Завод за видаванє учебнїкох, Нови Сад
Историят видаваня учебнїкох на руским язику
[ушориц | ушор жридло]
Покраїнски завод за видаванє учебнїкох у Новим Садзе основани з одлуку Скупштини АП Войводини, а почал з роботу 1. септембра 1965. року. У Одлуки о снованю Заводу назначене же ма за задаток видавац школски учебнїки, приручнїки и иншу помоцну школску литературу, як и службени публикациї за потреби школох хтори робя на язикох националних меншинох у Войводини.
Завод тиж реґистровани за видаванє шицкого спомнутого и на сербскогорватским язику, цо значнєйше почина робиц од 1975. року, од приношеня першого наставного плана за Войводину.
Видаванє учебнїкох пред снованьом Завода
[ушориц | ушор жридло]Перши учебнїки у Войводини (по Другей шветовей войни) на мадярским, словацким, румунским и руским язику вишли 1946. року. Перши учебнїки на руским язику котри друковани у новей Югославиї були Буквар и Читанка за другу класу основней школи автора Михала Ковача, тедишнього учителя у Бикич Долу, хтори 1946. року друковало Видавнїцке предприятельство Автономней Покраїни Войводини „Змай" у Новим Садзе. Року 1948. основане Видавательно-друкарске предприяце Братство-єдинство у Новим Садзе и у нїм ше видавали учебнїки на шицких язикох националних меншинох: мадярским, словацким, румунским и руским. Кед 31. юния 1951. року було основане Видавательно-друкарске предприяце Руске слово у Руским Керестуре, до його составу вошла и друкарня хтора дотля була у составе новосадского Братства-єдинства и воно пребера на себе видаванє школских учебнїкох. У тим периодзе на руским язику видати 78 учебнїки, приручнїки и лектири у тиражу коло 70.000 прикладнїки. До Одсеку пришли робиц найлєпши линґвисти зоз шорох народносцох, а за руски язик вжати проф. Микола М. Кочиш. Дїялносц Одсеку тирвала по 1965. рок, по снованє Заводу, кед шицки фаховци цо там робели прешли робиц до Редакциї або Студийного оддзелєня Заводу.
Початок роботи Завода за видаванє учебнїкох
[ушориц | ушор жридло]Перши рок видаваня учебнїкох у Заводзе бул барз значни. Спрам документациї, у школским 1965/66. року було 62 наслови по руски.
Значне наглашиц же уж 1965. року медзи видатима учебнїками були: читанка за кажду класу, ґраматика за 5. и 6. класу и 6 приручнїки – роботни кнїжочки за виучованє руского язика. Того року видана наша перша Ґраматика за 5. и 6. класу як школски учебнїк чий автор бул Микола Кочиш.
У тим чаше вишли и осем терминолоґийни словнїки за школярох основней школи, котри у велїм олєгчали роботу и прекладательох, а мали и добри вплїв на виєдначованє фаховей терминолоґиї. Тото ше нє одноши лєм на язик учебнїкох, алє и на роботу других редакцийох у стредствох информованя.
Комплетна описна (наукова) Ґраматика руского язика проф. др Юлияна Рамача видата аж 2002. року. Тоту ґраматику хасную ґимназиялци, студенти, професоре и шицки други котри ше интересую за руски язик.
У школским 1970/71. року од 1-8. класу видати 135 наслови.
Микола М. Кочиш 1971. року закончел перше школске виданє Правопису руского язика. Друге капиталне дїло Миколи М. Кочиша, Ґраматика руского язика (1973. року), нажаль, нє докончене пре вчасну авторову шмерц.
