Григориянски календар

Григориянски календар або нови календар то найвецей хасновани календар на швеце.^[1]^[2]^[3] Як модификацию юлиянского календарa, перши идейни творец бул напульски дохтор, физичар и астроном Алойзиє Лили, а преглашел го 1582. року папа Григориє XIII, по хторим и достал мено, прейґ папскей грамоти Inter Gravissimas.^[4] Його роки ше читаю од рока родзеня Исуса Христа.

Григориянски календар уведзени понеже просекови рок по юлиянским календаре бул кус длугши у одношеню на тропски рок (период потребни же би ше слунко нашло у истей точки и рочней часци), виволуюци так же ярня ровнодньовица помали идзе назадок у календарским року, як и лунарним календаре, котри ше хасновал за одредзованє датума Велькей Ноци.

Григориянски календар ришел тоти проблеми з вируцованьом одредзеного числа дньох, же би ше календар врацел до синхронизациї зоз рочнима часцами, односно тропским роком, и малим скрацованьом просекового числа дньох у календарским року, з вируцованьом трох юлиянских преступних рокох кажди 400 роки.

История

Спрам идеї напульского дохтора, физичара и астронома Алойзия Лилия (1510—1576), а потим нємецкого астронома Кристофера Клавиюса (1538—1612) котри доробел першобутни Лилийов календар, папа Григориє XIII (1502—1585) 24. фебруара 1582. року обявел реформу до теди иснуюцого, юлиянского календара зоз папску грамоту (повелю) Inter Gravissimas наволану по перших двох словох єй текста.^[5]

Перши бок папскей були *Inter Gravissimas*

Папска була мала шлїдуюци одредби:

Зоз календара ше вихаби 10 днї, так же после штвартку 4. октобра 1582. шлїдзи 15. октобер
Преступни кажди рок дзелїви зоз 4, окрем рокох дзелївих зоз 100 при хторих преступни лєм тоти дзелїви зоз 400
Преступни рок ма єдєн дзень вецей од простого року котри ше кладзе на конєц мешаца фебруара
Велька Ноц ше од тераз будзе раховац по новим правилу, вязаним за нови календар
Перши дзень у року будзе 1. януар

Тот нови календар наволани по папови Григорийови – григориянски. По нїм просекова длужина рока зменшана на 365,2425 днї (365+97/400=365,2425 прето же єст 97 преступни роки на кажди 400), цо дава гришку од 365,2425 – 365,2421890 = 0,00031 дзень ≈ 26 секунди. То значи же ше тота гришка акумулує на 1 дзень за 1/0,00031 ≈ 3225 роки, односно дакус менєй, прето же ше з часом длужина соларного рока зменшує, а гришка звекшує.

Розлика медзи григориянским и юлиянским календаром тота же григориянски ма 97 преступни роки на кажди 400, а юлиянски 100. До григориянского календару уведзене „секуларне правило“ же роки дзелїви зоз 100 (секуларни роки) прости, окрем кед су дзелїви зоз 400, вец су преступни. То значи же роки 1700, 1800, 1900, 2100 итд. преступни по юлиянским, а прости по григориянским календару. Початна розлика медзи юлиянским и григориянским календаром була 10 днї, нєшка розлика 13 днї, а после 2100. звекша ше на 14 днї (цо значи же Крачун по юлиянским календаре теди будзе 8. януара по григориянским календару).

Исновало дакеди и предкладанє британского астронома Джона Хершела жа би ше уведло 4000-рочне правило, по хторим би кажди рок дзелїви зоз 4000 бул прости место преступни, зоз чим би ше просекова длужина тирваня рока зменшала на 365+969/4000=365,24225 днї, цо блїзше тропскому року, алє тото предкладанє нїґда нє прилапене.

З уводзеньом григориянского календара, календарски рок ше приблїжел тропскому року найвецей до теди. Кед папа Григориє 1582. року уведол нови календар, такой го прилапели Италия, Польска, Портуґал и Шпания, а пошвидко и други католїцки жеми. Протестантски жеми прешли на григориянски календар вельо познєйше, а православни аж у 20. вику, з тим же православни церкви нїґда нє прешли на тот календар.

