзеня | 1400 |
| Мєсто народзеня | Маинц,
Святе римске царство |
| Датум шмерци | 3. фебруар 1468. (67/68 рок.) |
| Место шмерци | Маинц, Святе римске царство |
| Родичи | Friele Gensfleisch
zur Laden Else Wirich |
Йоган Ґутенберґ (Йоганес Ґенсфлайш цур Ладен зум Ґутенберґ, праве презвиско: Ґенсфлайш; нєм. Johannes Gensfleisch zur Laden zum Gutenberg,[1] коло 1400, Маинц —3. фебруар 1468), бул нємецки металски роботнїк и пренаходзач[2] хтори познати по своїм доприношеню технолоґиї друкованя.
О його живоце и роботи постоя лєм фраґменти и з часци нєсиґурни податки. Коло 1430. одходзи з Маинцу до Стразбурґу, дзе остава, випатра, аж по 1448. Занїмаюци ше зоз брушеньом драгоциного каменю и продукцию жвераткох. Уж 1436. ма якешик друкарске пошоренє и з нїм окончує експерименти. Од 1448. знова є у Маинцу, дзе снує друкарску роботню. Року 1455. докончує свою першу типоґрафску роботу. Латинску Библию[3] на 1282 фолио бокох у двох слупчкох по 42 шорики[4] друкує у 100-200 прикладнїкох, з часци на перґаменту, з часци на паперу („Библия зоз 42 шорикох”). Имитируюци у лятих буквох тедишнї ґотични рукопис з його лиґатурами, похасновал за свойо виданє 290 розлични знаки.
О його дальшей друкарскей роботи нє зна ше нїч зоз сиґурносцу, алє ше му приписує друкованє виданя „Missale special”,„Mainzer Catholicon” и „Библиї зоз 36 шорикох” виданей у Бамберґу. Остатнї три роки живота препровадзел на двору княза виберача, надбискупа Адолфа Насауского у Маинцу.
Ґутенберґ заслужни за пренаходок европского друкарства з рухомима буквами, хаснованє ручней направи за вилїванє буквох и умножованє нєогранїченого числа прикладнїкох. Вон вихасновал виляти букви, алє ище важнєйше тото же конструовал друкарску пресу з хтору ше могло друковац виєдначено и з обидвох бокох табаку паперу лєбо перґаменту. Тиж перши применєл и друкарске преламованє. Його уводзенє механїчного рухомого типу друкованя до Европи започало револуцию друкарства и трима ше го за преобраценє другого милениюма, зоз чим започал модерни период людскей историї. То одбавело ключну улогу у розвою ренесанси, реформациї, просвитительства и науковей револуциї и положело материялну основу за модерну економию базовану на знаню и ширенє ученосци до масох.
Литература
[ушориц | ушор жридло]- Cormack, Lesley B.; Ede, Andrew (2004). </ A History of Science in Society: From Philosophy to Utility Broadview Press. ISBN 978-1-55111-332-6
- Kapr, Albert (1996). Johannes Gutenberg: the Man and His Invention Scolar Press. бok 322. ISBN 978-1-85928-114-7
- Klooster, John W. (2009). Icons of invention: the makers of the modern world from Gutenberg to Gates. Santa Barbara, CA: ABC-CLIO. б. 8. ISBN 978-0-313-34745-0
- Man, John (2002). Gutenberg: How One Man Remade the World with Words New York: John Wiley and Sons, Inc. ISBN 978-0-471-21823-4.
Вонкашнї вязи
[ушориц | ушор жридло]- Јоган Ґутенберґ: Творитель друкарскей преси – Як друкарска преса пременєла швет? (Перспектива - Урядови ютюб канал)
Референци
[ушориц | ушор жридло]- ↑ "Johann(es) Gutenberg" in the American Heritage Dictionary.
- ↑ "Johannes Gutenberg | Printing Press, Inventions, Facts, Accomplishments, & Biography | Britannica" www.britannica.com (язик: анґлийски).
- ↑ "Gutenberg Bible | Description, History, & Facts | Britannica" www.britannica.com (язик: анґлийски).
- ↑ "Gutenberg Prints the 42-Line Bible : History of Information" www.historyofinformation.com