Владимир Новта

Владимир Новта
Датум народзеня	30. новембра 1930.
Датум упокоєня	4. октобра 2023 (93)
Державянство	югославянске, сербске
Язик творох	руски, сербски
Школа	Штредня технїчна школа, Нови Сад
Универзитет	Машински факултет, Беоґрад
Жанри	машинство, воздухоплївне моделарство
Поховани	у Темерину
Припознаня	Златна плакета за унапредзенє моделарства у Сербиї

Владимир Новта (*30. новембер 1930-†4. октобер 2023), инженєр, репрезентативец у воздухоплївним моделарстве.

Биоґрафия

Владимир Новта Корпащик народзени 30. новембра 1930. року у ремеселнїцкей фамелиї у Руским Керестуре. Оцец Михал и мац Мелана родз. Ерделї. Владимир мал шестру Наталию и брата Янка.

Основну школу зоз малу матуру Владимир Новта закончел у першей ґенерациї керестурскей нїзшей ґимназиї 1945/46. року. Штредню технїчну школу, машинске оддзелєнє, закончел у Новим Садзе 1949. року. По законченей школи, у складзе зоз планским розпорядком кадрох, Владимир пошол робиц до рудокопу олова и цинку Айвалия на Косове. После єдного рока роботи вон пошол на одслуженє воєного року до Школи резервних воєних официрох авио-технїчней служби до Райловцу. Врацел ше на роботу до Нового Саду дзе робел єден рок а потим прешол на роботу до Беоґраду, до Академского аероклуба у його моделарскей секциї, алє позарядово студирал на Природно-математичним факултету на оддзелєню за механїку. У 1954/55. року прешол на Машински факултет дзе уписал студиї на общим машинстве и ту дипломовал 1961. року.

По дипломованю Владимир Новта прешол на роботу до Фабрики 27. марец У Новим Садзе хтора вирабяла клипи зоз часцами за бензински и дизел мотори. Од початку ту робел як самостойни конструктор у оддзелєню конструованя клипних комплетох. Потим єден длугши период бул на длужносци руководителя розвою фабрики и єй продуктох. Пред одходом до пензиї бул руководитель розвою и виходней контроли продуктох тей фабрики.

У януаре 1966. року Владимир Новта ступел до малженства зоз Ану родз. Лукач, висшу медицинску шестру зоз Темерину. У малженстве вони мали два дзивки, двойнята, Ирену и Маґдалену.

Од дзецинства го заврачали авиони

Якуш прицагуюцу моц спрам авионох при Владимирови Новтови пребудзели велї прелєцованя авионох над Руским Керестуром под час Другей шветовей войни. Жаданє же би виглєдовал и освойовал висини го поґурало же би, як 13-14 рочни хлапчик, правел шарканї рижних файтох и пущал их до висинох кед на Лукох за беґельом або на пажици медзи беґельом и Маковским шором, дзе вон жил, дул вигодни витор.

Озбильнєйше почал правиц модели лєтадлох аж кед пошол до Нового Саду 1946. року. Учленєл ше до новосадского аероклубу, у чиїм составе була моделарска школа. Часто ше случовало же Владимир у врацаню зоз школи заходзел до моделарскей роботнї и оставал у нєй длужей вечарами же би закончел даяки часци на моделу.

Под час пребуваня у Беоґрадзе Владимир бул стаємни гонорарни сотруднїк Воздухиплївного института дзе правел радиокомандуюци модели за випитованє. У 1961. року Владимир Новта, як дипломовани инженєр, предлужел моделарску активносц у Новим Садзе. У тим року Воздухоплївни союз Югославиї купел перши три радиокомандуюци апарати и додзелєл их Словениї, Горватскей и Аероклубу Нови Сад у хторим Владимир уж правел таки модели авионох. Дзекуюци тому апарату за радиокомандованє з лєтадлами Владимир Новта на початку 1961. року направел у Войводини перши радиокомандуюци модел РК-1-НС своєй конструкциї зоз хторим истого року участвовал на Державним першенстве радиокомандуюцих моделох у Мостаре. Зоз тим модел Владимир у вецей нагодох, кед пришол до Керестура, демонстровал лєценє на Лукох у присустве векшого числа патрачох.

Перше векше змаганє дзе, як член екипи Аероклуба Нови Сад, участвовал було Покраїнске змаганє у Руми 1949. року а истого року участвовал и на Воздухоплївним злєту тиж у Руми дзе участвовали змагателє зоз цалей Югославиї.

У Новим Садзе Владимир Новта закончел курси за моделарских судийох и технїчних судийох и бул технїчни судия на Европским змаганю у Суботици 1952. року.