У Кральовстве Сербох,Горватох и Словенцох „нови“ – григориянски календар урядово прилапени зоз Законом о виєдначованю старого и нового календару од 10. януара 1919. року,^[6] цо обявене у першим чишлє „Урядових новинох Кральовства Сербох, Горватох и Словенцох“^[7]. Зоз тим законом одредзене же у цалей держави на дзень 15. януара 1919. року по старим – юлиянским календаре, престава важиц стари календар и же ше зоз дньом 28. януара 1919.^[8] року уводзи рахованє часу по „новим“ календару. Держава прилапела григориянски календар кед нє исновал Собор СПЦ, та так СПЦ остала на старим.^[9]

Под час и после Першей шветовей войни, окрем у Кральовстве СГС, хаснованє юлиянского календара вонка церкви напущели и Болгарска, Греческа, Румуния и Русия. У Турскей ше григориянски календар почал применьовац 1925. року.^[9]

Характеристики

Читанє рокох

Роки ше у християнским календару нєшка читаю од родзеня Исуса Христа. Року 523. папски намеснїк Бонифациє розказал монахови по мену Дионизий Мали, жа би одредзел способ як ше будзе применьовац Александринске правило принєшене на Першим васелєнским саборе у Никеї 325. року, а хторе гвари же ше роки буду читац од родзеня Исуса Христа. Дионизий (погришно) вираховал же Исус родзени 25. децембра 754 роки од снованя Рима, и одредзел же християнска (нова) ера почина 1. януара 754. року, и од кеди почина 1. рок новей ери. Як Дионизий одредзел датум христового родзеня нє познате, алє познате же Исус родзени под час владаня цара Ирода Велького котри умар 750 роки од снованя Рима, цо значи же Дионизий погришел за найменєй 3 роки. Гоч то пошвидко було похопене, таке погришне читанє рокох затримало ше и нєшка.

З оглядом же християнска ера почина од родзеня Исуса Христа, на перши погляд нє лоґичне же вон народзени 25. децембра, а нє 1. януара. То, медзитим, нормалне прето же у Исусов час уж бул одредзени розпорядок мешацох и дньох у мешацох, и було би нєлоґичне премесцац их. Познєйше людзе почали роки пред Исусовим родзеньом наволовац роки пред нову еру, алє понеже нула теди ище нє була позната, 1. рок новей ери шлїдзи такой после 1.року пред нову еру.

Юлиянски календар уведзени 45. п.н.е., алє кед ше у нєшкайши час приповеда о датумох скорей того року, нормалне же би ше юлиянски календар предлужел назадок. То ше наволує пролептични юлиянски календар. У пролептичним юлиянским календару преступни шицки тоти роки пред нову еру котри при дзелєню зоз 4 даваю остаток 1 (пре нєпостоянє 0-того року).

Тиж так иснує и пролептични григориянски календар, котри ше одноши на датуми скорей 1582. року. Же би нє пришло до забунки, григориянски пролептични календар ше ридко хаснує, место нього ше за шицки датуми скорей 04. октобра 1582. хаснує юлиянски, а од 15. октобра 1582. григориянски. Понеже нє шицки жеми прешли на григориянски календар 1582, часто ше даєдни датуми и после того року рахую по юлиянским календару кед го дата жем у тот час ище вше хасновала. Кед ше, на приклад, пове же Октоберска револуция почала 24. октобра 1917. року, то ше одноши на юлиянски календар, док би по григориянским календару то бул 06. новембер 1917.

Нови Рок

Кед Юлиє Цезар уведол юлиянски календар, одредзел 1. януар за початок нового року, место 1. марца, котри ше хасновал до теди. Понеже ше церква оштро процивела преславом Нового року зоз велькима количествами алкоголу, на Тридентским концилу (дзеветнасти екуменски собор Римокатлїцкей церкви у Триденту) 567. року утвердзене же перши януар як початок нового року вжати зоз гришку и же го треба пременїц. У цеку штреднього вику, хасновали ше розлични датуми як початок нового року. Кед ше, на приклад, даяки документ одноши на рок Х, то по нєшкайшим систему може буц:

1. марец X. – 28/29. фебруар X+1 року
1. януар X – 31. децембер X року
1. януар X-1 – 31. децембер X-1 року
25. марец X-1 – 24. марец X. року
25. марец X. – 24. марец X+1 року
Велька собота X. – Вельки пияток X+1 року
25. децембер X-1 – 24. децембер X. року

У Византийским царстве початок року раховал ше од 1. септембра, алє ше роки нє читали од родзеня Исуса Христа, алє од наставаня швета, за цо установели же ше случело 1. септембра 5509. року п.н.е. Од 18. вику векшина державох ше врацела на рахованє початку рока од 1. януара, окрем Италиї и Анґлиї, котри ше на таке рахованє врацели 1750. року. Медзитим, кед у питаню преступни роки, вони ше вше раховали так же ше брал 1. януар за початок рока.

