Йоаким Будински
| Йоаким Будински | |
|---|---|
 | |
| Назвиско | Будинєц, Андри Гуздер Билянски |
| Народзени | 25. децембра 1927. |
| Умар | 20. юлия 1999 (72) |
| Державянство | югославянске |
| Язик творох | руски, сербски |
| Школа | ґимназия, Вербас и Зомбор |
| Универзитет | Студиї французкого и нємецкого язика, универзитет, Беоґрад и у Нємецкей |
| Период твореня | 1952—1998. |
| Жанри | каталоґизация кнїжкових фондох, прекладательство, литература, |
| Поховани | Руски Керестур |
Йоаким Будински (*25. децембер 1927–†20. юлий 1999), поета, ерудита и културни дїяч.
Биоґрафия
[ушориц | ушор жридло]Йоаким Будински народзени 25. децембра 1927. року на салашу на Билей Пустари (Руски Керестур). Бул єдине дзецко у Будинсковей фамелиї, оцец Михал и мац Мелана родз. Шовш. До основней школи ходзел на Билей и у Руским Керестуре, до ґимназиї почал ходзиц у Вербаше а закончел ю у Зомборе. Студиї нємецкого и французкого язика Йоаким комплетовал у Беоґрадзе, з тим же два семестри бул и на студийох у Нємецкей.
Робел у вецей институцийох спомедзи хтори треба спомнуц Институт за странски язики у Беоґрадзе кед бул, медзи иншим, анґажовани за прекладателя у Гарареу на схадзки нєвязаних жемох на найвисшим уровню. Потим у ОШ Петро Кузмяк у Руским Керестуре викладал нємецки язик. Оталь пошол до Конїцу (БиГ) дзе робел у воєней фабрики. О єден час Йоаким Будински ше врацел до Нового Саду на роботу у Библиотеки Матици сербскей дзе робел на каталоґизациї кнїжкових фондох, на редиґованю каталоґох и на месце информатора.
Бул сотруднїк НВУ Руске слово, окреме є запаметани по своїх поетских прилогох у рамикох додатка за културу, уметносц, литертуру и творчосц Култ. Свойо твори звичайно обявйовал под псевдонимом Андри Гуздер Билянски. Медзи своїма приятелями у ґрупи студентох и штредньошколцох у Руским Керестуре, Йоаким Будински бул познати по назвиску Будинєц. Ридши знали хто то Йоаким або Яким Будински, алє шицки знали хто то Будинєц.
За поезию обявену у Култу Йоаким Будински 1998. року достал награду того подлїстку новинох Руске слово.
Йоаким Будински бул вельки ерудита, мал нєзвичайно широке образованє и бешедовал седем язики - нємецки, французки, анґлийски, мадярски, италиянски, гречески и шпански. Його поетска творчосц и вон як писатель и поета будзе заберац значне место, окреме кед слово о поетских витвореньох зоз хторима овиковичел памятки на часц керестурского и кулского хотара под назву Била, єй салащаньох и своїх ближнїх. Нєт сумнїву же його поетске дїло постало свойофайтови памятнїк Билей пустари.
Йоаким Будински бул у малженстве зоз Еуфемию родз. Белак, у малженстве мали сина Мирослава.
Йоаким Будински умар 20. юлия 1999. року. Поховани є 22. юлия 1999. року на теметове у Руским Керестуре.
Литература
[ушориц | ушор жридло]- Михал Симунoвич, Прoцив шицких страхoх / Рoзгварка з Андрийoм Гуздeрoм Билянским, Руске слово, Нови Сад, 1999, 12. марец, б. 16 (Култ, ч. 3).
- Мирон Джуня, Шлїдом предсказаньох Билянского, Литературне слово, Нови Сад, 2007, децембер, число 12, б. 1. – (Руске слово, Нови Сад, 28. децембер 2007, число 52)
- Юлиян Тамаш, Винїцар (Ґу 80-рочнїци од народзеня Андрия Гуздера Билянского), Шветлосц, Нови Сад, 2007, число 4, октобер-децембер, б. 559.
- Мария Чурчич, Библиоґрафия Руснацох у Югославиї 1918-1980, Будински, Йоаким 2340 , Библиотека Матици сербскей, 1990, б. 329.
- Будински, Јоаким, Три песме, Мостови, год. 35, бр. 139/140 (2007), ISSN 0350-6525, ср. 23-26
- (Автор нєпознати), „Умар Андри Гуздер Билянскиˮ, Руски календар, 2000, б. 174.
Вонкашнї жридла
[ушориц | ушор жридло]- Будински, Йоаким, Винїцар: позберани твори, Андри Гуздер Биљански, НВУ Руске слово, 2006. ISBN 978-86-7105-164-1
- Андри Гуздер Билянски, Винїцар, НВУ Руске слово, 2006, ISBN: 978-86-7105-164-1