Иван Терлюк
| Иван Терлюк | |
|---|---|
 | |
| Датум народзеня | 3. септембра 1939. |
| Датум упокоєня | 1. марца 2011 (71) |
| Державянство | югославянске, сербске |
| Язик творох | українски, руски |
| Школа | Ґимназия, Сримска Митровица |
| Универзитет | Филозофски факултет (абс.), Нови Сад |
| Период твореня | 1966—1991. |
| Жанри | новинарство, култура |
| Поховани | Городски теметов у Новим Садзе |
Иван Терлюк (*3. септембер 1939—†1. марец 2011), новинар у НВРО Руске слово, редактор додатку новинох под назву Українске слово.
Биоґрафия
[ушориц | ушор жридло]Иван Терлюк народзени 3. септембра 1939. року у валалє Хорвачани, нєдалєко од Прнявора у Босни и Герцеґовини.[1] До основней школи Иван почал ходзиц у сушедним валалє Поточани а кед ше його родичи преселєли до Сриму до Латярку при Сримскей Митровици, вон предлужел ходзиц до школи у Шашинцох и Латярку.
Ґимназию Иван закончел у Сримскей Митровици и уписал ше на Филозофски факултет у Новим Садзе на ґрупу за русийски язик и литературу, дзе абсолвовал.
У маю 1964. року у новинох Руске слово почал виходзиц додаток Литературне слово наменєни литературним твором. Иван Терлюк, теди як студент Филозофского факултета, бул єден зоз його стаємних сотруднїкох.
Иван Терлюк почал робиц у Видавательно-друкарским подприємстве Руске слово у авґусту 1966. року кед редакция новинох була ище у Руским Керестуре. Случай сцел же ВДП Руске слово пар мешаци пред тим достало согласносц за початок видаваня литературного часопису на руским язику. Назву часопису утвердзел Инициятивни одбор после консултацийох зоз потенциялнима сотруднїками. Було вецей предкладаня, алє векшина ше вияшнєла за тото же би часопис затримал стару назву Шветлосц, алє же би його змист, попри литератури и култури, облапял и дружтвени питаня. Так є и реґистровани у Покраїни, а за одвичательного редактора меновани Дюра Папгаргаї. Редакцийни колеґиюм бул у составе: Дюра Варґа, Микола Кочиш, Дюра Папгаргаї, Мирослав Стрибер и Иван Терлюк. И уж у октобре 1966. року Шветлосц ше зявела зоз 1. числом по другираз, алє на нукашнїм першим боку було назначене же то 4. рок виходзеня з чим указане же нови часопис превжал традицию свойого предходнїка.
Од 6. фебруара 1968. року официйне шедзиско новоформованого НВП Руске слово було у Новим Садзе. Теди колектив творели 11 особи, Иван Терлюк бул медзи нїма.
Од початку 1968. року Иван Терлюк почал интензивнєйше сотрудзовац на боку Українска сторинка хтори почал виходзиц у рамикох новинох Руске слово на українским язику. О два-три роки у новинох Руске слово почал виходзиц додаток новином под назву Українске слово. Иван Терлюк постал редактор того додатку хтори виходзел по 1991. рок, по час кед Иван Терлюк пошол, пре слабше здравє, до инвалидней пензиї.
Иван Терлюк ше двараз женєл. З першого малженства мал дзивче, а и у другим малженстве зоз Анку мал дзивче.
Иван Терлюк охабел глїбоки шлїд у руским и українским новинарстве. Бул запаметани як новинар хтори совисно окончовал кажди виплановани задаток на терену и хтори бул максимално пошвецени новинарству. Писал о обичних людзох и у тей роботи розвил схопносц и талант за писанє репортажох.
Як новинар и редактор Иван Терлюк найвецей писал о живоце и култури Українцох у тедишнєй Югославиї. Бул особа хтора лєгко установйовала контакти з людзми и здобувал довириє собешеднїкох. Вшадзи ше винашол, укладал обачлїви усиловносци на орґанизваню и популаризованю култури Українцох. Велї свойо рочни одпочивки Иван Терлюк препровадзел у заходней часци України дзе здобул велї познанства и дописовал ше зоз векшим числом особох. Як културни дїяч Иван Терлюк участвовал и у активносцох на снованю українских институцийох та так, медзи иншим, на початку дзеведзешатих рокох прешлого вику бул и предсидатель Дружтва за українски язик, литературу и културу.
Кед на инициятиву Дюри Папгаргая 1971. року бул основани Аматерски руски театер Дядя зоз сценами у Руским Керестуре и Новим Садзе у ґрупи новинарох хтори потримовали театралну дїялносц ше нашол и Иван Терлюк. Як ґлумец бул активни у Новосадскей сцени у периодзе од 1971. по конєц 1975. року. Иван Терлюк ґлумел у штирох татралних витвореньох и, попри тим, ґлумел гарештанца у ТВ филме Мирона Канюха Ратунок хтори зняти за програмски потреби ТВ Нови Сад.
Иван Терлюк, вельорочни новинар Руского слова у пензиї, умар 1. марца 2011. року, у 72. року живота. Поховани є на городским теметове у Новим Садзе.
| Иван Терлюк ґлумел у шлїдующих театралних
фалатох новосадскей сцени АРТ Дядя | ||
|---|---|---|
| Рок | Театрални фалат
|
Улога |
| 1971. | Питер Юстинов: РОМАНОВ И ДЮЛИЄТА | Шпиюн |
| 1972. | Мирон Канюх: КОНЦЕРТ ЗА ПСА И ШМЕЦЕ | Стари |
| 1974. | Дюра Папгаргаї: ОСТАЦ У СЕБЕ | Лука |
| 1975. | Ґордан Михич: ЖОВТА | Судия |
| Мирон Канюх Ратунок (ТВ филм), режисер Зоран Шарич, Телевизия Нови Сад, 1980-их | ||
Ґалерия
[ушориц | ушор жридло]-
Часц екипи ґлумцох на знїманюТВ филма Ратунок, з лїва: Силвестер Пушкаш, Татяна Колєсар Ґвоїч, Звонимир Павлович и Иван Терлюк (у билим), шедзи Драґен Колєсар. -
Сцена зоз театралного фалата Романов и Дюлиєта (1971). З лїва: нєпознати, Дюра Латяк, Янко Виславски, клєчи Иван Терлюк, нєпознати. -
Сцена зоз театралного фалата Жовта (1975). З лїва: Иван Терлюк, Цилика Стрибер и Ирина Гарди-Ковачевич.
Литература
[ушориц | ушор жридло]- Дюра Латяк. Руске слово 1945-1985. НВРО Руске слово. Нови Сад. 1985, б. 135-137.
Вонкашнї вязи
[ушориц | ушор жридло]- С. Фейса, Розвой кадрох у Редакциї и Друкарнї (6). новини Руске слово, www.ruskeslovo.com, 24. май 2024.
- С. Фейса, Конєчно могло шлєбоднєйше писац (III). новини Руске слово. www.ruskeslovo.com, 13. децембер 2022.
- Дю. Латяк, Боляци роки прерви (IV). новини Руске слово, www.ruskeslovo.com, 27. септембер, 2022.
Референци
[ушориц | ушор жридло]- ↑ М.С. Иван Терлюк (1939-2011), новини Руске слово, рок LXVII, чис. 9, Нови Сад, 4. марец 2011, б. 3.