Йоган Себастиян Бах

Йоган Себастиян Бах
Йоган Себастиян Бах (арт портрет Елиясa Ґотлоб Хаусман 1748)
Особни податки
Датум народзеня	21. марец 1685. Айзенах
Датум упокоєня	28. юлий 1750. (65), Лайпциґ
Державлянство	Нємецке
Епоха твореня	Барок
Композиторово дїла
Период твореня	1700—1750
Жанри	Вокални и инструемнтални жанри Духовна музика, полифони композициї, клавирски дїла, кантати, прелудиюми, фуґи.
Найпознатши дїла	Ґолдберґ варияциї, Добре темперовани клавир, Токата и фуґа у де-молу, Крачунски ораториюм, Брандербуршски концерти, Музича жертва, Уметносц фуґи, Ария на ґе-струни.
Бахов потпис

Йоган Себастиян Бах (нєм. Johann Sebastian Bach); Айзенах, 21. марец 1685. року – Лайпциґ, 28. юлий 1750. року – єден зоз найвизначнєйших нємецких композиторох, орґуляш и чембалист зоз епохи барока. Припознати як єден зоз найзначнєйших композиторох и слуп универзалней музичней култури. Його дїла замерковани пре интелектуалну глїбину, технїчне совершенство и уметнїцку естетику – красоту. Єден з перших значнєйших композиторох клавирских дїлох.

Фамелия и Бахов живот

Походзи зоз музичней фамелиї. Бул наймладши зоз осмерих дзецох Йогана Амброзиуса Баха, городского музичара. Члени його блїзшей фаемлиї були церковни орґуляше и композиторе. Прето Бах мал можлївосци вчас ше упознац зоз компонованьом и граньом на вецей инструментох. Й. С. Бах остал вчас без родичох, уж у 9-им року, и бул примушени жиц зоз своїм старшим братом, тиж церковним орґуляшом. Здобул високе образованє у обласци филозофиї и теолоґиї. 1700. року достал стипендию за школованє у школи св. Михаела, дзе пришол до контакту зоз озбильнєйшу музичну културу. После законченого школованя, 1703. року, постал виолиниста и дзияк у церкви св. Томи у Лайпциґу.Ту прежил найдлугшу часц живота нєдостаточно порозумени и нє барз почитовани. Грал на орґульох, чембалу, виоли да ґамба (барокна виола) и виолини (гушлї). Здобул славу, окрем як винїмкови инструменталиста тиж и як винїмкови импровизатор у тедишнєй барокней епохи.

Й. С. Бах ше двараз женєл и з тих двох малженствох мал двацецеро дзеци. Велї з нїх постали тиж значни музичаре. Без огляду же мал вельо дзеци, жадал же би му дзеци були музично образовани и поготов же би знали грац на клавиру – од тих лєгких композицийох за початнїкох, по тоти барз чежки, за концертне виводзенє. Дзепоєдни з його синох зазначели успихи, а їх музични дїла ше виводзи и нєшка на концертох: Вилгелм Фридман Бах (1710—84), Карл Филип Емануел Бах (1714—88), Йоган Кристоф Фридрих Бах (1732—95), Йоган Кристиян Бах (1735—82).

Попри синох, визначни школяре Йогана Себастияна Баха були: Йоган Лудвиґ Кребс и Йоган Филип Кирнберґер.

Бахов опус

Опус Й. С. Баха мож подзелїц на три стилски периоди.

Перши период: Ученє и усовершованє (1700 – 1713. рок) Концентрує ше на орґулї и клавир и на компонованє церковних кантатох. Приклад му була нємецка инструментална и вокална музика барока.

Период майсторства: (1713 – 1739.) Зєдинює характеристики италиянскей музики барока (ясносц-пречисценосц мелодиї, ритмична динамика) и нємецки стил (розсудзованє, комплексна нукашня структура), зоз чим створени ориґинални стил хтори применєл и хасновал у шицких значних музичних формох свойого часу (окрем опери).

Остатнї период: (1739 – 1750) то период абсолутного совершенства. Пошвецує ше инструемнталней музики, власни полифони стил му постава ище баржей контрапунктични, а сучасносц вплївує на його творчосц.

Й. С. Бах - орґуляш

Й. С. Бах док жил бул познатши як орґуляш. Орґулї то инструмент зоз типками (клавишами) и металнима цивами през хтори преходзи и трепеци воздух хтори продукує звук - тони. То найвекши и найзложенши инструмент хтори ма 2-7 клавиятури за руки и єдну калвиятуру за ноги (такв. педали) и вельо ґомбички-реґистри за реґулованє звука.

