Жобрача гора
Жобрача гора – локалитет, нєвелька часц хотара у Руским Керестуре под поваляним Високим мостом, кед ше идзе беґельом до Вепровачу и спущи ше зоз гаци на лїво долу.
Слово чежко розтолковац: першу часц – жобрача – мож вицагнуц зоз приповедкох и давних паметаньох, алє другу часц – гора – нїяк. То анї нє гора, аж би ше лєдво могло повесц же є даяки брещок. То лєм єден нєвельки фалат жеми на тромеджи Керестура, Вепровачу и Филїпова, хтори нїхто нїґда нє орал анї нє копал, та на нїм росли якиш черяки и рижни трави, нє рушани анї нє сцинани. Єден часц ше на ню схадзала младеж цо сцела свойо преслави Першого мая, школского розпусту або даякей такей нагоди отримац далєко од очох любопотлївих валалчанох. Там вони знали и шатори розопинац, та и котлїки вариц. А знали ше и даяки пари умкнуц же би ше нєзавадзано препущели медзисобним нїжносцом.
Можебуц то лєм Керестурци, жадни горох и лєсох хтори им остали у паметаню, пожадали мац голєм у фантазиї даяку гору – та ю себе видумали же нє придзе на розум каждому преверйовац цо то.
А прецо жобрача, о тим уж могло буц бешеди: мож єдноставно повесц же то место дзе ше схадзаю жобраци. То им таке як место схадзаня после обиходзеня трох валалох, двох теди преважно швабских и єдного руского, дзе могли на мире попрепатрац цо им наспущовали милосердни людзе од хторих жобрали, або хторим шпивали. Або и тото цо себе сами наспущовали кед им було под руками, та закончело у меху чи торби, а ґазда го после даремно днями глєдал по обисцу и биткал ше дзе є. Вони тоти свойо заробки медзисобно препатрали и черали, упутйовали єдни других як би з того вицагли цо лєпши хасен. Вироятно же то було и место їх поради пред розиходзеньом до тих валалох, а и место планованя кадзи далєй, зависно од календара вашарох, пияцох лєбо вельких шветох.
Литература
[ушориц | ушор жридло]- Гарди Ковачевич, Ирина, Нєбо над Керестуром, Руске слово Нови Сад 2012, б. 225.