Звонимир Сакач
| Звонимир Сакач | |
|---|---|
 | |
| Датум народзеня | 17. авґуст 1958. |
| Датум упокоєня | 9. май 2026 (68) |
| Державянство | югославянске, сербске |
| Язик творох | сербски |
| Школа | Ґимназия, Руски Керестур |
| Универзитет | Природно-математични факултет, Нови Сад |
| Наукови ступень | Маґистер наукох (1989) |
| Период твореня | 1981—2025. |
| Жанри | физиолоґия слунечнїку, редактура наукового часопису |
| Поховани | Городски теметов у Новим Садзе. |
Звонимир Сакач (*17. авґуст 1958—†9. май 2026), маґистер наукох, наукови виглєдовач физиолоґиї слунечнїку, редактор наукового часопису.
Биоґрафия
[ушориц | ушор жридло]Звонимир Сакач ше народзел 17. авґуста 1958. року у Руским Керестуре. Оцец Онуфриє и мац Мелания дзив. Гудак. Звонимир мал младшу шестру Зденку.
Основну школу и ґимназию Звонимир Сакач закончел у Руским Керестуре. На Природно-математични факултет у Новим Садзе, ґрупа хемия, Звонимир ше уписал 1977. року, а дипломовал 1981. року. После дипломованя Звонимир уписал маґистерски студиї на истим факултету а титулу маґистра наукох достал 1989. року. Под час маґистерских студийох Звонимир ше занїмал зоз виглєдованями з обласци орґанскей хемиї. Назва його маґистерскей роботи була Изолованє, пречисцованє, одредзованє и хемийни трансформациї ґликоалкалоидох зоз кромпльох.
Звонимир Сакач ше 1985. року оженєл зоз Марию родз. Киндєр. У малженстве мали двох синох, Александра и Владимира.
Наукова робота
[ушориц | ушор жридло]Звонимир Сакач бул од 1987. року заняти у Институту за польодїлство и заградкарство, у Заводу за олєйово култури у Новим Садзе дзе препровадзел цали свой роботни вик.
Найвецей ше занїмал з виглєдованьом уплїву суши на синтезу асимилатох и на биопродуктивносц слунечнїку, як и з випитованьом квалитету олєйох, цо була часц його виглєдованьох вязаних за творенє гибридох слунечнїка и олєйового репченю зоз злєпшанима квалитетами олєйох и зоз лєпшима нутритивнима прикметами. Робел на квантитативним и квалитативним одредзованю мисту нектара и розвил одвитуюцу методолоґию.
Обявел вецей як 50 науково роботи як у медзинародних так и у домашнїх наукових часописох. Звонимир Сакач мал и вецей як 80 науково сообщеня хтори презентовал як на медзинародних так и на домашнїх наукових сходох.
Звонимир Сакач бул длужей як 30 роки шеф редакциї и технїчни редактор, познєйше редактор, наукового часопису Гелия, єдиного специялизованого медзинародного часописа о слунечнїку хтори ше и нєшка удатно публикує под покровительством Медзинародного здруженя за слунечнїк.[1]
Свойо доприношенє Звонимир Сакач дал и як коавтор на виробку учебнїкох зоз хемиї за основну и штредню школу.
Од младосци Звонимир ше занїмал зоз фотоґрафию и вона му остала гоби през цали живот.[2] У шлєбодних хвилькох вон любел послухац дїла класичней музики.
До пензиї Звонимир Сакач пошол у авґусту 2023. року.
Звонимир Сакач умар 9. мая 2026. року. Поховани є на городским теметове у Новим Садзе.
Ґалерия
[ушориц | ушор жридло]-
Звонимир Сакач ше сликовал при памятнїку погинутим борцом у центру Керестура, опрез Валалскей хижи. Памятнїк истого дня премесцени на нову локацию.
Литература
[ушориц | ушор жридло]- Ирина Папуґа, „Ґимназия у Руским Керестуре (1970) зоз континуитетом активносцх школярох по нєшкайши днї ˮ, Русинска гимназија-Руска ґимназия, ОШ и ґимназия Петро Кузмяк Руски Керестур и Дружво за руски язик, литературу и културу Нови Сад, 2000, б. 169.
- Тамаш, др Юлиян, „Дом култури ˮ, Руски Керестур, лїтопис и история (1745-1991), Месна заєднїца Руски Керестур, 1992, бок 420.
- Мирон Жирош, „Малочислени, а вельки народ (синтеза)ˮ, Бачванско-сримски Руснаци дома и у швеце 1745-1991, Том II, Грекокатолїцка парохия св. Петра и Павла, Нови Сад, 1998, б. 408 (25).
Вонкашнї вязи
[ушориц | ушор жридло]- Список авторских и коавторских наукових роботох (123), Zvonimir Sakac, MSc., Institute of Field and Vegetable Crops, Oil Crops Department, HPLC and GC Laboratory,
- ResearchGate, Zvonimir Sakac, MSc Researcher at Institut za ratarstvo i povrtarstvo, website researchgate.net
- Zvonimir Sakac, Research Scientist, HPLC and GC Laboratory, Papers by Zvonimir Sakac, website independent.academia.edu
- Sakac, Z. Works (19), website ORCID™, orcid.org
- Dr Vladimir Miklič, In Memoriam: Zvonimir Sakač, M.Sc., 1958-2026, International Sunflower Association, isasunflower.org , 05/21/2026.
Референци
[ушориц | ушор жридло]- ↑ HELIA, journal, PDF
- ↑ Члени Фото-кино секциї Дома култури Руски Керестур, Тамаш, др Юлиян, „Дом култури ˮ, Руски Керестур, лїтопис и история (1745-1991), Месна заєднїца Руски Керестур, 1992.