Бахов професионални циль першенствено бул же би постал винїмкови орґуляш часу у хторим жил. Музика за инструменти зоз клавиятуру вше мала централне место у його опусу. Жадал и намагал ше же би тоти инструменти добили значносц векши од улоги континуа у оркестру так же у своїх числених концертох за чембало, на хторим вироятнє сам грал, уношел солистични часци. Друга характеристика Баховей музики то уношенє виртуозних пасажох до виолинскей и орґульскей мелодиї. На майсторски способ комбиновал вокалну и инструменталну музику.

Бахово музични форми (жанри).

У винїмковим плодним и креативним периодзе написал пейц рочни циклуси кантатох за свойо перши шейсц роки пребуваня у Лайпциґу (два циклуси затрацени). Векшина з тих дїлох засновани на библийних стихох хтори ше внєдзелю  читали у лутеранских церквох. Хасновал як инспирацию и популарни  (духовни мелодиї) гимни (Wachet auf! Ruft uns die Stimme, Nun komm, der Heiden Heiland). За свойого живота Й. С. Бах викомпоновал коло 300 кантати хтори ше и нєшка виводза.

Кантата и позната його писня ,,Ох, як любим'' то часц векшей композициї з назву ,,Кантата о валалу.'' То длугша композиция за шпиванє зоз инструменталним провадзеньом, состої ше зоз вецей писньох хтори тематски повязани. Назву достала зоз италиянского слова ,,кантаре'', а значи шпивац. Єдно зоз познатших дїлох було и вола ше бадинери. Слово о фрацузким танцу, хтори бул популарни у Баховим чаше.

Бадинери состойна часц композициї хтора ше наволує свита. То дїло за окестер, хторе ше состої зоз вецей барокних танцох. Инструмент хтори ше видвоює найчастейше флаута - дуйни древени инструмент. Пред конєц живота постал цемни. Почесне мено му було Майстор над майстрами. Бах у своїх композицийох и зоз полифоним стилом и комплеметарним ритмом по нєшкайши час нєпревозидзени.

Музику под час барока ше нотацийно записовало так же композитор назначел лєм основну конструкцию дїла, а задаток интерпретатора бул же би розвил музични косцанїк и инспиративно ше надовязал зоз своїма музичнима схопносцами и додал мелизми - нотни прикраски и на тот способ импровизовал.

Як педаґоґ, творел зборнїки дїлох хтори виглєдую уметнїцки и технїцки можлївосци инструментох и музичних жанрох. Найпознатши приклад таких дїлох то познати два кнїжки (прикладнїки ) Добре темперовани клавир, у хторим ше находза прелудиюми и фуґи, розробени и похасновани розлични технїки компонованя у каждим дурским и молским тоналитету. То Анґлийски и Французки свити и партити зоз кетенского периода. Систематично хаснує рижнородну метрику, тиж и тоналитети з повисшовачками и знїжовачками. Експерименти зоз интервалами можу ше чуц у Ґолдберг варияцийох. У дїлу Уметносц фуґи представени зборнїки можлївосцох технїки компонованя фуґи.

После Баха – открице о 100 роки

После Баховей шмерци, швет подполно забул на ньго. Односно по 19. вик, а теди ше на музичней сцени зявел нємецки композитор Феликс Менделсон (1809-1847). Менделсон случайно єдного дня, кед ше врацал дому, зашол до месарнї купиц месо. Месар замотал месо до виписаного нотного паперу. Менделсона дома зацикавело цо то написане на тим паперу и розмотал месо, вжал папер и шеднул за клавир. Док грал попробовал препознац дїло хторе грає, алє му ше то нє удавало. Збуньовал го ище баржей факт же ше робело о квалитетней и барз добрей композициї и нє могол себе вериц же тото дїло нїґда нє чул.

После рижних нєуспишних способох дознац чийо то дїло до хторого було закруцене месо, врацел ше до истей месарнї и питал ше месарови одкаль му папери до хторих замотує месо. Месаров одвит бул же кед купел тоту хижу, на пойдзе нашол вельо нотни папери и, же би ушпоровал, паковал месо до тих паперох. Менделсон виражел жаданє опатриц кельо на пойдзе ище остало таки папери и кед видзел вельку громаду нотного паперу замодлєл месара най му преда папери, на цо месар зразу пристал.

Менделсонови требало три роки же би ушорел шицки композициї. Даєдним композицийом хибели часци, даєдним були помишани боки, а мал бриґи дознац хто автор тих нєвироятних дїлох, прето же у 19. вику нїхто нє чул за Йогана Себастияна Баха. Так же, после трох рокох кед тоту обсяжну роботу закончел, Менделсон вибрал даскельо композициї хтори по його думаню були найлєпши и пририхтал концерт зоз Баховима композициями. Феликс Менделсон Бартолди ознова 1829. организовал виводзенє Баховей Пасиї по Матею. Менделсон и Брамс пред тим виводзели Бахов клавирски репертоар и на тот способ популаризовали значного композитораи музичара. Теди ше Бах ознова ,,народзел'' и врацел до музики, до музичного швета и ту остал по нєшка. Нєт виводзача хтори нє ма на своїм виводзацким репертоаре даєдну Бахову композицию.

