Дюра Дудаш (музични редактор)


Дюра Дудаш

Народзени	1. юния 1951
Умар	16. марца 2015 (64)
Державянство	югославянске, сербске
Язик творох	руски
Школа	Штредня музична школа, Нови Сад
Период твореня	1975—2005.
Жанри	музични совитнїк
Поховани	У Руским Керестуре

Дюра Дудаш (*1. юний 1951—†16. марец 2015), длугорочни музични редактор и совитнїк Радио Нового Саду, єден з фундаментаторох фестивала Ружова заградка.

Биоґрафия

Дюра Дудаш родзени 1. юния 1951. року у Руским Керестуре. Оцец Владимир и мац Ирина родз. Винаї. Дюра мал ище двох старших братох, Владимира и Славка.

Основну школу Петро Кузмяк Дюра Дудаш закончел у Руским Керестуре. Паралелно зоз основну школу бул уписани и до праве основаней (1964. року) основней музичней школи ШОМО Кула, оддзелєнє у Руским Керестуре. Учел грац на гармоники, наставнїк му бул Яким Сивч. Оддзелєнє музичней школи було отворене кед Дюра мал вецей роки та нє могол здобуц закончену цалу основну музичну школу, закончел штири класи по законченє основней школи. Медзитим, вон и теди, як школяр основенй школи под руководством Якима Сивча участвовал зоз школским оркестром и школярским хором на смотрох и на локалних манифестацийох у Керестуре.

Штредню музичну школу Исидор Баїч, оддїл теорийни напрям, Дюра Дудаш закончел у Новим Садзе. Источасно, вон бул уключени до тедишнього КУД „Максим Горки”, дзе рок робел‚ грал на гармоники та бул на пробох корепетитор фолклорним ґрупом‚ а познєйше вецей роки бул активни у културно-просвитним живоце.

Дюра Дудаш бул оженєти зоз Любицу родз. Саламун з Нового Саду. У малженстве мали дзивку Елену.

Фахова робота у Радио Новим Садзе

До Радио Нового Саду (РНС) за роботнїка у фонотеки Дюра Дудаш пришол 17. юния 1975. року‚^[1] а познєйше постал музични совитнїк. Як залюбенїк до музики робел барз успишно як музични сотруднїк у РНС за шицки редакциї. Музични фонди Фонотеки Радио Нового Саду барз добре познал а, ґу тому, Дюра Дудаш бул контактна особа, приязни, порихтани помогнуц каждому, познал велї водзаци особи у швеце музики и квалификовано окончовал свою роботу. За потреби Рускей редакциї виберал музику за радио-драми‚ гумористични емисиї, по потреби за рижни проєкти Телевизиї НС‚ за документарни емисиї‚ як и музични, з хторих була позната емисия з тамбуровима оркестрами У Новоме Саду.

Провадзел забавну домашню, иножемну и народну музику и робел на популарних емисийох Суботом са вама‚ потим на габох дакедишнєй Радио Стотки и Радио Скали.

Дюра Дудаш бул єден з порушовачох акциї Ружова заградка, хтора познєйше преросла до Фестивалу, а бул тиж активни и у Фестивалє култури Червена ружа,^[2] насампредз у його фахових комисийох за оценьованє нових композицийох и шпивачох-аматерох.

До пензиї пошол у юлию 2005. року и теди ше з Нового Саду з фамелию врацел до родного Керестура.

Дюра Дудаш умар 16. марца 2015. року^[3] у шпиталю у Сримскей Каменїци, у 64. року живота. Поховани є на теметове у Руским Керестуре.

Литература

Место венца: Дюра Дудаш (1951-2015), Т. Беук, новини Руске слово, 20. марец 2015, б. 11

Вонкашнї вязи

Ґрупа авторох, Музика у Радию, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 100

Референци

↑ Ґрупа авторох, Члени Рускей редакциї од 1949. по 2019.,Гласи и часи, 70 роки Рускей редакциї Радио Нового Саду., Новинарска асоцияция Руснацох - НАР, Нови Сад 2019, б. 142
↑ Ґрупа авторох, Музична комисия, 30 Червни ружи, НИУ Руске слово, Нови Сад, 1991, бок 146, 154
↑ Умар Дюра Дудаш. РНС, Рутенпрес, 17, марец 2015.

[1] Ґрупа авторох, Члени Рускей редакциї од 1949. по 2019.,Гласи и часи, 70 роки Рускей редакциї Радио Нового Саду., Новинарска асоцияция Руснацох - НАР, Нови Сад 2019, б. 142

[2] Ґрупа авторох, Музична комисия, 30 Червни ружи, НИУ Руске слово, Нови Сад, 1991, бок 146, 154

[3] Умар Дюра Дудаш. РНС, Рутенпрес, 17, марец 2015.

[1]

[2]

[3]