Изанаґи

У Японскей митолоґиї, Изанаґи (イザナギ/伊邪那岐/伊弉諾), полне формалне мено Изанаґи-но-Микото (伊邪那岐命/伊弉諾尊; у значеню „Тот хтори поволує” або „Хлоп хтори поволує”), то божество твореня и живота. Вон и його шестра, хтора му тиж так и супруга Изанами остатнї од седем ґенерацийох примордиялних божествох хтори ше манифестовали после формованя раю и жеми. Изанами и Изанаґи ше тримаю за створительох Японского архипелаґу и предкох велїх божествох, до хторих спадаю богиня Аматерасу, бог мешаца Цукуйоми и бог бурйох Сусаноо. Изанаґи бог за хторого ше може повесц же є початок терашнєй японскей империялней фамелиї.

Мено

Його мено у Кодїкию (коло 712. року н.е.) ше зявює як Изанаґи-но-Ками (伊邪那岐神) и Изанаґи-но-Микото (伊邪那岐命), а у Нихон Шокию (Хронїки Япону, коло 720. року н.е.) ше зявює як Изанаґи-но-Микото, гоч зоз розличнима характерами Кандїя (伊弉諾尊).

Мена Изанаґи и Изанами ше часто интерпретую на таки способ же су вицагнути зоз дїєслова izanau (по историйским правопису izanafu) або iⁿzanap- цо по заходно старояпонским значи „поволац”, дзе законченя -ки/-ґи и -ми представяю суфикси хлопского и женского роду. Буквални преклад менох то „Хлоп хтори поволує” и „Жена хтора поволує”. Ширатори Куракичи дал предкладанє за алтернативну теорию менох дзе корень иза- (або isa) хторе вицагнуте зоз исао (по историйним правопису isawo), цо значи успих або заслуга.

Предпоставя ше же етмолоґийне походзенє дїєслова предходзи штредньокорейскей леми yènc- цо значи „поставиц/ положиц на верх”.

Кодїки

Народзенє жеми

Кодїки приказує Изанаґия и його младшу шестру двойнятки Изанами як седму и остатню ґенерацию божествох хтори ше манифестовали после зявеня першей ґрупи богох, Котоаматсуками, кед створени рай и жем.

Перши богове Кунитокачи и Аменоминакануши зволали два божески створеня, хлопа Изанаґия и жену Изанами, и задлужели их за стварянє першей жеми. Же би им помогли, дали им копию украшену зоз драгоциним каменьом, наволану Аменонухоко (нєбесна копия). Двоме богове потим пошли на мост медзи нєбом и жему, Аме-но-укихаши (плїваюци нєбесни мост), и з копию збуртали морйо под нїм. Кед капки сланей води спадли зоз копиї, настало острово Оноґорошима. Зишли зоз нєбесного моста и на тим острове справели свой дом.

После даякого часу жадали ше спаровац, те направели слуп наволани Аме-но-михашира („нєбесни слуп”) и коло нього палату наволану Яхиро-доно (єден хиро, японска мерна єдинка, єднака приблїжно 1,82 метери, та би „осем-хири-палата” була коло 14,56 метери). Изанами и Изанаґи кружели коло слупа у процивних напрямох и кед ше конєчно стретли, Изанами перша прегварела як знаку поздраву. Изанаґи тримал же то нєприкладне, алє ше заш лєм спаровали. Достали двойо дзеци Хирука (дзецко-пиявку) и острово Авашима, алє понеже вони народзени деформовани, нє трима ше их за божества.

Положели дзеци до чамца и пущели их на морйо, а потим ше врацели на нєбо и глєдали одвит же цо погришно поробели. Други богове им одвитовали же хлопске божество требало перше прегвариц на церемониї винчаня. Так вец Изанами и Изанаґи ознова обишли слуп, а тераз Изанаґи перши прегварел кед ше стретли и їх спарованє було конєчно успишне.

