Дзияк у грекокатолїцкей церкви

Обход коло церкви за Кирбай. Дзияци: Мефтодий Ґубаш (Дюрдьов), Йовґен Лендєр (Руски Керестур), Велимир Чижмар (Вербас).

Назва дзияк, кантор походзи од латинского слова cantor - шпивач.

Дзияк у штреднїм вику бул церковни службенїк-шпивач хтори руководзел зоз шпивацким хором, напредок шпивал/водзел молитву у Служби Божей. Член дзияцкей школи scholae cantorum значи и звичайно означує орґуляша и хороводителя у католїцкей церкви. У чаше Мартина Лутера (лутерански период), така особа ше наволовала реґент. Часто то бул орґуляш, композитор и парохиялни музичар. Подобне лєбо исте значенє ма дзияк у нємецких Протестанских церквох-хороводитель и руководитель шпивацкей школи.

У грекокатолїцкей церкви под час Служби Божей, значну улогу попри священїка ма и дзияк хтори у грекокатолїцким обряду водитель церковного шпиваня. Церковне шпиванє состойна часц богослуженя у рускей грекокатолїцкей церкви. Мож повесц же то найважнєйша часц, бо од шпиваня завиши краса богослуженя и духовни хасен-наєсток за людску християнску душу.

Церква аж и предвидзує пошвецанє за дзияка цо єден зоз ступньох церковних служительох. У грекокатолїцкей церкви ше вецей нє практикує пошвецованє за шпивачох и читачох у церкви односно дзиякох. Пошвецую ше лєм тоти особи хтори познєйше буду дияконове и потим священїки. През историю дознаваме же кажди священїк першенствено бул пошвецени за дзияка.

У векших владичествох исную и школи за дзиякох. Таки школи були, медзи иншим у Ужгородзе и Львове. После законченей школи доставали званє пивцо-учитель. Слово пивцо значело же мушели знац и шпивац и читац. Найчастейше служба дзияка була повязана зоз службу учителя, та ше тоти школи волали пивцо-учительски школи. Велї млади хлапци одходзели до варошох вишколовац ше до таких школох.

Дзияци хтори ше школовали у Галичини за пивцо-учительох мали свойо новини, волали ше Дзияцки глас друковали ше раз мешачно (як мешачнїк) у Станиславову (нєшка Ивано-франковск) од 1895. по 1914. рок. У Львове ше друковали Дзияцки вистки хтори познєйше меняли назву. То бул тиж мешачнїк а виходзел од 1923. по 1939. рок. На Буковини ше друковал часопис за дзиякох зоз меном Ранок.

Малюнок Валентия Ванковиц (1835), шпиваче-дзияци у Велюнскей катедрали.

Початком 20. вику и вельо познєйше Владичество грекокатолїцкей церкви орґанизовало испити и преверйованє знаня особох хтори жадали буц дзиякове. По историйних податкох мож дознац же 27. 08.1939. року, були орґанизовани испити за дзиякох. Тоти факти доказую же испити и пририхтованя зоз практичну подуку, були озбильни и же будуци дзиякове були такп. професийно порихтани за дзиякованє у церкви. Дзияк бул у церкви почитовани и мал одредзени обовязки, угляд у валалє а тиж и у варошу дзе службовал.

Длуги период ше дзияци учели єден од другого и покладали пред владическу комисию дзияцки испит. После конкурса, з декретом, Владичество их поставяло за дзиякох у одредзней парохиї. Так було до нєдавна у руских грекокатолїцких церквох-парохийох. Нєшка ше у рамикох грекокатолїцекй епархиї на чиїм чолє кир владика Георґий Джуджар, таке пошвецанє нє практикує. Без огляду на нєдостаток дзиякох нєт вецей анї таких испитох за дзиякох, анї урядово поставянє дзиякох з боку Владичества. Проблематику дзияка ше ушорює на уровню парохийох.

Зявюю ше обставини по руских местох (парохиї церквох) таки же пре нєдостаток хлопох-дзиякох, тоту улогу дзияка доставаю и жени хтори маю притоку ґу шпиваню на богослуженьох и хтори познаю цали цек Служби Божей и єй часцох. Таки случай уж постої у Коцуре, Ґосподїнцох, Дюрдьове, Беркасове, Бикичу итд.

Вонкашня вяза

• Fassler M. The office of the cantor in early Western monastic rules: A preliminary investigation // Early Music History 5 (1985), p. 29–51.
• ЛЮБИЦА РОМАН, дзиячка у Бикич Долу - З нагоди 80 рокох єй живота РТВ Руска редакция новинар, Златко Рамач.
• ДУХОВНИ ЖИВОТ КОЦУРСКЕЙ ПАРОХИЇ РТВ Руска редакция автор Мохайло Шовш.
• Цертификат шпивацко-учительскей школи у Ужгородзе 80-90-тих рокох ХIХ вику