Евґениє Медєши

Евґениє Медєши
Народзени	4. марца 1951
Умар	28. марца 2025 (75)
Державянство	югославянске, сербске
Язик творох	руски
Школа	ґимназия, Србобран, Нови Сад
Универзитет	Природно-математични факултет, Нови Сад
Период твореня	1975–2025
Жанри	образованє и просвита, добродзечна робота у вецей обласцох
Поховани	у Руским Керестуре

Евґениє Медєши Генц (*4. марец 1951 – †28. марец 2025), професор физики, дакедишнї спортиста и активни у вецей обласцох дружтвеного живота у Руским Керестуре и рускей заєднїци.

Биоґрафия

Евґениє Медєши ше народзел 4. марца 1951. року у Руским Керестуре, як старши син визначней учительскей пари Йовґена и Любици родз. Гарди котри робели у керестурскей школи. Евґениє мал младшого брата Павла.

Уж у нїзших класох основней школи Евґениє указовал прихильносц ґу технїки, механїки, радио-технїки та бул вецей роки член Секциї младих технїчарох хтора робела под руководством наставнїка Юлияна Колєсара.

Евґениє закончел основне образованє у Руским Керестуре, першу класу ґимназиї одпочал у Србобрану, а закончел ґимназийске школованє у новосадскей Ґимназиї Йован Йованович Змай. Студирал физику и дипломовал на Природно-математичним факултету у Новим Садзе.

Роботни вик Евґениє Медєши почал у Кули а о даскельо роки прешол до Керестура до школи Петро Кузмяк дзе робел по пензионованє и зохабел глїбоки шлїди. У настави бул єден з перших цо почали хасновац сучасни наставни средства, тиж бул инициятор и длугорочни реализатор школского сайту и школского часопису Тайм аут, водзел секцию астрономиї, а прекладал и учебнїки з физики и информатики.

Ище на студийох Евґениє Медєши бул часц редакциї емисиї за младих Радио Нового Саду Одгуки з ровнїни, а бул познати и як добри спортиста, бавяч ФК Русин а тиж и ватерполиста у керестурским клубе. Любов гу спорту допринєсла же длуго рекреативно бавел фодбал, а з нагоди 250-рочнїци приселєня Руснацох до тих крайох бул инициятор и учашнїк бициґлистичного подяца По драги наших предкох, з Керестура до Медзилаборцох у Словацкей.

Професор Евґениє Медєши Генц бул оженєти зоз Меланию родз. Тиркайла. У малженстве мали синох Евґения и Ивана.

Тиж так Евґениє Медєши бул активни член Еколоґийного руху у валалє Желєни персцень, дзе през 20 роки участвовал у велїх його проєктох, та бул и єден з иницияторох снованя Туристичного здруженя Руски Керестур. Пре здравствени проблеми Евґениє Медєши пошол у марцу 2016. року до пензиї.

Члени Секциї младих технїчарох на змаганю у Зомборе. Стоя: наставнїк Юлиян Колєсар, Душан Ковачевич, Мирко Колєсар, нєпознати. Нїзши шор: Славо Ерделї, Евґений Медєши Генц, Янко Рац, Анґела Колєсар, Юлиян Кашовски, Мелания Медєши, Янко Сопка, Гавриїл Колєсар, Дюра Гербут, наставнїк Янко Медєши, Дюра Новта, Йовґен Ковач. Куча: Янко Горняк, Мижо Микита, Мижо Катона, Михал Сеґеди Єва, Владко Семан, Яким Семан, Яким Медєши Меґре, Янко Гарди Емушка.

Од самого початку, фебруара 2022. року, вон потримал роботу на Рускей Википедиї, дзе и сам вредно робел у тиму ентузиястох, уключел и других, константно активни пририхтал коло 80 єдинки найвецей зоз своєй фаховей обласци, а з вельку дзеку, як инструктор, потримовал и керестурску ґрупу волонтерох котри ше ту уключели.

Професор Генц останє запаметани як облюбени, добри професор велїм ґенерацийом керестурских школярох, як добра и скромна особа интелектуалца котри ше нїґда нї у чим нє любел визначовац, алє у циню вредно доприношел зоз своїм знаньом и искуством. Так зоз своїм братом Павлом и другима зоз їх рок-ґенерациї були инспирация и Музичарови и Композиторови Владимирови Малацкови за музично-поетски колаж Генцаре чию промоцию, на жаль, нє дожил.

Евґениє Медєши Генц умар 28. марца 2025. року. Поховани є на керестурским теметове.

Ґалерия

• 
  Стоя: Гавриїл Колєсар (нєшка у Канади), Йовґен Медєши Генц, Желько Пап (нєшка у Сиднею), Павле Медєши, Драґомир Єлич, потим радийски технїчар, та Михайло Биндас. Нїжей: Яни Бучко, Мария Бучко, Иринка Гарди Ковачевич, Мария Биндас и Яни Сеґеди (нєшка у Канади).
• 
  Керестурски бициґлисти сцигли до Медзилаборцох, Словацка
• 
  Сход професорох у пензиї

Литература

• Тамаш, др Юлиян, „Просвитни роботнїки 1944-1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992,  бок 414.

Вонкашнї вязи

• Ґрупа авторох, „Емисия за младих ˮ, Гласи и часи, 70 роки Рускей редакциї Радио Нового Саду, Новинарска асоцияция  Руснацох - НАР, Нови Сад 2019, б. 50, 52.
• История школи, Школа од  1970. по нєшка, вебсайт Основней и штреднєй школи з домом школярох Петро Кузмяк, Руски Керестур, petrokuzmjak.com.
• Поховани професор Евґениє Медєши Генц (1951–2025), М. Афич, Рутенпрес, www.ruskeslovo.com, 31. марец 2025