Изидор
| Изидор польодїлец | |
|---|---|
.jpg) | |
| Народзени | коло 1070. року у Мадриду |
| Умар | 15. 05. 1130. у Мадриду |
| Преглашени за блаженого | 02. 05. 1619. |
| Преглашени за святого | 12. 03. 1622. |
| Споминдзень | 15. 05. |
Изидор польодїлец (San Isidro Labrador) (Мадрид, коло 1070—Мадрид, 15. 05. 1130) бул шпански польодїлец и барз побожни католїк. Року 1622. є преглашени за святого, а швеци ше го на дзень його шмерци – 15. май.
Биоґрафия
[ушориц | ушор жридло]Изидор народзени коло 1070. року у худобней фамелиї. Одмалючка робел на полю, а кед му родичи помарли, мушел предлужиц робиц як наднїчар у богатого ґазду хтори ше волал Вера. Бул барз вредни и прето го ґазда полюбел, алє то виволало зависц при других наднїчарох. Наднїчаре од зависци приповедали же Изидор мало роби, а вельо вецей часу препровадзує у молитви.
Кажде рано ше Изидор модлєл, а кед го ґазда опомнул, вон му крашнє одвитовал: „Причекайме жатву, та увидзиме же на хторим полю ше вецей зродзи – чи там дзе я робим, чи на полю других наднїчарох.” Бог го благословел – на полю дзе робел Изидор найвецей зродзело.
Под час войни, кед Алморавиди, односно припаднїки маварско – шпанскей династиї зоз Мароку завжали Мадрид, Изидор ше склонєл до Торелеґуна и ту ше оженєл зоз побожну дзивку Марию. После одредзеного часу ше врацел до Мадриду и робел у другого ґазду Ивана од Варґеса. Поставени є за надпатрача над цалим його маєтком. Изидор нє одступал од своїх увереньох, побожносци, а таки способ живота ознова створел зависц при других роботнїкох на тим маєтку. Бул обвинєни же ше вецей часу модлї, а мало роби. Ґазда ше сцел прешвечиц до того та пошол на польо видзиц яка Изидорова робота. Док ше Изидор модлєл, ангели тримали плуг и орали. После того збуваня ґазда го ище баржей почитовал, а почитовац го почали и шицки други. Изидор вельо помагал худобним людзом.
Изидор умар 15. 05. 1130. року, поховани є на теметове св. Андрея, на хторим ше од теди збували велї чуда. После 40 рокох його гроб отворени и пренайдзене нєрозпаднуте цело (1). Цело Изидора положене до стриберней труни хтора потим однєшена до церкви св. Андрея у Мадриду, дзе и нєшка стої.
Року 1619. Изидора за блаженого преглашел папа Павле V(2), а за святого 1622. року го преглашел папа Григор XV. Изидор защитнїк польодїлцох и главного варошу Шпаниї – Мадриду.