Дюра Манойла

Дюра Манойла
Дюра Манойла (1921. року)
Народзени	1861
Умар	1927
Державянство	австроугорске, югославянске
Язик творох	руски
Школа	Шпивацко-учительска школа, Унґвар (Ужгород)
Период твореня	—
Жанри	просвита, дзиякованє
Поховани	у Руским Керестуре

Дюра Манойла (*1861—†1927), учитель, дзияк у керестурскей церкви

Биоґрафия

Георгий (Дюра) Манойла ше народзел 1861. року у месце Шаланка (Подкарпатска Рус). Школу за пивцоучителя, теди волану шпивацко-учительску школу, закончел у Унґваре (тераз Ужгород) у Мукачевскей парохиї.

До Руского Керестура (теди Bácz Keresztùr) Дюра Манойла пришол концом ХIХ вику. У керестурскей школи робел цали роботни вик. Попри порядней настави у каждодньовей основней школи вон учел дзеци и у предлужней (повторительней школи), а окреме були замерковани його годзини музичного вихованя. О тим дознаваме зоз записнїкох Наставнїцкей ради Державней основней школи дзе, медзи иншим, зазначене же одходзел на семинари зоз тей обласци. Так стої же априла 1913. року Дюра Манойла бул у Апатинє, а по врацаню зоз того сходу информовал наставнїкох о тим цо там було нове на планє музики за школярох. По шицким судзаци вон мал ширше образованє односно спознанє з тей обласци а тиж и талант за тоту обласц творчосци цо му оможлївело буц и вельорочи дзияк у цекрви.

Учительски колектив  у Руским Керестуре 1912. року. Стоя: Константин Петриґала, Дюра Баконї, Дюра Манойлa, Янко Шандор и Осиф Фа. Шедза: Веруна Гарди, учителька, Ирина Рот родз. Джуня, забавиля, Михаил А. Поливка, управитель, о. Дюра Биндас, катехета и Наталия Джуня, учителька

Дюра Манойла мал вельочислену фамелию. Його супруга Йоана тиж була зоз старого краю. У малженстве мали дзевецеро дзеци. Пецеро були народзени у Шаланки, а штверо у Руским Керестуре, од хторих тройо умарли як мали и вєдно су, зоз учительом и його супругу поховани на керестурским теметове.

Од шесцерих учительових дзецох хтори ше виховалим пецеро були учителє и то Илона, Юлиян, Емил, Ана и Александер. Тиж так и два учительово унуки, Юлиянова дзивка Емилия и Емилова дзивка Клара були учительки.

Дюра Манойла умар 1927. року. Поховани є на теметове у Руским Керестуре.

Литература

• Олена Папуґа, „Манойлова учительска фамелияˮ, Studia ruthenica, чис. 3, зборнїк роботох, Нови Сад 1992-1993, б. 330.
• Янко Рамач, „Державна школа (1899-1918), Учителєˮ, Школа у Руским Керестуре (1753-1918), Грекокатолїцка  парохия св. Петра и Павла, Нови Сад, 1995. б. 119.