Владимир Тимко
| Владимир Тимко | |
|---|---|
 | |
| Датум народзеня | 1. новембер 1928 |
| Датум упокоєня | 30. новембер 2008 (80) |
| Державянство | югославянске, сербске |
| Школа | Ґимназия, Заґреб, Ужгород, Нови Сад и Вербас |
| Универзитет | Богословски факултет, Заґреб |
| Период твореня | 1959—2008. |
| Жанри | душпастирство, хорске шпиванє, компонованє |
| Поховани | у Вербаше |
Владимир Тимко (*1. новембер 1928— †30. новембер 2008), парох старовербаски, дириґент и композитор.
Биоґрафия
[ушориц | ушор жридло]Владимир Тимко народзени 1. новембра 1928. року у Коцуре. Оцец Янко и мац Мария родз. Шандор. Владимир бул наймладши, мал ище трох братох Ивана Инокентия, Онуфрия и Иринея, як и шестру Фебронию. Шицки штирме були музично образовани и у тей обласци охабели глїбоки шлїд и тирваци вредносци.
У Коцуре Владимир закончел основну школу. Першу класу ґимназиї закончел у Заґребе, дзе бул у Салезиянским интернату, а другу, трецу и штварту у Ужгородзе. Пияту и шесту класу ґимназиї закончел у Новим Садзе, а седму и осму у Вербаше.
Оженєл ше зоз професорку Марию Сакач зоз котру мал три дзивчата – Ирину, Любку и Виру.
Богословски факултет Владимир Тимко закончел у Заґребе, а за священїка го пошвецел владика Гавриїл Букатко 29. новембра 1959. року у Вербаше. Перше место службованя було му у Сошицох (Жумберак), алє там анї нє пошол, бо такой того истого року бул меновани за управителя парохиї у Новим Орахове. Року 1969. превжал управу парохиї Покрова Святей Богородици у Старим Вербаше дзе пошол до старосней пензиї алє и попри того вон бул парох и служел вирним аж по 2008. рок . А ище 12. октобра 1993. року постал член Священїческей ради.
Священїцкому поволаню о. Владимир Тимко бул барз пошвецени алє ше му, коло нього, удавало велї роки занїмац и зоз музику. Так у Новим Орахове водзел женски хор а у Вербаше основал менши хор на инициятиву вирних. Єден час водзел хор у Новим Садзе, як и керестурски хор. Та вец, после тих хорох, вон уложел моци же би 1997. року бул основани и Хор церкви Успения Пресвятей Богородици у Коцуре. З тим вон дал значне доприношенє хорскому шпиваню при Руснацох.
Попри спомнутого треба повесц же ше о. Владимир Тимко успишно опробовал и у компонованю и то як за дзеци так и за старших.[1]
Як парох о. Владимир Тимко уложел вельо труду и усиловносци коло будованя нового парохиялного дому у Старим Вербаше, а за вельорочну священїцку службу апостолски еґзарх кир Георгий Джуджар о. Владимира Тимка 1. октобра 2004. року меновал за хрестоносного протопрезвитера.
О. Владимир Тимко, вєдно зоз братами, припадал ґрупи Руснацох хтори були проукраїнски ориєнтовани.
О. Владимир Тимко умар 30. новембра 2008. року у Вербаше. Поховани є на городским теметове у Вербаше.
| Композициї Владимира Тимка | ||||
|---|---|---|---|---|
| Число | Рок | Наслов композициї | Дзе є виведзена | Автор тексту |
| 1. | 1969. | Винчованка мацери | Червене пупче | Михайло Ковач |
| 2. | 1970. | До кола | „
|
Микола М. Кочиш |
| 3. | 1970. | Май у лєше | „
|
Михайло Ковач |
Литература
[ушориц | ушор жридло]- Микола М. Цап, о. Владимир Тимко (1928-2008), новини Руске слово, Рок LXIV , чис. 49 (3294), Нови Сад, 5. децембер 2008. року, б. 7.
Вонкашнї вязи
[ушориц | ушор жридло]- Владимир Тимко (список композицийох), Червена ружа 1962-2011, Том II, Завод за културу войводянских Руснацох, Нови Сад, 2014, б. 466.
Референци
[ушориц | ушор жридло]- ↑ Владимир Тимко (список композицийох), Червена ружа 1962-2011, Том II, Завод за културу войводянских Руснацох, Нови Сад, 2014, б. 466.