Иконостас

Иконостас то преграда у Святим храме зоз хтору подзелєни олтар на святилїще и солею. Преграду ше прави з образох, иконох, та ше прето и вола иконостас (преграда з иконох).

Иконостас мал свой розвиток. Спочатку то була єдна обична нїзка преграда зоз єднима, або троїма дзверками. Вец ше преграда повисшовала, а на ню ше почали вишац образи и так тераз випатра сучасни иконостас. Нєшка єст два файти иконостасу:

■ Нїзки и

■ Високи

Високи иконостас преградзує цали простор, а нїзки лєм до одредзеней висини. И єден и други маю трої дзверка:

● Штреднї (царски дзверка)

● Южни (дияконски)

● Сиверни (поддияконски)

Розпорядок образох на иконостасу

Образи на иконостасу розпоредзени по одредзених нормох. Так з правого боку од штреднїх дзверкох обовязно поставени образ Исуса Христа, а з лївого Богородица. То найменєй цо ше муши випочитовац и без такого розпорядку простор нєзаконїти за окончованє богослуженя. Медзитим, подполни иконостас византийско-славянских церквох, права ґалерия образох.

У першим шоре, окрем спомнутих двох образох, таки иконостас ма на штреднїх дзверкох образ Благовищенє и штирох євангелистох, на южних образ первомученїка и архидиякона Стефана, на сиверних архангела Михаила, над штреднїма дзверми образ Тайней вечери. З правого боку южних дзверкох образ храму, а з лївого боку сиверних дзверкох образ отца Николая, або Йоана Крестителя. На образу храму намальовани святи, або святе собитиє, хторому храм пошвецени. И то перши шор иконостасу.

У другим шоре иконостасу дванац образи, дванац найвекших шветох през рок.

У трецим шоре дванац образи дванац апостолох.

У штвартим шоре иконостасу ше находза дванац образи пророкох.

Други и треци шор на штредку повязани з образом Святей Тройци, цо у штредку наказованя и пророкох и апостолох. На верху иконостасу Голгофта: розпяце коло хторого два образи Богородици и богослова Йоана.

Значенє иконостасу

Иконостас ма вельке култне и образовне значенє. То „сликовнїца” хтора приказує цалу историю спасеня, як и главних актерох у тим подняцу. То розтворена Библия хтору можу читац шицки.

Ґалерия

Иконостас у церкви святого Михаила ( 1763. рок) у месце Стара Любовня, Словацка Република

Литература

Дзвони, християнски часопис, (май) 2002, Протоєрей ставрофор Йоаким Холошняй
Monika Pavelčikova, MATZSOVSKÉ IKONY, 2010. strana 33.

Вонкашня вяза

Šta znači ikonostas , staznaci.com