Йоаким Бики
| Йоаким Бики | |
|---|---|
 | |
| Народзени | 26. юния 1939. |
| Умар | 7. марца 2024 (85) |
| Державянство | югославянске, сербске |
| Язик творох | сербски, руски |
| Школа | Штредня електротехнїчна школа, Панчево |
| Универзитет | Висша електротехнїчна школа, Суботица |
| Период твореня | 1959—1999. |
| Жанри | образованє, просвита, култура, привреда |
| Поховани | На Городским теметове у Кули |
Йоаким Бики (*26. юний 1939—†7. марец 2024), єден зоз сновательох кулского Руского културно-уметнїцкого дружтва Др Гавриїл Костельник и його длугорочни предсидатель.
Биоґрафия
[ушориц | ушор жридло]Йоаким Бики ше народзел 26. юния 1939. року на салашу при Руским Керестуре од оца Якима и мацери Ирини як їх перше дзецко, а мал ище брата Янка и шестру Марию. До Основней школи ходзел на Косанчичу и у Р. Керестуре, штредню електротехнїчну школу закончел у Панчеве а потим и Висшу електротехнїчну школу у Суботици.
Роботни вик почал у фабрики Истра у Кули, а предлужел у Штреднєй електро-машинскей школи у Кули, а познєйше робел як наставнїк у Школи за образованє одроснутих при Роботнїцким универзитету. Зоз фамелию ше преселєл до Кули дзе зоз супружества з Миру, а вец зоз Серафину, ма дзеци Снежану и Мирослава.
Роботу предлужел у подприємстве Шветлосц у Кули на месце директора, цо окончовал осем роки, а потим Йоаким Бики прешол за референта за инвестициї до Електродистрибуциї у Вербаше одкадз 1999. року пошол до пензиї.
Йоаким Бики у рускей заєднїци остал запаметани по тим же од початку 2000-тих рокох бул у ґрупи ентузиястох хтори ше намагали обновиц културни живот Руснацох у Кули. Теди основане РКУД Др Гавриїл Костельник. Нє бул перши, алє бул єден з найдлугорочнєйших предсидательох того Дружтва. Виберани бул на даскельо мандати прето же ше указал як добри орґанизатор, упарти и витирвали, вельки ентузияст у роботи з чим инспировал на векшу активносц и других членох Дружтва. Вєдно з Владом Бучком допринєсол же би ше обезпечело просториї за роботу Дружтва, а попри того Бики упарто робел на звекшованю членства и його подмладзованю, и на звекшаню числа активносцох и секцийох.
Йоаким Бики шпивал у хлопскей шпивацкей ґрупи а, вєдно зоз супругу Серафину, активно шпивал и у мишаней шпивацкей жридловей ґрупи РКУД Др Гавриїл Костельник. У тих активносцох го остатнїх рокох онєможлївела чежка и длуга хорота.
Йоаким Бики ше упокоєл 7. марца 2024. року у своїм 85. року живота. Поховни є на городским теметове у Кули.
Вонкашнї вязи
[ушориц | ушор жридло]- У Кули поховани Йоаким Бики, М. Афич, Рутенпрес, ruskeslovo.com, 12. марец 2024