Гиря

Гиря запухнуце на глави од вдереня (серб. чворуга, кврга; од слц. и чес. hrča = запухнуце; ґузловате древо; слц.диял. hira, hiria = запухнуце на глави од вдереня. Судзаци по слц.диял. паралелох hira, hiria, и нашо гиря настало од старшого гирч-; од того кореня виведзене и дїєслово гирчиц ше; значеньова вяза медзи тима двома словами постої: кед ше людзе гарню до громади, вона ше з тим звекшує подобнє як рошнє гиря одн. запухнуце од вдереня.)

Медицинска назва гирї то гематом, цо значи вироснуце спричинєте зоз вдереньом до глави, найчастейше на чолє або цеменю после тупей трауми або контузиї. На тих подручох єст вельо мали кревово судзини такой под скору хтори можу попукац аж и од благого вдереня.

Кед покалїченє на глави нє роздре скору алє очкодує кревово судзини под скору, тото место збелави. Крев цо вичури з очкодованих кревовох судзинох ше збера до тканї около. Зберанє креви у комбинациї зоз запалєньом пре покалїченє направи локализовани оток, односно гирю.

Причини гирї можу буц:

Механїчни покалїченя: Найчастейша причина гирйох вдереня або паданя хтори спричинюю очкодованє тканї.

Уджобнуца инсектох: Реакция на уджобнуце инсекта може спричинїц запухнуце.

Алерґийни реакциї: Алерґийни реакциї можу привесц до запухнуца скори.

Инфекциї: Даєдни инфекциї можу спричинїц запухнуце и формованє гирйох.

Симптоми гирї:

• Видзвигнуце на скори

• Боль на месце запухнуца

• Червенїдло и цепле коло гирї

• Збелавене место (кед причина покалїченє)

Домашнї лїки за гирю

1. Положиц жимни облог

Жимни облог би требал буц перши вибор за гирю и то такой после покалїченя. Жимне зужує кревово судзини и на тот способ огранїчує доток креви на покалїчене подруче, а то зменшує оток. Закруциц два до три коцки ляду до ручнїчка и тримац на покалїченим месце 15-20 минути. Направиц павзу пейц минути пред наношеньом другого паклочка ляду. Нїґда нє класц ляд директно на скору.

2. Ґел зоз арники за ублажованє болю

Арника лїковита рошлїна хтору ше хаснує за ублажованє больох, збелавених местох и запухнуцох хтори спричинєти з покалїченьом як цо то вдеренє на глави. Дїйствує як аналґетик, змирююци боль у тим подручу. Окрем того, указує антиинфламаторни прикмети хтори помагаю у зменшаню запухнуца. Нанєсц ґел з арники на покалїчене подруче, два до три раз на дзень.

3. Есенциялни олєй з лаванди

Есенциялни олєй з лаванди ублажує болї и антиинфламаторни прикмети хтори можу помогнуц у лїченю покалїченьох глави. Часто ше го хаснує и за ублажованє больох у крижох, витхнуцох, регоми, больох у мускулох и ставцох. Помишац капку есенциялного олєю з лаванди з ложичку кокосового олєю и нанєсц на гирю.

4. Рицинусов олєй

У рицинусовим олєю єст вельке количество рицинолеинскей квашнїни хторей ше приписує антиинфламаторни и аналґетски прикмети. Помишац єдну ложичку рицинусового олєю з єдну ложичку меду. Нанєсц тоту змишанїну на запухнуте место, зохабиц най одстої 30 минути, а вец виплокац з лїтну воду. Хасновац тото два раз на дзень.

5. Цибуля

У цибулї єст вельо сумпору и биофлавоноїдни єдинєня кверцетину хтори єй даваю моцни антиинфламаторни прикмети. Прето тот звичайни кухньов состойок може помогнуц у зменшаню отоку хтори спричинєти з покалїченьом глави. Пошекац цибулю, закруциц до ручнїчка и направиц облог. Положиц на запухнуте место 15-20 минути. Умиц третироване подруче з лїтну воду же би ше елиминовало запах цибулї. Хасновац два до три раз на дзень.

Литература

Словнїк руского народного язика I, А – Н, Нови Сад 2017, б. 260.

Вонкашнї вязи