Евґениє Ковач
| Евґениє Ковач | |
|---|---|
 | |
| Датум народзеня | 11. юлия 1934. |
| Датум упокоєня | 3. новембра 2011 (77) |
| Державянство | югославянске, сербске |
| Язик творох | сербски, руски |
| Школа | Ґимназия Жарко Зренянин, Вербас |
| Универзитет | Филозофски факултет, Беоґрад (катедра за анґлийски язик и литературу) |
| Период твореня | 1957 — 1995. |
| Польо активносци | образованє, дружтвено-политична робота, |
| Поховани | На Городским теметове у Вербаше |
| Припознаня | Орден заслугох за народ зоз стриберним венцом |
Евґениє Ковач (Йовґен) (*11. юлий 1934—†3. новембер 2011), професор, дружтвено-политични роботнїк, културни дїяч.
Биоґрафия
[ушориц | ушор жридло]Евґениє Ковач (Йовґен) народзени 11. юлия 1934. року у Руским Керестуре. Оцец Ковач Йовґен (1903-1994) и мац Єлена нар. Надь (1905-1971). Йовґен мал и шестру Иринку. Оцец Йовґена Ковача бул од 1928. по 1933. рок на роботи у Канади. Такой после Другей шветовей войни вон купел хижу у Вербаше дзе ше фамелия преселєла зоз Руского Керестура.
Йовґен Ковач закончел основну школу у Руским Керестуре а ґимназию Жарко Зренянин у Вербаше. Студирал и дипломовал 1957. року на Филозофским факултету у Беоґрадзе на катедри за анґлийски язик и литературу. Почал робиц як професор анґлийского язика у Ґимназиї Жарко Зренянин у Вербаше. Єден час вон преподавал источасно и у ґимназиї у Руским Керестуре.[1]
Бул то период кед Йовґен Ковач бул анґажовани и як дружтвено-политични роботнїк у рижних дружтвено-политичних орґанизацийох. Бул посланїк у Скупштини Войводини, бул предсидатель Општинскей конференциї ССРНВ у Вербаше, та член ОК СКВ, бул и предсидатель Видавательного совиту НВУ Руске слово[2] и резервни воєни старшина.
За свою дружтвено-политичну роботу на вецей уровньох Йовґен Ковач достал 1983. року Орден заслугох за народ зоз стриберним венцом за хтори бул предложени з боку Союзней конференциї ССРН Югославиї. Тиж достал Златну значку Союзу резервних воєних старшинох Югославиї 1985. року.
После 1989. року Йовґен Ковач ше врацел до просвити, до Штреднєй фаховей школи, дзе робел по пензию 1995. року.
Йовґен Ковач ше 1965. року винчал зоз Радойку нар. Папович, наставнїцу сербского и русийского язика. У малженстве мали двойо дзеци, дзивку Татяну и сина Мирослава.
Пензионерски днї Йовґен Ковач препровадзел уживаюци у своїх унукох и у кнїжкох хтори нєзвичайно любел и хтори каждодньово читал. Особлїво любел историйну и наукову литературу, наукову фантастику и археолоґию.
Йовґен Ковач ше упокоєл 3. новембра 2011. року у Вербаше. Поховани бул на Городским теметове у Вербаше.
Ґалерия
[ушориц | ушор жридло]-
Йовґен Ковач зоз школярами -
Йовґен Ковач за бешеднїцу -
Йовґен Ковач прима дружтвене припознанє
Литература
[ушориц | ушор жридло]- Дюра Латяк, "VI. Важнєйши подїї у дїялносци НВРО Руске слово", Руске слово 1945-1985, НВРО Руске слово, Нови Сад, 1985, б. 151.
- Ирина Папуґа, „3. Образованє Руснацохˮ, Русинска гимназија-Руска ґимназия, ОШ и ґимназия Петро Кузмяк Руски Керестур и Дружво за руски язик, литературу и културу Нови Сад, 2000, б. 107.
- Ирина Папуґа, „Прилог 6.ˮ, Русинска гимназија-Руска ґимназия, ОШ и ґимназия Петро Кузмяк Руски Керестур и Дружво за руски язик, литературу и културу Нови Сад, 2000, б. 199.
Референци
[ушориц | ушор жридло]- ↑ Ирина Папуґа, „Прилог 6.ˮ, Русинска гимназија-Руска ґимназия, ОШ и ґимназия Петро Кузмяк Руски Керестур и Дружво за руски язик, литературу и културу Нови Сад, 2000, б. 199.
- ↑ Дюра Латяк, "VI. Важнєйши подїї у дїялносци НВРО Руске слово", Руске слово 1945-1985, НВРО Руске слово, Нови Сад, 1985, б. 151.