Гребень

Гребень 1. (серб. чешаљ, всл. hrebeň, поль. grzebień, праслав. grebenь) зубкасти прибор хтори ше хаснує за чесанє, стилизованє и старанє о власох;

2. анат. виросток на когутовей або куровей глави у фурми гребеня (серб. креста);

3. бот. когутов гребень (серб. петлова креста), квеце чий квиток здабе на когутов гребень, лат. Rhinanthus serotinus Oborny).

Гребенї медзи найстрашима инструментами хтори археолоґи находза, бо найстарши добре зачувани гребень найдзени у Персиї и стари є коло 5000 роки. То нам гутори же гребень з давен-давна бул важни прибор у чловековей цивилизациї.

Датотека:Comb.png

Сучасни гребень

Датотека:Punjabi_Comb.JPG

Пунджаби древени гребень

История

Кед даєдна жена у прадавним чаше обачела же красше випатра кед свойо власи ушори на окремни способ, то вироятно бул початок "чесаня", односно хаснованя "гребеня", хтори у першим чаше представял гоч яку алатку зоз зубками за чесанє власох. На Новей Ґвинеї жию Папуанци, хтори познати по барз кандрастих власох. Вери ше же праве Папуанци видумали гребень же би даяк приведли до шора свойо густи власи. Гребень єдно з найстариших чловекових орудийох. Грбенї направени з косци, древа и рогу пренайдзени коло швайцарских озерох, у бивальнїкох праисторийних людзох. Ище пред вецей тисячи роками у Єгипту ше правело гребенї з абоносовини и слоновей косци. Даєдни з тих гребеньох мож и нєшка видзиц у музейох. Интересантне же випатраю зошицким исто як и даєдни прикраски яки ше нєшка прави.

Примитивни людзе правели гребенї з материялох яки ше им нашли под рук. Так, наприклад, гребенї ше правело з бамбусу у даєдних часцох Азиї, а Полинежанє их правели зоз штреднїх жилкох лїсца кокосовей палми хтори злучовали з влакнами. У даєдних часцох Новей Ґвинеї гребенї ше правело з биволових рогох. Гребеньчок, хтори ше звичайно ноши у кишенки, нє пренаходок сучасного периоду, понеже ше у музейох находза зґодни гребеньчки зоз слоновей косци хтори пренайдзени у розвалянїскох старих римских вароших. У штреднїм вику правенє гребеньох представяло добру нагоду же би уметнїки указали свою схопносц и креативносц, бо их украшовали з барз зложенима цифрами. Так єст гребенї омальовани зоз святителями, гребенї зоз скла у фарбох и злата, як и тоти з латинскима надписами.

Опис

Гребень ма ручку и зубки хтори поставени нормално медзи собу. Гребенї мож правиц зоз вшелїяких материялох, а найчастейши материяли то пластика, метал, памучни материял або древо. Гребенї зоз слоновей косци и коритнявкового панциру ше у прешлосци досц хасновало, алє ше их пре загрожованє животиньох нєшка ридко хаснує.

Гребенї можу мац форму у зависносци од функциї. Фризерски гребенї можу мац узку, закончисцену ручку за роздвойованє власох и густи зубки. Звичайни гребенї маю ридши зубки до половки и менши зубки у другей пловки гребеня.

Щетка за власи векша од гребеня и хаснує ше ю за розчесованє и старанє о власох.

Хаснованє и типи

Гребенї можу служиц за рижни потреби. През историю вони служели же би ше отримовало длуги власи у шоре, як и за декорацию. У Шпаниї єст декоративни гребень пеинета же би ше отримовало реверенду або ризи.

У индустриї ше гребенї хаснує за роздвойованє памучних влакнох од нашеня и других остаткох. У уметносци ше гребень окреме хаснує кед ше сце лєпше манипуловац з фарбу.

Гребенї барз часто хасную инспекторе у криминолоґиї: вони з нїх знїмаю влакна або власи же би ше утвердзело идентитет.

Гребенї мож хасновац и у музики, бо гребень ламелофон. Зубки гребеня маю свой гармонски квалитет, хтори завиши од їх длужини, форми и материялу.

Гиґиєна

Кед ше дава другим свой гребень, може присц до паразитских инфекцийох, бо на гребеню знаю остац ваїчка паразитох або аж и цали паразити. Тиж так, гребень мож хасновац и за одстраньованє ушох з власох.

Ґалерия

File:Egyptian_-_Wooden_Comb_-_Walters_61306.jpg

Єгипетски гребень з 15. вику пред н. е.

File:Etruscan_-_Comb_with_Lions_and_Geometric_Designs_-_Walters_71495.jpg

Етрурски гребень коло 7. вику пред н. е. File:Scythian comb.jpg

Скитски гребень коло 400. року пред н. е.

File:KB_Knochenkamm.jpg

Гребень зоз стародавного Риму

File:Sculptured_Comb_in_Ivory_of_the_Sixteenth_Century_Sauvageot_Collection.png

Гребень зоз слоновей косци зоз 16. вику

Литература

• Словнїк руского народного язика I, А-Н, Нови Сад 2017, б. 282.

• Словнїк защити рошлїнох и животного стредку (сербско-руско-латинско-анґлийски), Нови Сад 2010.

Вонкашнї вязи

• The Origin of Combs. TheOriginOf.com.
• Ashby, S. (2011). An Atlas of Medieval Combs from Northern Europe. Internet Archaeology (30).
• Grzebień kościany. ma.krakow.pl