Зоз їх зєдинєня народзена Ояшима, або "Жем осем вельких островох":

острово Авадї
острово Ийо (познєйше Шикоку)
острово Оки
острово Цукуши (познєйше Кюшу)
острово Ики
острово Цушима
острово Садо
острово Ямато (познєйше Хоншу)

Острова Гокаидо, Чишима и Окинава нє були часци Япону у давним чаше.

Изанами и Изанаґи створели ище шейсц острова, як и велї други божества. У пологох бога Каґуцучя (бога огня), Изанами умера. Похована є на гори Хиби, на гранїци старих провинцийох Изумо и Хоки, нєдалєко од варошу Яуґи у перфектури Шимане. Изанаґи у розпуки пре шмерц своєй супруги забива Каґуцучия и так наставаю на дзешатки божества.

Спущованє до Йоми

Изанаґи жадал врациц свою любов, Изанами, та ю провадзел по жем Йоми (жем ноцней цмоти), под'жемни швет мертвих. Кед ю пренашол, нє могол ю видзиц од циньох хтори скривали єй випатрунок. Модлєл ю най ше враци зоз нїм, алє му Изанами гварела же позно бо уж покоштовала єдзенє под'жемя (верело ше же тот хто скоштує єдзенє зоз другого швета постава його житель). Гварела му же ше вецей нїґда нє годна врациц на швет живих, алє же попробує достац дошлєбодзенє за одход.

Тота вистка барз нєсподзивала Изанаґия, алє вон одбил зохабиц ю саму у Йомию. Кед Изанами спала, вжал гребень зоз хторим вязал власи и запалєл го. Под нєсподзиваним налєтом шветлосци видзел ужасну форму своєй дакеди красней и милей супруги. Изанами теди була лєм згнїте месо зоз хторого виходзели гробаци и други ґадни створи.

Гласно плакаюци, Изанаґи вецей нє могол контроловац свой страх и почал бегац жадаюци врациц ше до швета живих и зохабел вою супругу хтора умарла. Изанами ше зобудзела з вреском и огорчено почала бежац за нїм. Послала Якусу-но-иказучи-но-ками (Раидїн) як и шикоме (бридоти) же би го врацели назад до Йомию.

Изанаґи вилєцел зоз уходу и дрилєл стину на отвор Йомоцухирасака (黄泉津平坂; пещера хтора представяла уход до Йоми) и так роздвоєл швет живих од швета мертвих.

Врещаци споза барикади, Изанами гварела же, кед же ю зохаби, кажди дзень знїщи 1.000 жительох. Изанаґи гнївацо одвитовал же кажди дзень подарує живот 1.500 жительом.

Пречисцованє

Изанаґи, чувствуюци же є брудни пре свой одход до Йоми, пошол до Аваґихари при улїве рики Тачибана у Химуки, на острове Цукуши и ту ше пречисцел купаюци ше у рики. Тот ритуал чисценя, хараи, представя традиционалне толкованє за ритуали пречисцованя хтори ше часто окончує у шинтоїстичним святилїщох у японскей релиґиї, дзе ше нащивителє святилїща умиваю зоз воду скорей як войду до святих просторийох. Док ше Изанаґи купал, зоз його лївого ока ше народзела богиня слунка Аматерасу, зоз правого ока ше народзел бог мешаца Цукуйоми, а зоз його носа ше народзел бог бурї Сусаноо.

Изанаґи и Сусаноо

Изанаґи подзелєл швет своїм троїм дзецом: Аматерасу достала Такамаґахару (高天原, Ровнїна Високого Раю), Цукуйоми достал ноц, а Сусаноо достал моря. Сусаноо нє поробел задаток хтори му бул задати, та место того плакал и нарикал, прецо лєси спрели а рики пресушели. Кед гварел оцови же жада пойсц до мацеровей жеми, Не-но-Катсу-Куни (根堅州国, „Жем кореньох”), нагнївани Изанаґи го вируцел зоз „божеским вируцованьом”, после чого ше вецей нє спомина.

Вонкашнї вязи:

Izanagi on the Japanese History Database, www.historyofjapan.co.uk