Зборнїк
Зборнїк або изборник то приручна богослужебна кнїжка у хторей ше находза вибрани найважнєйши тексти зоз скоро шицких кнїжкох яки ше хаснує у богослуженю.
История
[ушориц | ушор жридло]Попри наисце велького числа литурґийних кнїжкох, поєдиним священослужительом було очежане дойсц до нїх. Нє лєм священство, алє и богослужебно активнєйши вирнїки жадали мац голєм найглавнєйши богослужебни тексти, так же ше у остатнїх даскелїх сторочох почало друковац приручни кнїжки у хторих вибрани найхасновитши тексти зоз шицких урядових богослужебних кнїжкох. Тоти кнїжки барз помогли богослужебней пракси и вельо допринєсли дзвиганю поєдинєчного и общого културного и вирско-моралного уровня народу и вирнїкох. До тих кнїжкох спадаю рижни виданя Зборнїкох, Служба страсного тижня, Службенїк специялни, Апостоли и Евангелиї на нєдзелї и швета, та и рижни виданя Молитвенїкох.
Цо ше дотика вибору текстох, рижни виданя Зборнїкох розликую ше у ниянсох. З єдного боку велї видавателє, редакциї, а з другого боку и вельке число прикладнїкох у скорейших часох було присутне и у руских обисцох, а и у других народох византийско-славянского обряду, а то доказ же ше таки Зборнїки барз ценєли.
Даєдни виданя на церковнославянским язику Сербскей православней церкви
[ушориц | ушор жридло]Великий зборник, Нови Сад, 1878 (Димитрий Попович, парох зомборски)
Зборник боґослужебних песама, псалама и молитава, извод из Типика и црквенословенски речник, 1958, друге виданє було 1971.
Даєдни виданя Грекокатолїцкей рускей церкви Горнїци и Галичини
[ушориц | ушор жридло]Великий изборник, Унґвар, 1887
Изборник, Львов, 1901 (треце виданє)
Церковни зборник, Унґвар, 1906
Великий зборник благопотребних церковних чинов и служб из Часослова, Октоиха, Триода, Трефолоґиона, Минеї общия и Литурґикона, Унґвар, 1906 (штварте виданє)
Среднiй зборник, Унґвар,1912
Вечiрня и утреня, Жовква, 1912 (у двох часцох)
Среднiй зборник, Ужгород, 1932. рок
Зборнїки у руских грекокатолїцких церквох при Руснацох
[ушориц | ушор жридло]Вечiрня и утреня, та инши богослуження на всi недiлi и свята цилого року, друге поправлене видання, 1945, Видавництво оо. Василиян у Мондери то зборник хтори у велькей мири заменює шицки богослужебни кнїжки общого богослуженя, а хаснує ше го у наших церквох дзе ше окончує комплетне традицийне богослуженє.
Єй значносц и вредносц и у тим же у нєй и библийни читаня яки нєт у других зборнїкох и тото же ма и виводи зоз Типику (устав богослуженя), и то вше на местох дзе богослужитель, пре специфичну комбинацию дотичного богослуженя и дня, муши мац добре упутство.
Зборнїк Служби на кажди дзень Страсного тижня облапя шицки дньово богослуженя за кажди дзень през Страсни тидзень: Утриню, Часи, Вечурню, Повечериє. Ґу Вечурнї за пондзелок, вовторок и стреду додати и Служби Божи Приждеосвящених дарох на хторих ше, окрем старозавитних библийних читаньох, одредзує и читанє з Евангелиї. З вечурню Страсного (велького) штвартку служи ше и Служба Божа Василия Велького, а на вечурнї Велького пиятку ше окончує и обряд Христового хованя. На утринї Велького пиятку чита ше и дванац евангелиї, и то о страсцох Христових, а на утринї Велькей соботи три окремни статї. На Часох, хтори ше волаю Царски часи, чита ше Чтениє, Апостол и Евангелия. Зборнїк Служби на кажди дзень Страсного тижня видал Синод святей автокефалней Православней церкви у Польскей 1931 року.
Евангелия на нєдзелї, швета и рижни потреби (1952) и Читаня апостолски на нєдзелї, швета и рижни потреби (1963) то два зборнїки хтори друковани зоз одредзенима вименками по углядзе на Специялни службенїк (виданє Грекокатолїцкей церви, Львов, 1905) хтори нє бул прилапени як одвитуюци бо є друковани по углядзе на Мисал , богослужебну кнїжку Римокатолїцкей церкви.
Литература
[ушориц | ушор жридло]- Дзвони, християнски часопис, януар 2005. року, протоєрей ставрофор о. Йоаким Холошняй
- Церковни литурґийно литурґични лексикон, НВУ Руске слово и Грекокатолїцка парохия святих апостолох Петра и Павла, Нови Сад, 2011. бок 134, о. др Роман Миз