Дюра Тимко
| Дюра Тимко | |
|---|---|
 | |
| Народзени | 28. марца 1889 |
| Умар | 1974 (85) |
| Державянство | австроугорске, югославянске |
| Язик у пракси | сербски, руски, мадярски, нємецки |
| Школа | ґимназия у Винковцох, Заґребе и у Сушаку |
| Универзитет | Медицински факултет, Беч |
| Период твореня | 1924—1953. |
| Жанри | медицина, Червени криж |
| Поховани | |
| Припознаня | Плакета Ленїна |
Дюра Тимко (*28. марец 1889—†1974), познати лїкар у Шидзе, гуманиста и ерудита.
Биоґрафия
[ушориц | ушор жридло]Дюра Тимко народзени у Шидзе 28. марца 1889. року, а одрастал на Церковним шоре, нєшкайшей Змай Йововей улїци, од оца Петра и мацери Єли. У Шидзе закончел и основну школу, после хторей мал жадамє предлужиц школованє. Теди, на початку XX вику, ше нє случовало так часто же млади сцели пойсц далєй до школи а у велїх фамелийох за тото нє було анї условия. Млади Дюра Тимко предложел же би ше часц їх маєтку опредзелєлo за його школованє. Тото предкладанє фамелия потримала, так же першу и другу класу ґимназиї Дюра закончел у Винковцох, а од трецей по шесту класу ше школовал у Велькей Ґимназиї у Заґребе. Кед 1909. року закончел седму и осму класу у Сушаку, вон бул порихтани пойсц на универзитетски науки, так же ше 1909. року уписал на Медицински факултет на Универзитету у Бечу. За даскельо роки здобул знаня з обласцох хирурґиї, стоматолоґиї, фармациї, ґинеколоґиї, офталмолоґиї, гиґиєни, физиятриї, интерней медицини и педиятриї.
Кед почала Перша шветова война 1914. року, Дюра Тимко ше нашол у войни место же би покладал испити з пиятого року на факултету. На фронту Дюра Тимко бул зарабровани и нашол ше у Русиї. Робел там як дохтор, алє по войни ше врацел и предлужел там дзе станул, кед слово о науки. Ходзел на преподаваня и покладал испити на Медицинским факултету у Бечу. Студиї медицини вон удтно приведол ґу концу та и урядово 1924. року Дюра Тимко промововани за дохтора общей пракси. Кед постал дохтор медицини, мушел окончиц праксу, та ище рок робел у шпитальох у Сенти и Велькей Кикинди, а аж вец од Министерства народного здравя у Беоґрадзе достал дошлєбодзенє же може окончовац общу и приватну праксу. Врацел ше назад до родзеного Шиду и робел як дохтор, а Шид достал першого Руснака, дохтора медицини.
Бул дохтор хторого народ полюбел
[ушориц | ушор жридло]Окрем по руски и по сербски, барз добре знал бешедовац и по мадярски. Точнєйше, др Тимко бул полиґлота, окрем спомнутого знал и по нємєцки, французки, анґлийски, по русийски, а могол ше згвариц и на шпанским язику.
Дохтор Дюра Тимко ше оженєл 1929. року зоз Меланию Сивч (нар. 10. новембра 1898) зоз Руского Керестура хтора закончела учительску школу, пришла до Шиду и вецей нє робела як учителька. У малженстве 1930. року достали дзивку Еуґению.
Дохтор Дюра Тимко 1930. року у центре у Шиду збудовал красну хижу и там отворел свою ординацию. Хижа була на єден поверх зоз мансарду, а и дзень нєшка прикрашує центер того городу. Приватну праксу окончовал по Другу шветову войну, а през войну хижа була хаснована як шпиталь. По войни, кед була утаргнута приватна пракса, вон бул поставени за општинского дохтора Здравственей станїци у Шидзе дзе робел по пензионованє 1953. року. Жителw Шиду запаметали же др Тимко бул барз добри дияґностичар. Дохтор Дюра Тимко после пензионованя предлужел лїчиц людзох, а тиж помагал и у Доме здравя по основу гонорарней роботи.
Дохтор Дюра Тимко бул єден зоз сновательох Червеного крижа у Шидзе, писал упутства и тримал курси першей помоци.
Року 1968. достал спомин-диплому и плакету Ленїна за участвованє у Велькей октоберскей социялистичней револуциї. За тедишнї часи вон бул вельки фаховец, гуманиста и ерудита.
Дохтор Дюра Тимко умар 1974. року.
Вонкашнї жридла
[ушориц | ушор жридло]- Вл. Дїтко, Нє щезли памятки на велького фаховца и ерудиту, Руске слово, ruskeslovo.com, 23. фебруар 2025.
- Јосиф Марчок, матичар: Објава, Руски новини за Русинох у Кральовини СХС. Нови Сад, пияток 31. мая 1929. Рок VI. Бок 4.