Звонкаплоднїцова ваготносц

Звонкаплоднїцова ваготносц то ваготносц при хторей ше оплодзена ваїчкова клїтинка розвива звонка плоднїци. Може ше розвиц на ваєчнїку, вайцоводу або у бруховей глїбки.

Подзелєнє

Спрам места дзе пришло до усадзованя оплодзеней ваїчковей клїтинки розликуєме:

1. тубовну ваготносц

2. абдоминалну ваготносц

3. овариялну ваготносц

На 100 до 200 витворених породзеньох ше зявює єдна звонкаплоднїцова ваготносц. Од тих трох начишлєних файтох звонкаплоднїцовей ваготносци найчастейша тубовна ваготносц. На ню одпада 95% шицких звонкаплоднїцових ваготносцох, а на овариялну и абдоминалну ваготносц 5%.

Нєшка звонкаплоднїцово ваготносци вше частейши проблем пре шлєбодни сексуални живот женох, частих пременкох партнерох, як и запалєньох хтори приводза до зужованя лумену вайцоводу. Тиж так, хаснованє интраутерових уложкох односно спиралох як форма контрацепциї тиж так звекшує ризик од звонкаплоднїцовей ваготносци. Розлични виглєдованя доказали же и куренє ма директну повязаносц зоз наставаньом звонкаплоднїцовей ваготносци.

Тубовна ваготносц

Зависно од локациї ваготносци у вайцоводу, законченє тубовней ваготносци може буц розличне. Ампуларни ваготносци, хтори источашнє и частейши, углавним ше закончую зоз тубовним вируценьом без руптурох, док ваготносци у истмичней часци вайцоводу або у интерстицийней часци углавним приводза до руптурох.

Зависно од часци туби у хторей ше ваїчкова клїтинка змесцела, ваготносц може напредовац и 6 до 8, а дакеди и 12 тижнї.

Тубовни абортус

Зачаток хтори стране цело за тубу приводзи до контракцийох вайцоводу хтори го пробую висциснуц. Тото приводзи до моцних больох у долнєй часци бруха. Кирвавенє хторе настава як пошлїдок часточного оддвойованя плаценти твори хематоцелу. Пациєнткиня чувствує слабосц, круценє у глави и постої кревова плоднїцова чечносц.

Овариялна ваготносц

Овариялна ваготносц настава пре поремеценя перисталтики вайцоводу. Клинїчна слика барз подобна тубовней ваготносци, алє зоз швидшим розвойом.

Абдоминална ваготносц

Спрам способу наставаня, може буц примарна и секундарна. При примарней ше оплодзованє и усадзованє ваїчковей клїтинки од початку случує у бруховей глїбки, а при секундарней ше оплодзенє случело у вайцоводу, алє є при контрахованю вайцоводу одруцена до бруховей глїбки, дзе ше додатно и усадзела. Медзитим, тото зявенє барз ридке. За розлику од тубовней ваготносци, абдоминална ваготносц ше може предлужиц и длужей пре вигодни условия у бруховей глїбки у одношеню на вайцовод. У литератури описани случаї же ше ваготносц розвивала до самого термину за породзенє и успишно є закончена зоз царским резом.

Цервикална ваготносц

Гоч є нє звонкаплоднїцова, тота ваготносц спада до ґрупи ектопрактичних ваготносцох. Тота ваготносц барз опасна пре драматичну клинїчну слику и факт же вона ма схопносц застановиц кирвавенє зоз контракцию. Ваготносц ше розвива у шлїжацей скорочки гарлочка плоднїци хтора нє порихтана за ваготносц. Характеризую ю моцни болї и вельке кирвавенє. Кед ваготносц вецей як 8 тижнї, углавним ше закончує зоз гистеректомию, односно подполним хирурґийним одстраньованьом плоднїци.

Опать ище

 Ваготносц

 Породзенє

Литература

• Словнїк медицинскей терминолоґиї, Дружтво за руски язик, литературу и културу, Нови Сад, 2006. рок

Вонкашнї вязи

• Ванматерична трудноћа, www.ringeraja.rs
• Universitätsklinikum Leipzig: Extrauteringravidität, (язик: нємецки), Приступене: 10.09.2026.
• Kako prepoznati van materičnu trudnoću, femibion.rs
• Vanmaterična trudnoća, www.ginekologmilosradovic.rs