Соларни циклус, златне число и индикция

У юлиянским календаре вяза медзи днями у тижню и датума у року понавя ше у периодох од 7х4=28 роки. У григориянским календару тото же може применїц лєм на периоди до хторих нє уходза роки дзелїви зоз 100. Период од 28 роки наволує ше соларни циклус. Кажди рок у єдним соларним циклусу ма свойо соларне число, котре ше достава по шлїдуюцей єдначини:

Соларне число=(рок + 8)mod 28 +1

Кажди рок ма и свойо златне число. Вяза медзи мешацовима менами и датумом понавя ше у периодзе од 19 роки (19 x 365,24219 ≈ 235 x 29,52052 односно, до 19 тропских рокох иду 235 синодични мешаци), так же кажди рок у тим периодзе ма свойо златне число котре ше достава на шлїдуюци способ:

Златне число = (рок mod 19) + 1

Индикция хаснована у штреднїм вику же би ше означело место рока у 15-рочним циклусу збераня порциї. Уведол ю император Константин Вельки 1. септембра 312. и хасновала ше по 1806. рок. Рахує ше на шлїдуюци способ:

Индикция = (рок + 2) mod 15 + 1

Индикция нє ма нїяке астрономске значенє.

Тоти три числа характеристични за кажди рок и важни су за рижни вираховйованя, а окреме за рахованє датума Велькей Ноци.

Юлиянски период и юлиянски дзень

Юлиянски период и юлиянски дзень нє шму ше мишац зоз юлиянским календаром. Французки науковец Жозеф Жасти Скалиже (1540—1609) жадал направиц нови систем читаня рокох у котрим кажди рок будзе мац свойо число без н.е / п.н.е. И так видумал Юлиянски период наволани по його оцови Жилийови (Юлийови) Сезарови Скалижеови (1484—1558). Скалижеов Юлиянски период почина 1. януара 4713 п.н.е. и тирва 7980 роки после чого ознова почина од 1. Рок 4713 п.н.е. вжати прето же його индикция, соларне и златне число були 1. Шицки три числа ознова буду 1 аж после 15 х 19 х 28= 7980 роки, односно 3268. року н.е.

Астрономи на подобни способ видумали и юлиянски дзень (JD) же би каждому дню у єдним юлиянским периодзе додзелєли єдинствене число. Юлиянски дзень 0 почина на 12. UTC 1. януара 4713. року п.н.е и тирва до поладня 2. януара 4713 року п.н.е. Так, 1 юлия 2003. року н.е. на поладнє почал JD 2452882. Часто ше хасную и децимали, та ше 15:00 UTC 1. юлия 2003. може означиц зоз JD 2 452 882,125.

Же би ше вираховало котрому датуму одвитує дати юлиянски дзень, хаснує ше шлїдуюци алґоритем:

За григориянски календар:

a = JD + 32044

b = (4a + 3) / 146097

c = a – (146097b)/4

За юлиянски календар:

b = 0

c = JD + 32082

Далєй, за обидва календари:

d = (4c + 3) / 1461

e = c – (1461d)/4

m = (5e + 2) / 153

дзень = e – (153m +2 )/5 + 1

мешац = m + 3 – 12 x (m / 10)

рок = 100b + d – 4800 + (m / 10)

Дакеди ше хаснує и модификовани юлиянски дзень (МJD) котри за 2400000,5 менши од юлиянского дня. Зоз тим ше доставаю числа котри менши и лєгчейши за рахованє, и МJD почина на пол ноци, а нє на поладнє. МJD 0 почал 17. новембра 1858. року (по григориянским) на 00:00 UTC.

Юлиянски днї и модификовани юлиянски днї барз хасновити за астрономию, окреме за астронаутику. Окрем юлиянских, исную и лилиянски днї (LD), котри ше читаю од пол ноци 15. октобра 1582. року (=LD 1). Наволани су по уж спомнутому астрономови Алойзийови Лилийови.

Назви мешацох

Нєшка векшина язикох, тиж и сербски, хаснує исти назви мешацох у юлиянским и григориянским календаре, котри походза зоз латинского язика. Єдино даєдни славянски язики (горватски, чески, польски, билоруски и українски) хасную стари славянски назви за мешаци.

Януар (лат. Januarius) достал мено по римскому богови з двома лїцами Янусу
Фебруар (лат. Februarius) достал мено по римским швету Februa
Марец (лат. Martius) наволани по римскиму богови войни Марсу
Април (лат. Aprilis) наволани по греческей богинї Афродити , або по латинскому дїєслову aperire цо значи отвориц (здогадує на яр)
Май (лат. Maius) достал мено по римскей богинї Маї
Юний (лат. Junius) наволани по верховней римскей богинї Юнони
Юлий (лат. Julius) наволани 44. року п.н.е. по Юлийови Цезарови
Авґуст (лат. Augustas) наволани 8. року п.н.е. по императорови Авґустови
Септембер (лат. September) настал од слова septem цо значи седем, прето же бул седми мешац у римским календаре
Октобер (лат. October) – од слова octo – осми
Новембер (лат. November) – од слова novem – дзевец
Децембер (лат. December) – од слова decem – дзешец

