Владимир Рац
| Владимир Рац | |
|---|---|
 | |
| Особни информациї | |
| Назвиско | Зебо |
| Народзени | 1943. |
| Умар | октобра 1996. |
| Поховани | У Новим Садзе |
| Висина | |
| Позиция у тиме | Прави бек |
| Спорт | Фодбал |
| Державянство | югославянске |
| Сениорска кариєра | |
| Рок Тим Ґоли | |
Владимир Рац (*1943-† октобер 1996), фодбалер, тренер.
Биоґрафия
[ушориц | ушор жридло]Владимир Рац народзени 1943. року у Руским Керестуре. Оцец Владо и мац Серафина родз. Гарди. Владимир мал младшу шестру Ксению. Основну школу Владимир Рац закончел у Руским Керестуре а Штредню польопривредну школу у Зомборе.
Владимир Рац ше оженєл зоз Гелену родз. Колбас. У малженстве мали сина Ваню.
Кариєра на фодбалским терену
[ушориц | ушор жридло]Владимир Рац бивал у Руским Керестуре нєдалєко од фодбалского терену ФК Русин. Як хлапец бул на каждим змаганю ФК Русина, одходзел провадзиц тренинґи фодбалерох. У школи бул од дзецинства замерковани як талантовани спортиста, односно фодбалер, лабда го прицаговала и вон єй пошвецовал кажду шлєбодну хвильку.
Як старши пионир Владимир Рац Зебо, так го наволовали приятелє и навияче, почал бавиц у подростку ФК Русин дзе за пар роки, дзекуюци тренерови Владимирови Малацкови Учови, дозрел до квалитетного охранєбного бавяча. До Штреднєй польопривредней школи Владимир Рац пошол до Зомбар и теди, як бавяч Русинового подростку, бавел и за подросток ФК ЖАК. Перспективного Владимира превжал друголиґаш ФК Раднички Зомбор, а накадзи почал бавиц за перши тим Владимир прешол до новосадскей Войводини. Новосадянє го послали на гартованє до ФК Бачка зоз Бачкей Паланки. Рац ше швидко уклопел до тей друголиґашскей екипи и стандардно бавел добре. Медзитим, Рацово фодбалске дозреванє випатра же лєпше провадзели фодбалски менаджере у Македониї як фодбалски фаховци у Новим Садзе. Нєодлуга Владимир Рац, под вигоднима условиями, подписал контракт зоз першолиґашом ФК Вардар зоз Скопя.
За тоту македонску екипу Владимир Рац Зебо бавел велї роки на позициї правого бека и з добрим бависком себе обезпечел вецей предлужованя професионалного контракту. У тим македонским тиме Владимир Рац и закончел фодбалску кариєру. Часто бул на прагу репрезентациї алє ше му нє удало бавиц у тим составе.
По законченю фодбалскей кариєри у Скопю, Владимир Рац ше зоз фамелию врацел до Нового Саду. Бавел фодбал и тренирал бавячох ФК Индекс.
На концу, даскельо мешаци препровадзел и у ФК Русин з Руского Керестура, дзе и почал свою кариєру фодбалера. Бул бавач а, источасно, и тренер тима.
У медзичаше, Владимир Рац ше похорел и умар октобра 1996. року у його 53. року живота. Поховани є у Новим Садзе.
Ґалерия
[ушориц | ушор жридло]-
Владимир Рац Зебо, Владимир Малацко Учо, тренер и Владимир Рамач Рамзес
Литература
[ушориц | ушор жридло]- Владимир Медєши, „Од малючка з фодбаломˮ, Руски календар 1997, НВУ Руске слово, Нови Сад, 1996, б. 164
Вонкашнї вязи
[ушориц | ушор жридло]- Вардарова колекција, Екипата на Вардар пред почетокот на натпреварот со Црвена Звезда (0:2), одигран на 17.04.1968 на Градскиот стадион во Скопје.