Перши стредньошколски учебнїки
[ушориц | ушор жридло]3 отвераньом оддзелєньох вербаскей Ґимназиї у Руским Керестуре требало швидко обезпечовац учебнїки, та од 1971. по 1976. рок давана вельо векша увага на видаванє учебнїкох за стредню школу. Теди видати 35 наслови за стредню школу и 82 наслови за основну школу. Школяре хасновали и дзевец терминолоґийни словнїки (8 видал Завод, а 1 Дружтво за руски язик, литературу и културу вєдно зоз Заводом). На шицких ступньох образованя по руски хасновани були у тим року 126 наслови, а школского 1980/81. року дзеци хасновали 71 наслов учебнїкох, приручнїкох и лектири.
Лектира
[ушориц | ушор жридло]Шлїдуюца велька обласц у видавательней дїялносци Завода було видаванє кнїжкох за лектиру. Велї наслови настали и як зборнїки и вибори зоз литератури руских, войводянских, югославянских и шветових писательох. У цалим периодзе видаваня лектири видруковане вецей як 60 наслови.
Школска реформа
[ушориц | ушор жридло]Кед 1986. року почала нова реформа образованя, требало пририхтац шицки нови учебнїки по нових наставних планох и програмох и то по два класи нараз. Так од 1986. року по 1990. видати 145 углавним нови наслови.
Од 1993. року Завод за видаванє учебнїкох у Новим Садзе зоз законску одлуку ше гаши и постава Оддзелєнє Явного подприємства Завод за учебнїки и наставни средства зоз Беоґраду. Без огляду на тоту пременку, Оддзелєнє у Новим Садзе предлужело видавац шицки потребни учебнїки як на руским язику, так и на язикох других националних меншинох у Войводини. На руским язику видати учебнїки и додатки за музичну културу, додатки з подобовей култури и приручнїки за предшколску програму.
Кед 2007. року перше зоз уредбу Влади, а потим и зоз Законом о учебнїкох дошлєбодзене видаванє учебнїкох приватним видавачом хтори ше реґиструю и достаню лиценцу приходзи до велького поремеценя на тарґовищу кед приватни видаваче (на початку их було реґистрованих вецей як 70) пребераю скоро цале тарґовище и ЯП Завод траци приходи од предаваня учебнїкох и остава без средствох за видананє нєкомерциялних нїзкотиражних виданьох, а то у найвекшей мири учебнїки на язикох националних заєднїцох. Тот проблем часточно ришени аж 2024. року кед кед видаванє малотиражних учебнїкох финансоване зоз буджету.
Сумарни прегляд видаваня учебнїкох
[ушориц | ушор жридло]Од снованя Заводу 1965. по 2025. рок видати скоро 1.300 (1296) наслови у тиражу коло 367.000 прикладнїки. На такей обсяжней роботи, окрем двох редакторох, були анґажовани коло 88 авторе, 140 прекладателє и коло 50 други сотруднїки (рецензенти, илустраторе, коректоре).
| Период | Число насловох |
Тираж |
|---|---|---|
| 1965 – 1970 | 109 | 36.000 |
| 1971 – 1975 | 102 | 35.000 |
| 1976 – 1980 | 138 | 47.000 |
| 1981 – 1985 | 95 | 32.000 |
| 1986 – 1990 | 145 | 43.000 |
| 1991 – 1992 | 19 | 6.000 |
| 1993 – 1997 | 82 | 25.000 |
| 1998 – 2002 | 96 | 28.000 |
| 2003 – 2007 | 196 | 57.000 |
| 2008 – 2014 | 187 | 36.000 |
| 2015 – 2025 | 127 | 22.000 |
| 1965 – 2025 | 1296 | 367.000 |
Капитални виданя
[ушориц | ушор жридло]Окрем учебнїкох, приручнїкох и лектири за порядну наставу у предшколским воспитаню, основней школи и стреднєй школи, Завод видал и вецей кнїжки котри окреме визначуєме бо нє спадаю до того обовязного корпусу, а по своїм значеню и превозиходза його основну дїялносц.
- Руснаци – Русини 1745–1995, Зборнїк роботох зоз медзинародней науковей конференциї з нагоди означованя 250-рочнїци приселєня Руснацох.
