Изанами

Японски божества
	Намальовал Кобајаши Еитаку 1880-90, (Бостон). Изанаґи зоз копию на правим боку и Изанами на лївим
	о; д; у;

У Японскей митолоґиї, Изанами (イザナミ), полне формалне мено Изанами-но-Микото (伊弉冉尊/伊邪那美命; у значеню „Тота-хтора-поволує” або „Жена-хтора-поволує”, богиня твореня и шмерци, тиж так є и мац богох у шинтоїзме. Вона и єй брат и супруг Изанаґи остатнї од седем ґенерацийох примордиялних божествох хтори ше манифестовали после твореня раю и жеми. Изанами и Изанаґи ше тримаю за створительох Японского архипелаґу и предкох велїх божествох, до хторих спадаю богиня Аматерасу, бог мешаца Цукуйоми и бог бурйох Сусаноо. У митолоґиї, вона директни предходнїк японскей империялней фамелиї. У шинтоїзме и японскей митолоґиї, Изанами подаровала людзом шмерц, та ше вона дакеди трима и за шиниґамия (бог шмерци).

Мено

Єй мено у Кодїкию (коло 712. року н.е.) ше зявює як Изанами-но-Ками (伊弉冉神) и Изанами-но-Микото (伊邪那美命), а у Нихон Шокию (Хронїки Япону, коло 720. року н.е.) ше зявює як Изанами-но-Микото, гоч зоз розличнима характерами Кандїя (伊弉冉尊).

Мена Изанаґи и Изанами ше часто интерпретую на таки способ же су вицагнути зоз дїєслова izanau (по историйским правопису izanafu) або iⁿzanap- цо по заходно старояпонским значи „поволац”, дзе нзаконченя -ки/-ґи и -ми представяю суфикси хлопского и женского роду.^[1]^[2]^[3] Буквални преклад менох то "Хлоп хтори поволує" и "Жена хтора поволує".^[4]^[5] Ширатори Куракичи дал предклад за алтернативну теорию менох дзе корень иза- (або isa-) хторе вицагнуте зоз исао (по историйским правопису isawo), цо значи успих або заслуга.^[6]

Предпоставя ше же етимолоґийне походзенє дїєслова предходзи штредньокорейскей леми yènc- цо значи „поставиц/ положиц на верх”.

Богиня твореня

Перши богове Кунитокачи и Аменоминакануши зволали два божески створеня, хлопа Изанаґия и жену Изанами, и задлужели их за стварянє першей жеми. Же би им помогли, дали им копию украшену зоз драгоциним каменьом, наволану Аменонухоко (нєбесна копия). Двоме богове потим пошли на мост медзи нєбом и жему, Аме-но-укихаши (плїваюци нєбесни мост), и з копию збуртали морйо под собу. Кед капки сланей води спадли зоз копиї, настало острово Оноґорошима. Зишли зоз нєбесного моста и на тим острове наравели свой дом.

После даякого часу ше жадали спаровац, та направели слуп наволани Аме-но-михашира („нєбесни слуп”) и коло нього палату наволану Яхиро-доно (єден хиро, японска мерна єдинка, єднака приблїжно 1,82 метери, та „осем-хири-палата” була коло 14,56 метери). Изанами и Изанаґи кружели коло слупа у процивних напрямох и кед ше конєчно стретли, Изанами перша прегварела як знак поздрава. Изанаґи тримал же то нєприкладне, алє ше заш лєм спаровали. Достали двойо дзеци Хирука (дзецко-пиявку) хтори после постал познати як бог Ебису и острово Авашима, алє понеже вони народзени деформовани, нє трима ше их за божества.

Положели дзеци до чамца пущели их на морйо, а потим ше врацели на нєбо и глєдали одвит же цо погришно поробели. Други богове им одвитовали же хлопске божество требало перше прегвариц на церемониї винчаня. Так вец Изанами и Изанаґи ознова обишли слуп, а тераз Изанаґи перши прегварел кед ше стретли и їх злучованє було конєчно успишне.

Зоз їх зєдинєня народзена Ояшима, або "Жем осем вельких островох":

острово Авадї
острово Ийо (познєйше Шикоку)
острово Оки
острово Цукуши (познєйше Кюшу)
острово Ики
острово Цушима
острово Садо
острово Ямато (познєйше Хоншу)

Острова Гокаидо, Чишима и Окинава нє були часци Япону у давним чаше.

Изанами и Изанаґи створели ище шейсц острова, як и велї други божества. У пологох бога Каґуцучия (бога огня), Изанами умера. Похована є на гори Хиби, на гранїци старих провинцийох Изумо и Хоки, нєдалеко од варошу Яуґи у перфектури Шимане. Изанаґи у розпуки пре шмерц своєй супруги забива Каґуцучия и так наставаю на дзешатки божества.