Вирски заблуди

Григориянски календар хасную лєм церкви заходного християнства, а присутне и погришне веренє же го хасную и даєдни православни помесни церкви. Шицки автокефални (помесни) церкви (окрем Єрусалимскей, Русийскей, Сербскей, Ґрузийскей и манастира Сятей Гори) предводзени зоз Царгородску патрияршию, хасную новоюлиянски календар (Миланковичов календар), а нє григориянски календар. Мишанє тих двох календарох присутне пре их преклапянє, розлика за єден дзень ше зяви аж 2800. року. Пре тоти заблуди, при означованю вельких християнских шветох (напр. Крачун – 25. децембер), часто ше можу чуц винчованки шицким християнским церквом котри преславяю швето по григориянским календару. Насправди, Католїцка церква и векшина православних автокефалних (помесних) церквох хасную два розлични календари – григориянски и Миланковичов.(14)

Референци

↑ „Introduction to Calendars”. Архивирано из . United States Naval Observatory. Приступљено 15 January 2009.
↑ „Calendars”.01. 04. 2004. Архивирано из оригинала 1. 4. 2004. г. by L. E. Doggett. Section 2.
↑ The international standard for the representation of dates and times, ISO 8601, uses the Gregorian calendar. Section 3.2.1.
↑ „Pope Gregory XIII”. Архивирано из оригинала 25. 01. 2009. г. Приступљено 31. 3. 2013.
↑ Mezzi, E., and Vizza, F., Luigi Lilio Medico Astronomo e Matematico di Cirò, Laruffa Editore, Reggio Calabria, (2010). pp. 14; pp. 52, citing as primary references: Biblioteca Nazionale Centrale die Firenze, Magl. 5.10.5/a, ASV A.A., Arm. I-XVII, 5506, f. 362r.
↑ Државни и верски празници у војсци Кнежевине и Краљевине Србије, Капетан Миљан Милкић, Институт за стратегијска истраживања, Београд, Војноисторијски-гласник бр. 1-2 , фуснота pp. 7, УДК 394.26:355.1(497.11)“1839/1918”; Службене новине број 1 од 12. јануара 1919. године, (093.2)
↑ „Службени гласник: О нама - 1919”. Приступљено 14. 11. 2012.
↑ „Календар: Разлике у датумима између јулијанског и грегоријанског календара, Драго И. Драговић, октобар 2012”, Приступљено 14. 11. 2012.
↑ ^9,0 ^9,1 Радић, Радмила (2007). „Васељенска Патријаршија, СПЦ и црквене реформе између два светска рата”.Срби и Југославија – држава, друштво, политика (PDF). Београд: Институт за новију историју Србије. стр. 71. ISBN 978-86-7005-055-6.

[1] „Introduction to Calendars”. Архивирано из . United States Naval Observatory. Приступљено 15 January 2009.

[2] „Calendars”.01. 04. 2004. Архивирано из оригинала 1. 4. 2004. г. by L. E. Doggett. Section 2.

[3] The international standard for the representation of dates and times, ISO 8601, uses the Gregorian calendar. Section 3.2.1.

[4] „Pope Gregory XIII”. Архивирано из оригинала 25. 01. 2009. г. Приступљено 31. 3. 2013.

[5] Mezzi, E., and Vizza, F., Luigi Lilio Medico Astronomo e Matematico di Cirò, Laruffa Editore, Reggio Calabria, (2010). pp. 14; pp. 52, citing as primary references: Biblioteca Nazionale Centrale die Firenze, Magl. 5.10.5/a, ASV A.A., Arm. I-XVII, 5506, f. 362r.

[6] Државни и верски празници у војсци Кнежевине и Краљевине Србије, Капетан Миљан Милкић, Институт за стратегијска истраживања, Београд, Војноисторијски-гласник бр. 1-2 , фуснота pp. 7, УДК 394.26:355.1(497.11)“1839/1918”; Службене новине број 1 од 12. јануара 1919. године, (093.2)

[7] „Службени гласник: О нама - 1919”. Приступљено 14. 11. 2012.

[8] „Календар: Разлике у датумима између јулијанског и грегоријанског календара, Драго И. Драговић, октобар 2012”, Приступљено 14. 11. 2012.

[:0-9] 9,0 ^9,1 Радић, Радмила (2007). „Васељенска Патријаршија, СПЦ и црквене реформе између два светска рата”.Срби и Југославија – држава, друштво, политика (PDF). Београд: Институт за новију историју Србије. стр. 71. ISBN 978-86-7005-055-6.

[1]

[2]

[3]

[4]

[5]

[6]

[7]

[8]

[9]