Граблї

Граблї и грабелки (серб. грабље, грабуље, мадь. gerebje) - Граблї ше правело зоз баґренового и ясенового древа. Пориско за нїх колєсар вирезовал зоз простого ясенового древа, сциснул го до тезґи, та го зоз обручним ножом стругал на округло, зоз гобльом огобльовал и на гладко виробел. Потим пориско розрезал по поли, скривел го и помедзи тоти рожки крижом уложел древко. Кед ше пориско правело зоз баґрену, вец ше го скорей укладаня древка мушело вариц, а древко ше укладало до горуцого пориска. Ясен ше нє мушело вариц, бо ше подал скривиц. Сами граблї були длугоки 6 шухи, а колєсар их прейґа превартал на двацец двох местох, бо мали тельо зуби. Зуби ше кресало зоз баґренового древа, а потим ше кажди зуб, на тим концу дзе мал буц заглобени до грабльох, чоповало. Зоз древеним млатком колєсар позабивал зуби до дзирох у грабльох так же би чопи цесно вошли, а вец ше зуби ище зоз другого боку грабльох, там дзе викукли вонка, клїнковало. Набити зуби колєсар ище поровнал, кед же нє були єднаки длугоки, а потим их кончисцел зоз обручним ножом. Од боку грабльох колєсар до каждого зуба вдерел по єден гвозд, же би зуби нє випадовали. Часто людзе, же би им граблї були туньши, за пориско хасновали чеперки зоз младого древа (чеперки вирастаю кед древко од свойого стебла так рошнє же ше дзелї на два конари). Познєйше ше до грабльох кладло место древених желєзни зуби. Зоз велькима древенима граблями парасти грабали жито на полю хторе позаоставало за одберачками. Грабало ше так же ше граблї цагало за собу, а кед ше у грабльох назберала громадка, дзвигло ше их и предлужело ше цагац далєй.

Грабелки - Колєсар правел и менши древени грабелки за шено або инше. Розлика медзи граблями и грабелками була у тим же грабелки мали вельо менєй зуби, а пориско було длугше. Поступок виробку исти як и на грабльох.

Нєшка ше у заградкарстве и гортикултури хаснує углавним желєзни грабелки.

Литература

Наташа Фа Холошняй, Колєсарске ремесло, Терминолоґия, Дружтво за руски язик, литературу и културу, Studia Ruthenica 19/2014, б. 124-125

Вонкашнї вязи

Grabulja drvena. vebsajt Kupovina na dlanu, kupovinanadlanu.rs

Vile i grablje, Srbija, vebsajt Alatioprema, alatioprema.rs

Гра̏бљице. Викиречник, sr.wiktionary.org/sr-ec