Владимир Рамач
| Владимир Рамач | |
|---|---|
| Ту будзе Фотка.jpg | |
| Особни информациї | |
| Назвиско | Рамзес |
| Датум народзеня | 5. марца 1944. |
| Датум упокоєня | 30. мая 2023 (79) |
| Поховани | у Руским Керестуре |
| Позиция у тиме | преднї вязни бавяч |
| Спорт | Фодбал |
| Державянство | югославянске, сербске |
| Период бавеня | 1961-1971. |
Владимир Рамач (*5. марец 1944-†30. май 2023), фодбалер, першотимец ФК Русин з Руского Керестура од 1961-1971.
Биоґрафия
[ушориц | ушор жридло]Владимир Рамач народзени 5. марца 1944. року у Руским Керестуре. Оцец Йоаким Рамач и мац Натала родз. Сивч. Владимиров оцец Йоаким, волани Черчил, бул познати фодбалер ФК Русин. Йоаким, як вояк Народноошлєбодительного войска, погинул 9. марца 1945. року у борбох за ошлєбодзенє жеми, а мали Владимир мал теди лєм 11 мешаци. Треба повесц же оцец Владимировей мацери Натали Йовґен Сивч, познати керестурски комуниста и антифашиста, бул гарештовани 1942. року з боку мадярских власцох и одведзени до Мадярскей одкаль ше нїґда нє врацел. Так Владимира ховала мац Натала з помоцу єй дїда Миколи и баби Ани Сивчових.
Владимир закончел основну школу у Руским Керестуре, штреднє образованє здобул у Зомборе а дипломовал на Висшей машинскей школи у Новим Садзе.
Спортска кариєра
[ушориц | ушор жридло]Владимир Рамач Рамзес, його вельки приятель Владимир Рац Зебо и и ище даскельо добри бавяче керестурского ФК Русин виросли зоз шорох барз талантованого подростку хтори теди водзел учитель Янко Олеяр.
Векшу часц бавячох того талентованого подростоку познєйше превжал тренер Владимир Малацко Учо и составел екипу ФК Русина хтора постала стабилни член Бачкей лиґи (зони). ФК Русин концом 60–их и початком 70–их рокох прешлого вику бавел у 4. ранґу югославянских фодбалских першенствох.
Владимир Рамач за першу екипу Русина почал бавиц у першенстве 1961 року. Бул преднї вязни бавяч, алє и ґолґетер. Владимир 1966. року на 24 першенствених змаганьох посцигнул 27 ґоли.
Фодбалску кариєру у Русину Владимир Рамач Рамзес закончел 1971. року. Бул то час кед почал робиц у подприємстве Автоуниверзал у Новим Садзе. На тим роботним месце робел по пензионованє.
Владимир Рамач ше оженєл зоз Наталию родз. Рац и у малженстве мали синох Златка и Владка.
Владимир Рамач умар 30. мая 2023. року у Новим Садзе. Поховани є 1. юния 2023. року на теметове у Руским Керестуре.
Ґалерия
[ушориц | ушор жридло]-
Владимир Рац Зебо, Владимир Малацко Учо и Владимир Рамач Рамзес
Литература
[ушориц | ушор жридло]Вонкашнї вязи
[ушориц | ушор жридло]- Й. Г, Владимир Рамач (1944-2023), новини Руске слово, число 23 (4048), 9. юний 2023, б. 36.