Йоаким Гербут
| Йоаким Гербут | |
|---|---|
| Ту будзе Фотка.jpg | |
| Датум народзеня | 14. фебруара 1928. |
| Датум упокоєня | 15. априла 2005 (78) |
| Державянство | югославянске, сербске |
| Язик творох | руски, македонски |
| Школа | Ґимназия, Бол на Брачу, Ужгород, Нови Сад и Вербас |
| Универзитет | Католїцки богословски факултет, Заґреб |
| Наукови ступень | Докторат з церковного права, 1966. року |
| Период твореня | 1952-2005. |
| Жанри | душпастирство, владичество |
| Поховани | у крипти Катедралней церкви св. о. Миколая у Руским Керестуре |
Монсиньор др Йоаким Гербут (*14. фебруар 1928 - †15. април 2005), владика скопски за римокатолїкох, апостолски еґзарх за грекокатолїкох у Македониї. [1]
Биоґрафия
[ушориц | ушор жридло]Йоаким Гербут народзени у Руским Керестуре 14. фебруара 1928. року. Оцец Мафтей и мац Мелания родз. Няради (з роду владики Нярадия). Основну школу закончел у Руским Керестуре, а до ґимназиї ходзел у Болу на Брачу, Ужгородзе, Новим Садзе и Вербаше дзе матуровал як найлєпши школяр у ґенерациї.[2] После матури, 1948. року, бул на младежскей роботней акциї на вибудови желєзнїцкей драги у Босни.[3]
Богословию закончел на Католїцким богословским факултету у Заґребе. За паноца Крижевского владичества го пошвецел владика Гавриїл Букатко у конкатедралней церкви Св. Кирила и Мефтодия у Заґребе 6. юлия 1952. року. Докторски студиї церковного права закончел на Латеранским папским всеучилїщу у Риме 1966. року. Року 1968. у Риме на латинским язику обявена його докторска теза як окремна кнїжка хтора мала 131 бок.[4]
Йоаким Гербут бул священїк у Скоплю од 1954, по 1957. рок и у Крижевцох од 1957. по 1959. рок.[5] Два и пол рока (од 1959. по 1961) служел як капелан у Руским Керестре. Бул меновани за управителя парохиї у Осиєку. Бул духовнїк апацох, шестрох Василиянкох.
Надвладика Букатко го 1966. року меновал за духовнїка у семинариї и за канцелара владическей канцелариї як и за владического економа.
За владику скопско-призренскей диоцези др Йоаким Гербут бул меновани 2. октобра 1969. року з боку папи Павла VI а пошвецел го верховни босански надвладика Смилян Франьо Чекада 21. децембра 1970. року у сараєвскей катедрли Шерца Исусового. Сопосвитителє були беоґрадски надвладика Гавриїл Букатко и сплитско-макарски надвладика Фране Франич.
За Апостолского визитатора за грекокатолїкох у Македониї є меновани 3. юлия 1977. року.[6] Владика Йоаким Гербут бул и член Комисиї за ревизию Восточного канонского права. У рамикох Владических конфренцийох Югославиї вон бул и член даєдних комисийох: Литурґийней комисиї - секция за восточни обряд, Правней комисиї и Мишаней комисиї Владическей конференциї - Униї висших монашеских настоятельох и Униї висших моншеских настоятелькох.[4]
За Апостолского еґзарха у Македониї бул преглашени 11. януара 2001. року.[7]
Владика Йоаким Гербут умар 15. априла у Скоплю, поховани є 18. априла 2005. року у крипти Катедралней церкви св. о. Миколая у Руским Керестуре.
Референци
[ушориц | ушор жридло]- ↑ Макай, Михайло (1977). Християнски календар 1978. Руски Керестур: Войводянски викарият крижевскей епархиї. б. 29.
- ↑ Миз, Роман (2005). Календар 2006. Петроварадин: Новинско-видавательна установа Руске слово. б. 357.
- ↑ Стоянов, Киро (1998). Християнски календар 1999. Нови Сад: Гркокатолїцка парохия св. о. Миколая, Руски Керестур. б. 62—66.
- ↑ 4,0 4,1 Миз, Роман (2016). Священїки дакедишнього осєцкого викарияту. Петроварадин: Парохия св. Петра и Павла, Нови Сад. б. 112. ISBN 978-86-88983-19-8. .
- ↑ Blazejowsky, Dmytro (1988). Ukrainian Catholic clergy in diaspora (1751-1988). Rome. p. 80.
- ↑ Варґа, Владислав (2002). Християнски календар 2003. Нови Сад: Грекокатолїцка парохия св. о. Миколая у Руским Керестуре. б. 139.
- ↑ Рац, Владислав (2001). Християнски календар 2002. Нови Сад: Грекокатолїцка парохия св. о. Миколая. б. 75.