Року 1850. основане ,,Бахово здруженє'' (Bach-Gesellschaft) зоз мисию позберац и обявиц Бахово дїла. Концом 19. и у 20. вику його музика постала нєзаобиходна часц програмох шицких музичних школох, тиж и музичних академийох и конзерваториюмох.

Особни прикмети

Бах щиро и зоз праведносцу уважовал своїх сучашнїкох. Нє удало ше му нїґда стретнуц зоз композитором Ф. Гендлом кед Гендл нащивйовал Нємецку, и пре тото себе нє пребачел и бановал до конца живота. Бах бул скромни, педантни, побожни и велькодушни чловек хтори ше крашнє одношел ґу своїм школяром. Форкел, Бахов биоґраф, гварел же його душевносц и уметнїцка слава вплївовали на тото же його обисце ридко кеди було без госцох. (17) З другого боку, знал буц ,,нагли'' и гнїваци, окреме ґу нє добрим ґаздом и слабим – подлим музичаром. У своїм 20 року у єдней звади вицагнул и упар меч на колеґу, алє их други музичаре роздвоєли.

Бах нє нїч нє робел на популаризациї своїх кантатох и пасийох, и нє його заслуга же тоти дїла сцигли по нас и же су нєшка познати. Сам Бах нє бул свидоми велькосци и значносци своїх дїлох, анї того же постанє симбол музики своєй епохи. Кед  компоновал, Бах нє роздумовал о тим чи хор годзен, чи є у можлївосци одшпивац його дїла, анї чи го будзе паства розумиц. Його дїло глїбоко релиґийне  — творел на славу Бога. Часто прикрашовал свойо композициї зоз смислом  „Лєм Господу слава“ (Soli Deo Gloria) або „Исусе, помогнї“ (Jesu Juva).

Йоган Себастиян Бах бул побожни вирнїк, а то значело по лутеранскей традициї же мал особне одношенє зоз Богом. Тото допринєсло же векшу часц його репертоара пошвецел духовней музики, першенствено лутеранскей хорскей гимни. Теолоґийни характеристики - ,,одгуки” видлїви у його дїлох; партита Sei Gegrüsset составена зоз теми и 11 варияцийох, хтори мож подзелїц на два часци (у єдним по шейсц), а то одвитує лутеранскей казанї (проповиду) заснованей на повторйованю, а може ше толковац и як симбол Христа.

Остатнї слова хтори Бах вигварел пред свою шмерц, були: ... Чи останє дацо после мнє? Думал же твори лєм ,,просекову музику'' и нє бул свидоми яке музичне благо охабя за собу.

Остатнї период Баховей музики означени зоз обявйованьом Вежби за клавир ч. 3 (Clavier-Übung III) 1739, и тирва по його шмерц 1750, у чаше кед компоновал Уметносц фуґи. У тим дїлу свойого опуса Бах ше пошвецел инструменталней музики, власни стил му постава ище баржей контрапунктски, зоз комплементарим ритмом а обачую ше видлїви знаки тенденциї сучаного/модерного часу.

Бахово naйпознатши дїла

♦ Баховo доприношенє теориї музики :

• Фуґи и канони (Уметносц фуґи)

• Дурски и молски тоналитет (Добре темперовани клавир)

• Розвой гармониї (Хроматска фантазия и фуґа)

• Полифония (соло дїла за флауту, сонати и партити за соло виолину, свити за виолончело)

• Инструментация (Брандербуржски концерти)

• Творел и мали форми (Зборнїк дїлох за орґулї) и колосални композициї (Пасия по Матею)

♦ Вокални дїла:

Й.С.Бах у младосци (1715.)

* 224 кантати

• 10 миси

• 7 мотети

• 2 закончени пасиї

• 3 ораториюми

• 188 корали

• 4 писнї (lieder - соло писнї)

• 1 кводлибет

• 58 духовн розшпиви

♦ Даєдни инструментални дїла:

• 9 трио сонати за орґулї

• 28 прелиди и токати за орґулї

• 10 фуґи и фантазиї за орґулї,

• Симфония у ЕФ –дуру

• 5 орекстрово свити (увертити)

• 6 Брандербуржски концерти

• 30 инвенциї и симфониї за чембало

• 6 анґлийски свити

• 27 свити и партити за чембало

• 3 менуети за чембало

Вонкашнї вязи

• Слава само Богу: Живот Ј. С. Баха”.
• Бахово образовање и каријера” web.archive.org/
• Бахов архив у Лајпцигу”. web.archive.org
• Снимак извођења Добро темперованог клавира”. web.archive.org
• Бах је и за џезере и рокере најважнији композитор у историји музике rts.rs
• Bah - zanimljivi detalji iz života čuvenog kompozitora umetickaskola.com