Иконостас церкви Рождества Святей Богородици у Дюрдьове

Вибудов грекокатолїцкей церкви у Дюрдьове одпочала на яр 1900. року а уж концом истого року, на швето Св. Архангела Михаила, тедишнї крижевски владика Юлиє Дрогобецки пошвецел нову церкву на чесц Рождества Пресвятей Богородици.

Иконостас збудовани 10 роки познєйше. Познате же царски двери и розпяце зробени у Австриї.

Малюнки на мурох у нукашньосцо церкви намальовал 1914. року новосадски уметнїк А. Годованї. Василиє Уйфалуши 1970 року обновел ентериєр церкви.

Грекокатолїцку церкву краша и шеснац новши витражи-образи, робота священїка Михаила Холошняя, чийо технїчне витворенє зробене у познатим зомборским ателєу Станишич.

Як настал иконостас у церкви

У чаше парохованя Максимилияна Храниловича, такой о рок по вибудови парохиї, односно 1910. року, конєчно наручени, справени и на швето Рождества Пресвятей Богородици, на сам парохиялни Кирбай, пошвецени Иконостас, на чийо поставянє ше чекало цалу єдну децению. Уж нє рахуюци на помоц владики Дрогобецкого, алє операюци ше на власни моци и пенєжни средства наручени, як призначел Дюра Биндас у Лїтопису парохиї, дзешка у Чешкей образи за иконостас парохиялней церкви.

Обнавянє спомнутого иконостасу у периодзе од 2007 до 2012. р. хторе ше окончовало у парохиялней дюрдьовскей художествено-иконописней роботнї наволаней Христожнїк, зоз хтору руководзел дюрдьовски капелан Михаил Холошняй - Матїйов, помогло часточно розришиц загадки о мальованю, о авторстве живописаня образох и конєчно о пошвецаню иконостасу. Велька векшина образох була намальована просто на нєгрундовани, лєм з лєновим олєйом премасцени десково подлоги и то зоз олєйовима фарбами. Од вкупно 34. образох осем були намальовани на платну и то у першим пасму иконостасу три хтори ше находзели над Царскима дзверками - Тайна Вечера, над Дияконскима - Воведениє и Покров Пресвятей Богородици, а у остатнїм верхнїм пасму - Розпяце зоз диптихом и на нїм намальовану под Крестом плачуцу Мацер Божу и Христового ученїка Йоана Богослова, як и по два з бокох централного верхнього креста стояци образи штирох старозавитних пророкох. За часточне розришенє дилеми кеди бул иконостас намальовани и пошвецени од найвекшого значеня представял сам верхнї Крест. Кед бул зняти, и кед ше установело же є намальовани на платну, а платно зоз малима гвоздзиками, досц нєпрофесийно прибите на древену подлогу, платнови малюнок Розпяца Христового ше знял и наишло ше на три записи. Єден, на правим плєцу водоровней дески Креста призначени, єднозначно наводзи датум поставяня и пошвецаня иконостацу: З помоцу Всемогущого поставени тот Иконостас у чаше парохованя Максимилияна Храниловича, року 1910. и пошвецени на Кирбай истого року (21. септембра 1910. року). Под текстом ище уписане и мено єдного церковного одборнїка: Дюри Провчия. Други два на двох процивних законченьох вертикалней дески Креста кратки призначки, за розлику од першей з горватску латинку зложеней, записани по нємецки. Верхня спомина автора Царских и Дияконских дзверкох - Франца Янда, як и место и час їх живописаня - Райхенау, у септембре мешацу 1910. року. (Понеже постоя вецей места зоз тим меном, як у Австриї два, так у Нємецкей и Швайцарскей, ище нє розришена загадка о хторим месце точно слово, а и податки о самим иконо-писательови у тей хвильки нєпознати). Долнї спомин-запис спомина Храниловичового предшественїка Андрея Лабоша, и його улога у нарученю мальованя Kреста и Образох.

Очиглядне, поровнуюци рукопис мальованих спомнутих Царских дзверкох и южних и сиверних Дияконских зоз стилом мальованя и уметнїцким виразом шицких других Образох иконостасу, же на нїм робели голєм двоме розлични авторе. Мено другого остава за тераз нєпознате. Ище раз здогаднєме на скорей у тексту спомнуте же о. Дюра Биндас у Парохиялним лїтопису кратко призначел же Образи за иконостас намальовани дзешка у Чехословацкей. Понеже ше у цеку обнови иконостасу дошло и до спознаня авторства резбарених украсних часцох, дзекуюци даскелїм по нємецки написаним призначком и самому подпису мена и презвиска резбара - Алойза Тауша, у велькей мири зоз сиґурносцу мож заключиц же єднанка и догварянє о виробку дюрдьовского иконостасу ишло прейґ новосадскей Християнско-позлатарскей роботнї за сербске православне церковне художество, власнїка Нємца Луя Тауша.

Ґалерия

Иконостас (лїви бок)
Деталь иконостаса
Попатрунок на иконостас зоз глїбини церкви

Вонкашнї вязи

Helena KORPAŠ, RESTAURACIJA IKONOSTASU, Makovcanj, портал Ютюб, 1. новембер 2016.
Ґалерия, вебсайт ГРЕКОКАФТОЛЇЧЕСКЕ ЦЕРКОВНЕ ОБЩЕСТВО При св. Храме Рождества Пресвятей Богородици - Дюрдьов.
ПРЕЛЕПЕ ДРВЕНЕ СТОЛИЦЕ КРАСЕ ГРКОКАТОЛИЧКУ ЦРКВУ, Грађански лист, вебсајт gradjanskilist.rs, 30. мај 2020.
Kulturna baština Vojvodine – Sakralni objekti u Đurđevu, vebsajt communications.rs, 15. septembar 2021.
Rusinska crkva - epicentar života rusinske zajednice u Bačkoj, vebsajt Top Srbija topsrbija.com, 28 jul, 2022.