Дюра Будински (музични редактор)
| Дюра Будински | |
|---|---|
 | |
| Датум народзеня | 14. фебруар 1961 |
| Датум упокоєня | 20. януар 2025 (64) |
| Державянство | югославянске, сербске |
| Язик творох | руски |
| Школа | Штредня музична школа Исидор Баїч, Нови Сад |
| Универзитет | студиї кларинета, Академия уметносцох, Нови Сад |
| Период твореня | 1988-2024 |
| Жанри | инструменталиста, композитор, аранжер |
| Поховани | на Новим теметове у Новим Садзе |
Дюра Будински (*14. фебруар 1961 - †20. януар 2025), музични редактор у Радио-телевизиї Войводини, мулти-инструменталиста, композитор.
Биоґрафия
[ушориц | ушор жридло]Дюра Будински народзени у Руским Керестуре, 14. фебруара 1961. року. Оцец Дюра и мац Амалия дзив. Белак. Дюра мал и брата Михала.
Фамелия Будински ше 1969. року преселєла зоз Руского Керестура до Ветернику. Дюра Будински закончел основну школу у ОШ Михайло Пупин у Ветернику, и предлужел школованє як кларинетиста у штреднєй музичней школи Исидор Баїч у Новим Садзе. После законченей штреднєй музичней школи, Дюра Будински уписал и закончел студиї кларинета у класи професора мр. Николи Срдичa на Академиї уметносцoх у Новим Садзе, департман за музику.
Уж на початку студийох Дюра Будински мал пар замерковани солистични наступи, наступал як штредньошколєц на Републичним фестивалу музичних школох и Републичним змаганю школярох и студентох музики тедишнєй Югославиї и на велїх змаганьох освойовал перши места.
Под час студийох Дюра Будински почал грац у Народним оркестру КУД Максим Горки у Новим Садзе. У другей часци студийох вон 1988. року почал робиц на месце музичного сотруднїка у РТ Нови Сад. У Радио Новим Садзе Дюра Будински робел вецей як 30 роки.
Дюра Будински ше оженєл зоз Ясну родз. Саламун. У малженстве мали двох синох, Бояна и Владимира.
Уж под час штреднєй музичней школи Дюра Будински почал компоновац за фестивали Червена ружа и, познєйше, за Ружову заградку и у тей дїялносци посцигнул афирмацию цо потвердзела и 1 награда за забавну композицию Вечарши мриї на слова Мирона Канюха 1978. року.
Дюра Будински бул у своїм окруженю познати як винїмкови мулти-инструменталиста, композитор, аранжер и познаватель шицких музичних стилох и напрямох.
Дюра Будински ше упокоєл 20. януара 2025. року.
Поховани є на Новим теметове у Новим Садзе.
Дюра Будински компоновал композициї за тоти фестивали:
[ушориц | ушор жридло]| Червена ружа | ||
|---|---|---|
| У забавним духу | ||
| Рок | Наслов | Автор текста |
| 1978. | Вечарши мриї | Мирон Канюх |
| 1987. | З писню най ци повем | Любка Фалц |
| 1988. | Одлєцим ґу хмари | Амалия Хромиш |
| У народним духу | ||
| 1991. | Цо ме то так пече | Амалия Хромиш |
| 1992. | Писня о тебе | Амалия Хромиш |
| 1993. | Руки розлуки | Михал Роман |
| Ружова заградка | ||
| 1990. | Здогадованє на Дюрдьов | Амалия Хромиш |
| 1990. | Младосци моя | Амалия Хромиш |
| 1991. | Дуга у капкох | Амалия Хромиш |
| 1994 | Вредни руки Руснаково | Теофил Сабадош |
| 2003. | Я тебе нє рада | Амалия Хромиш |
Литература
[ушориц | ушор жридло]- Упокоєл ше Дюра Будински (1961-2025), новини Руске слово, число 5 (4134), 31 януар 2025 бок 23.
Вонкашнї вязи
[ушориц | ушор жридло]- Авторе музики, Червена ружа 1962-2011, Том II, Завод за културу войводянских Руснацох, Нови Сад, 2014., б. 468.
- Упокоєл ше Дюра Будински (1961-2025), РТВ / В. Вуячич, Рутенпрес, 21. януара 2025