- Сербско-руски словнїк 2. том – заєднїцке виданє зоз Катедру за руски язик и литературу и Дружтвом за руски язик, у редакциї др Юлияна Рамача, др Михайла Фейси и мр Гелени Медєши.[1]
- История рускей литератури др Юлияна Тамаша.
- Стилистични вежби за висши класи основней школи др Юлияна Рамача.
- Применовнїцки конструкциї у руским литературним язику др Юлияна Рамача.
- Нашо пупчата – приручнїк за розвиванє и пестованє мацеринского и нємацеринского язика и интеркултуралносци при предшколских дзецох др Меланиї Микеш и мр Гелени Медєши.
- Учебнїки за пестованє руского язика з елементами националней култури за школярох котри нє маю порядну наставу на мацеринским язику др Якова Кишюгаса. Видруковани три кнїжки: перша за 1, 2. и 3. класу, друга за 4, 5. и 6. класу и треца за 7. и 8. класу. У тих учебнїкох окремна увага пошвецена такволаним елементом националней култури: ту обробени шицки векши места у котрих жию Руснаци, визначни особи зоз тих местох, способ живота и народни обичаї на валалє и у варошу, у прешлосци и нєшка, як и простори и места зоз котрих ше нашо предки приселєли до Войводини.
- Учебнїк за пестованє руского язика з елементами националней култури за школярох котри нє маю порядну наставу на мацеринским язику за 1. и 2. класу Ана-Мариї Рац и Олї Яковлєв
- Вибрани твори Дюри Папгаргая у трох томох: У роси кощак сон, Живи цинї и Запор, заєднїцке виданє зоз Руским словом.
- Ґраматика руского язика др Юлияна Рамача за ґимназию (1–4. класу)
- Додатки з националней историї Руснацох за учебнїки историї и учебнїки познаваня природи и дружтва др Янка Рамача
- Ориґинални учебнїки за музичну културу од 1. по 6. класу основней школи Лидиї Пашо и Наталиї Зазуляк.
Завод за 60 роки своєй дїялносци вецей раз менял официйне мено, алє колоквиялно ше вше волал Завод за видавнє учебнїкох.
Основани є як Покраїнски завод за видаванє учебнїкох, потим меня мено на Завод за видаванє учебнїкох, та на Завод за учебнїки, же би 1993. року постал Оддзелєнє у Новим Садзе ЯП Завода за уџбенике и наставна средства, Београд и конєчно Центар за малотиражне уџбенике Завода за уџбенике, Београд
Заняти у Рускей редакциї Заводу були:
- Микола М. Кочиш, Мария Кочиш, Дюра Варґа, Еуфемия Варґа, Мария Чакан, Амалия Хромиш, Славко Сабо, Мария Дудаш, Гелена Папуґа.
Ґалерия
[ушориц | ушор жридло]-
Писанка -
Чатанка -
Буквар -
Ґраматика 6 -
Ґраматика 8 -
Ґраматика руского язика -
Пестованє -
Черешньов квиток -
Виронаука -
Руски язик -
Биолоґия 8 -
Читанка -
Музична култура -
Словнїк Физика -
Словнїк ґеоґрафия -
Правопис -
Словнїк польопривреда -
Словнїк пожива -
Словнїк здравство
Литература
[ушориц | ушор жридло]- Славко Сабо: Завод за видаванє учебнїйох од снованя по нєшка, Studia Ruthenica, Дружтво за руски язик, литературу и културу, ч. 22, 2017, б. 46-52.
- Билтен 52, Завод за издавање уџбеника, Нови Сад, 1985.
- Мирон Жирош, „Малочислени, а вельки народ (синтеза)ˮ, Бачванско-сримски Руснаци дома и у швеце 1745-1991, Том II, Грекокатолїцка парохия св. Петра и Павла, Нови Сад, 1998, б. 402.