У юнию 1953. року отримани аеромитинґ на спортским аеродроме медзи Керестуром и Кулу, дзе участвовал и Владимир Новта зоз своїм вязаним моделом и макету авиона Тройка своєй конструкциї (у анґлийским моделарским часопису AEROMODELLER у юлию 1954. року друковани план Тройки). Владимир участвовал на велїх аеромитинґох и пропаґандних представяньох воздухоплївства по цалей Югославиї. Под час лєтнїх школских одпочивкох вон преподавал на курсох учительом и наставнїком технїчного образованя о моделарстве.

Владимир правел скоро шицки файти моделох як цо то: єдрилици, моторни модели, модели зоз ґумовим мотором, вязаниу модели, модели за екипне обегованє, а и розлични конструкциї як класични так и зоз хвостом на предку наволани Качка и геликоптери.

Найвецей успиху Владимир Новта мал у моделарстве кед бул студент у Беоґрадзе. Теди вон бул вецейраз член державней репрезентациї. Участвовал на вецей як сто моделарских змаганьох у Югославиї и у велїх державох Европи. Спомнєме ту лєм значнєйши змаганя:

♦ Алпина куп було змаганє отримане у Бечу од 22. по 25. октобер 1954. року дзе вон бул першираз у репрезентациї Югославиї. Владимир завжал обидва перши места, у катеґорийох моторних моделох и єдрилицох.

♦ Виборне змаганє у Сараєве од 2. по 4. юний 1955. року у катеґориї екипне обегованє. Завжал перше место и пласовал ше до екипи хтора требала наступиц на першенстве швета у Паризу. Нажаль, Югославия нє участвовала на тим змаганю.

♦ На виборним замганю 1956. року ше пласовал до екипи моделох пендрачох Югославиї хтора требала репрезентовац Югославию на Шветовим першенстве у Мексику 1956. року. Пре нєдостаток финансийних средствох, пре далєку драгу, Югославия нє участвовала на тим змаганю.

♦ Бул член моделарскей екипи Югославиї хтора участвовала на Европским першенстве моделох пендрачох, отриманим у Москви 1957. року.

♦ Бул член екипи Югославиї на Шветовим першенстве моделох у у Анґлиї, хторе отримане у Кренфилду 1958. року. Наступел з моделом пендрача. У тей катеґориї було 70 змагательохм а вон завжал 42. место.

У своєй длугей моделарскей кариєри Владимир Новта достал вельо дипломи и припознаня од союзних, републичних и покраїнских воздухоплївних орґанизацийох, як и од свойого матичного Аероклуба Нови Сад у хторим бул найдлужей член и у хторим почал свою моделарску кариєру. Воздухоплївни союз Сербиї му додзелєл Златну плакету за унапредзенє моделарства у Сербиї. Вон освоєл вецей медалї на змаганьох, здобул шицки моделарски значки А, Б, Ц, стрибере Ц и златне А, хтори ше достава за посцигнути спортски резултати.

Владимир Новта подаровал Основней школи и ґимназиї Петро Кузмяк у Руским Керестуре два модели авионох же би украшовали гол школи.

Владимир Новта роснул у ґенерацийох у хторих було розвиване чувство рускосци, прихильносци ґу своєй националней ґрупи, и вон тото почитовал цалого живота.

У часох пензионерства, кед пожадал видзиц белаве нєбо, Владимир Новта одходзел на аеродром Ченей при Новим Садзе и уживал у лєценю своїх радиокомандуюцих моделох на електромоторни погон.

Владимир Новта ше упокоєл 4. октобра 2023. року (93) у Новим Садзе. Поховани є, по його жаданю, на теметове у Темерину коло його супруги Ани.

Ґалерия

Школяре зоз учительом Йовґеном Планчаком. Владимир цалком на лїво, викукує споза дзвичеца
Владимир Новта на спортским аеродроме на Ченею 1985. року

Литература

Мирон Жирош, Шейсц раз репрезентативец у воздухоплївним моделарстве, Руски християнски календар, НВУ Руске слово, 2010, б. 339.

Мирон Жирош, „Малочислени, а вельки народ (Синтеза)ˮ, Бачванско-сримски Руснаци дома и у швеце 1745-1991, Том II, Грекокатолїцка парохия св. Петра и Павла, Нови Сад, 1998, б.399.

Magazine Aero modeller, "World News", April 1955, p.182.

Вонкашнї вязи

Славица Фейса, У глави конструовал, а у души лєцел. новини Руске слово, рок LXXVII, число 26 (3947), Нови Сад, 25. юний 2021, б. 24.

Мирон Жирош, Мaлочислени, a вельки нaрод. „Визнaчни спортисти, репрезентaтивци, рекордерeˮ, чис. 13, вебсайт Руснаци у Панониї, rdsa.tripod.com