Емил Гудак
| Емил Гудак | |
|---|---|
 | |
| Народзени | 1. децембра 1936. |
| Умар | 7. децембра 2015 (79) |
| Державянство | югославянске, сербске |
| Язик творох | руски, сербски |
| Школа | Штредня тарґовецка школа |
| Универзитет | Висша економско-комерциялна школа, Нови Сад |
| Период твореня | 1955—1996. |
| Жанри | комерцияла, финансийне дїлованє, култура |
| Поховани | на теметове у Руским Керестуре |
| Припознаня | |
Емил Гудак (1. децембер 1936—7. децембер 2015), визначни економиста-комерциялиста и длугорочни активиста у култури, окреме у Фестивалє Червена ружа, дзе ше роками анґажовал, насампредз у обезпечованю спонзорох и финансиєрох Фестивалу.
Биоґрафия
[ушориц | ушор жридло]Емил Гудак народзени 1. децембра 1936. року у Руским Керестуре. Оцец Йовґен и мац Єлисавета (Ержа) нар. Надь. Емил мал ище три шестри, Маґдалену, Марию и Еуфемию. По законченю штреднєй тарґовецкей школи Емил Гудак кратши час робел як тарґовец у Новим Садзе, а концом 50-тих рокох прешлого вику почал робиц у Землєдїлскей продуковательней задруґи Русин у Руским Керестуре, хтора ше 1962. року здружела до ИПК Червинка, так же прешол на роботу до комерциялней служби Комбинату у Червинки. Там робел по 1967. рок, кеди Задруґа Русин вишла з Комбинату у Червинки и здружела ше зоз Землєдїлску задруґу Перши май у Керестуре.
Емил Гудак бул оженєти зоз Злату родз. Сабадош, у малженстве мали сина Златка и дзивку Емилию.
Попри роботи закончел и висшу економско-комерциялну школу у Новим Садзе, так же у новооснованей Задруґи перше бул руководитель комерциялней служби, а кед Задруґа 1971. року преросла до Польопривредного комбинату, Гудак постава перши комерциялни директор Комбинату Перши май. Од 1974. по 1976. рок робел як референт у служби плану и анализи, а кед 1976. року на уровню кулскей општини основана зложена орґанизация Аґроиндустрийни комбинат Штредня Бачка, зоз шедзиском у Червинки, Емил знова одходзи на роботу до Червинки, тераз, до Комерциялней служби велького АИК-у. Там робел до його розформованя концом 1989. року, врацел ше до ПК Перши май у Керестуре, дзе у комерциялней служби робел ище дасельо роки по пензию.
Практично, цали роботни вик Емил Гудак робел у комерциялних службох польопривредних орґанизацийох и комбинатох у Руским Керестуре и у кулскей општини и мал вельки угляд у дїловних кругох, а окреме медзи комерциялистами у аґраре Войводини, алє и Горватскей, Словениї и Босни и Герцеґовини. Бул познати як строги руководитель и тварди прегваряч, алє и як коректни окончователь комерциялних догваркох. Под час роботи у АИК Штредня Бачка 14 роки бул домашнї на наступох комбинату на Новосадским польопривредним сайме и на Велесайме у Заґребу.
Улога Емила Гудака у рускей култури
[ушориц | ушор жридло]Попри спомнутей роботи, Емил Гудак од младосци бул и з нашу култури и кед тедишня валалска манифестация Червена ружа, хторей Емил Гудак бул и єден зоз сновательох, 1968. року преросла до Фестивалу култури Руснацох и прешла до рамикох Дому култури, вельку потримовку Фестивал достал, и познєйше доставал праве и од ПК Перши май.
Емил Гудак бул скоро 30 роки єден з ношацих финансийних слупох Фестивалу Червена ружа, а прейґ 40 роки на даяки способ анґажовани у Доме култури, лєбо Ружи. Перше 13 роки бул член Управного одбору, а вец 4 роки и його предсидатель. У периодзе од 1971. по 1990. рок на тринац заводи бул и член Предсидательства, односно Вивершного одбору Фестивалу, а окреме бул анґажовани у тедишнєй Комисиї за финансиї Червеней ружи, хторей од 1976. року бул и длугорочни предсидатель. Його активне анґажованє у Ружи, насампредз пре здравствени причини, престало аж 2000. року.
Емил бул скоро синоним за пренаходзенє и обезпечованє спонзорох за Фестивал и то нє лєм на локално-реґионалним уровню, алє пре свойо розконарени контакти, познанства и схопносци як комерциялисти – и з теди моцних подприємствох, банкох и осиґуруюцих дружтвох на уровню держави, хтори за Ружу давали прилоги, а Руснаци и Керестур тих рокох препознавани и по Червеней ружи. Уведол и одредзени пропаґандно-маркетинґски приступ до обезпечованя спонзорох, так же у тот час скоро 70 одсто средствох за Фестивал обезпечовани на таки способ, а у велькей мири ше то одражовало и на главни и провадзаци квантитативно-квалитативни змисти Фестивалу.
Емил Гудак припада ґенерациї руководительох Фестивалу котра уведла нєшка стаємну праксу приводзеня ансамблох з иножемства на Ружу, з чим ше вельо помогло у дзвиганю квалитету, як Ружи так и наших ансамблох, а оможлївене и госцованє наших КУД у иножемстве.
Як у Фестивалє, активносц Емила Гудака була значна и за дїялносц керестурского Дому култури, дзе мал вельки угляд, та и по одходу до пензиї, вше кед требало посовитовал младших. Култури и Ружи остал вирни до конца и нє прешол анї єден Фестивал на хтори нє пришол як патрач, лєбо даєдна програма, концерт, чи театрална представа у Доме култури и Руским народним театру хтору Емил нє попровадзел, та щиро похвалєл, алє и конструктиувно покритиковал.
Емил Гудак бул и вельки амбасадор Руснацох у тедишнєй Югославиї – нїґда нє керовал повесц же є Руснак и зоз задовольством велїм толковал хто Руснаци, одкаль походза, яки маю обичаї, лєбо виру, так же зме з його одходом страцели нє лєм єдного з найвизначнєйших привреднїкох, алє и углядного Руснака и вельорочного борца за руску културу.
Емил Гудак умар 7. децембра 2015. року. Поховани є на керестурским теметове.
Ґалерия
[ушориц | ушор жридло]-
Єлисавета Ержа Гудак зоз сином Емилом и дзивку Маґдалену (1939)
Литература
[ушориц | ушор жридло]- Ґрупа авторох, „Управяцки и роботни цела Фестивала, Комисия за финансиїˮ, 30 Червени ружи, НИУ Руске слово, Нови Сад, 1991, бок 158.
- Ґрупа авторох, „ Управяцки и роботни цела Фестивала, Члени Совиту, Предсидательства ˮ, 30 Червени ружи, НИУ Руске слово, Нови Сад, 1991, бок 139, 143 .
Вонкашнї вязи
[ушориц | ушор жридло]- Умар Емил Гудак, зам/мкт/дюл, Рутенпрес, ruskeslovo.com, 8. децембер 2015.