Кодїки

Кодїки бешедує о Изанамовей шмерци и єй гробе, хтори ше находзел на гранїици медзи жемами Изумо и Хоки. Бешедує же Изанами пренєсла свою душу на животинї и чловека, алє нє спомина чи ше Изанами реинкарновала чи нє.

Шмерц и под'жемє

Изанаґи жадал врациц свою любов, Изанами, та ю провадзел по жем Йоми (жем ноцней цмоти), под'жемни швет мертвих. Кед ю пренашол, нє могол ю видзиц од циньох хтори скривали єй випатрунок. Модлєл ю най ше враци зоз нїм, алє му Изанами гварела же позно бо уж покоштовала єдзенє под'жемя (верело ше же тот хто скоштує єдзенє зоз другого швета постава його биватель). Гварела му же ше вецей нїґда нє годна врациц на швет живих, алє же попробує достац дошлєбодзенє за одход.

Тота вистка барз нєсподзивала Изанаґия, алє вон одбил зохабиц ю саму у Йомию. Кед Изанами спала, вжал гребень зоз хторим вязал власи и запалєл го. Под нєсподзиваним налєтом шветлосци видзел нєкрасну форму своєй дакеди красней и милей супруги. Изанами теди була лєм згнїте месо зоз хторого виходзели хробаци и други ґадни створеня.

Гласно плакаюци, Изанаґи вецей нє могол контроловац свой страх и почал бегац жадаюци врациц ше до швета живих и зохабел свою супругу хтора умарла. Изанами ше зобудзела з вреском и огорчено почала бежац за нїм. Послала Якусу-но-иказучи-но-ками (Раидїн) як и шикоме (бридоти) же би го врацели назад до Йомию.

Изанаґи вилєцел з уходу и дрилєл стину на отвор Йомоцухирасака (黄泉津平坂; пещера хтора представяла уход до Йоми) и так роздвоєл швет живих од швета мертвих.

Врещаци споза барикади, Изанами гварела же, кед же ю зохаби, кажди дзень знїщи 1.000 жительох. Изанаґи гнївацо одвитовал же кажди дзень подарує живот 1.500 жительом.

Изанаґи, чувствуюци же є брудни пре свой одход до Йоми, пошол до Аваґихари при улїве рики Тачибана у Химуки, на острове Цукуши и ту ше пречисцел купаюци ше у рики. Тот ритуал чисценя, harai, представя традиционалне толкованє за ритуали пречисцованя хтори ше часто окончує у шинтоїстичних святилїщох у японскей релиґиї, дзе ше нащивителє святилїща умиваю зоз воду скорей як войду до святих просторийох. Док ше Изанаґи купал, зоз його лївого ока ше народзела богиня слунка Аматерасу, зоз правого ока ше народзел бог мешаца Цукуйоми, а зоз його носа ше народзел бог бурї Сусаноо.

Хронїки Япону

Гоч у велїх аспектох приповедка о Изанами и Изанаґийови у Хронїкох Япону подобна зоз Кодїкийом, заш лєм ше розликує по тим же ше Изанами нє спущує до под'жемного швета (Йоми). Вона напевно нєпреривно жиє на острове Авадї у храму. Попри того, у Хронїкох Япону поведзене же три божества Аматерасу, Цукуйоми и Сусаноо настали зоз злучованьом Изанами и Изанаґия, а нє зоз Изанаґия под час ритуалу чисценя.

Референци

↑ Kadoya, Atsushi; Yumiyama, Tatsuya. Izanami. Kokugakuin University. https://d-museum.kokugakuin.ac.jp/eos/detail/?id=9384. [преверено 2024-03-23].
↑ Phillipi, Donald L. (1969). Kojiki. Tokyo: University of Tokyo Press. p. 482.
↑ Chamberlain (1882). Section II.—The Seven Divine Generations.
↑ Philippi, Donald L. (1968). Kojiki. pp. 480.
↑ Chamberlain, Basil Hall (1919). The Kojiki. pp. 19.
↑ Matsumura, Takeo (1955). 日本神話の研究, 第2巻 (Nihon shinwa no kenkyu, vol. 2). Baifūkan. p. 56.

[1] Kadoya, Atsushi; Yumiyama, Tatsuya. Izanami. Kokugakuin University. https://d-museum.kokugakuin.ac.jp/eos/detail/?id=9384. [преверено 2024-03-23].

[2] Phillipi, Donald L. (1969). Kojiki. Tokyo: University of Tokyo Press. p. 482.

[3] Chamberlain (1882). Section II.—The Seven Divine Generations.

[4] Philippi, Donald L. (1968). Kojiki. pp. 480.

[5] Chamberlain, Basil Hall (1919). The Kojiki. pp. 19.

[6] Matsumura, Takeo (1955). 日本神話の研究, 第2巻 (Nihon shinwa no kenkyu, vol. 2). Baifūkan. p. 56.

[1]

[2]

[3]

[4]

[5]

[6]