Владимир Шанта (спортиста)
| Владимир Шанта | |
|---|---|
 | |
| Особни информациї | |
| Датум народзеня | 28. мая 1943. року |
| Датум упокоєня | 10. марца 2019 (76) |
| Поховани | у Коцуре |
| Позиция у тиме | Штреднї вязни бавяч |
| Спорт | Фодбал |
| Державянство | югославянске, сербске |
| Сениорска кариєра | |
| Професионална кариєра | 1961-1980. Член репрезентациї Югославиї на Медитеранских бавискох у Измиру 1973. |
| Бавел у тимох | ФК Радник, Вербас ФК Войводина, Нови Сад ФК Червинка ФК Бачка Паланка |
Владимир Шанта, одлични фодбалер хтори бавел у Першей и Другей союзней и у Войводянскей лиґи и фодбалски тренер. Бул другим за угляд и на фодбалским терену и у приватним живоце.
Биоґрафия
[ушориц | ушор жридло]Владимир Шанта ше народзел 28. мая 1943. року у Коцуре. Основну школу закончел у Коцуре та ше уписал до Штреднєй хемийней школи у Вербаше. Фодбал почал активнєйше бавиц кед ходзел до трецей класи тей школи, указал ше як талантовани и добри бавяч та бавел за репрезентацию школи. Теди го хтошка посовитовал же най ше учленї до ФК Радник зоз Вербасу хтори бул теди у Войводянскей лиґи. Бул то початок його 17-рочней фодбалскей кариєри.
За ФК Радник з Вербасу почал бавиц 1961. року и у тим тиме ше затримал два роки. До подростку ФК Войводина у Новим Садзе прешол 1963. року на поволанку Силвестера Такача за хторого го познєйше вязало окремне приятельство. У першей екипи ФК Войводина теди бавели барз добри, квалитетни бавяче та Владимир углавним шедзел на лавочки при резервних бавячох и чекал свою шансу. Вуядин Бошков, тедишнї тренер ФК Войводина, го посовитовал же най ше враци до ФК Радник у Вербаше и там най активно бави а нє най шедзи як резерва у ФК Войводина. Владимир Шанта ше врацел до ФК Радник и єден час успишно бавел першенствени змаганя. На єдним фестивалу фодбалу, кед наступали репрезентациї лиґох, ґу ньому приступел Йоца Йованич, бавяч зоз Червинки и гварел же ФК Червинка пририхтує екипу за Другу лиґу и поволал го до Червинки. Владимир Шанта пошол бавиц за ФК Червинка хтори уж идуцого року вошол до Другей лиґи, а после трох рокох бавел и свойо перши квалификациї за Першу лиґу.
ФК Червинка постал першолиґаш
[ушориц | ушор жридло]ФК Червинка мал теди добру и убавену екипу и бул нєпреривно на позицийох у верху Другей союзней лиґи и здобувал право бавиц квалификациї за Першу лиґу. После двох нєудатних квалификацийох, у сезони 1969/70. ФК Червинка вошол до Першей союзней лиґи. Так Владимир Шанта постал бавяч на уровню найвисшого ранґу фодбалского бависка у тедишнєй Югославиї.
Стадион у Червинки могол прияц 10.000 патрачох. Кед госцовала Червена гвизда з Беоґраду на стадиону були 13.000 патрче. И праве на тим змаганю ФК Червинка указал свойо добре бависко а найлєпши на терену бул Владимир Шанта, бавяч штредку терена, од хторого рушали шицки акциї. После єдней удатней акциї Йованич дал ґол и Червинка победзела з 1:0, а Шанта зоз оцену 8 бул бавяч змаганя и у идеалним тиме кола. ФК Червинка бавел у Першей лиґи лєм єден рок и випаднул до Другей лиґи дзе потим бул нєпреривно у горнєй часци табели.
Владимир Шанта бул, зоз своїм бависком, борбеносцу, зоз спортским справованьом и коректним одношеньом спрам процивнїка, приклад другим на терену.
Владимир Шанта, одлични спортиста, вязни бавяч, од хторого рушали векшина убавених акцийох, бавел у ери кед у тедишнєй Югославиї було надосц одличних бавячох и нє могол дойсц до места у репрезентациї. И попри шицкого, дзекуюци одличним фодбалским партийом у ФК Червинка, Владимирови ше удало бавиц за медитеранску репрезентацию Югославиї и участвовац на Медитеранских бавискох у Измиру 1973. року. У конкуренциї Италиї, Французкей, Шпаниї и других жемох штредожемного окруженя вони освоєли перше место.
У своєй спортскей кариєри Владимир Шанта наступал за штири фодбалски клуби. Перши два роки бавел за ФК Радник з Вербасу, потим рок у ФК Войводина (подросток), 9 роки у Червинки и остатнї два року у Бачкей Паланки. Владимир бул при концу кариєри кед го тедишнї тренер Бачкей Паланки Бора Милутинович поволал же би бавел у його тиме. Праве теди екипа випадла зоз Другей лиґи, бавяче ше розишли, та го Милутинович волал до помоци же би екипа нє випадла и зоз Войводянскей лиґи. У тиме з Бачкей Паланки Владимир Шанта остал два сезони и потим закончел кариєру активного фодбалера.
И попри того же Владимир почал робиц у Нафтаґазу вон нє закончел моцну вязу зоз фодбалом. Опробовал ше як тренер у менших клубох хтори наступали у Подручней лиґи Нови Сад. Тренирал вецей екипи а найвекши успих посцигнул и найдлужей ше затримал як тренер у екипи зоз Буковцу.
Кед пошол до пензиї Владимир Шанта зоз супругу Андю длугши час жил у Новим Садзе. Вец ше вони двойо одлучели врациц до Коцура. Владимир Шанта нє мал своїх потомкох алє свой гумани бок указал кед штверо дзеци свойого покойного брата прилапел як свойо. Дал им шицки условия же би постали людзе а вони го, свойого бачика, почитовали и служел им у живоце як особа за угляд.
Владимир Шанта ше упокоєл 10. марца 2019. року. Поховани є на теметове у Коцуре.
Литература
[ушориц | ушор жридло]- Владимир Медєши, Акцию треба добре здумац, новини Руске слово, Рок LXIV, число 52 (3297), 26. децембер 2008, б. 13.
Вонкашнї вязи
[ушориц | ушор жридло]- Istorija ex yu fudbala, ABECEDARNIK, 3749. ŠANTA VLADIMIR ( Crvenka), Facebook, Avgust 2, 2025.
- З. Станојловић, In memoriam: Владимир Шанта, перјаница фудбалске Црвенке из најславнијих дана, Dnevnik, 11. 03. 2019,