Владимир Горняк

Владимир Горняк
Особни податки
Назвиско	Зезе
Датум народзеня	2. юния 1951.
Датум упокоєня	17. децембра 2025.
Професия	машинбравар, рок-музичар
Музична робота
Активни период	1966—2010.
Жанр	рок музика, руска народна и забавна музика
Инструмент	соло ґитара
Поховани	у Руским Керестуре

Владимир Горняк (*2. юний 1951—†17. децембер 2025), єден зоз замеркованших рок музичарох у Руским Керестуре, соло-ґитариста и снователь даскелїх рок ґрупох.

Биоґрафия

Владимир Горняк Зезе народзени 2. юния 1951. року у Руским Керестуре од оца Йовґена и мацери Гелени народзеней Рамач. Оцец Йовґен бул длугорочни гудак член оркестри Кирданци, наволани Мезеш,та и фамелию волали Мезешово. Владимир им бул єдине дзецко, бо му шестра умарла барз малючка. Основну школу закончел у родзеним валалє, а тророчну штредню Школу школярох у привреди у Кули, за машинбравара. У своїм фаху Владимир цали роботни вик робел у Фабрики арматурох Истра у Кули.

Владимир Горняк ше 1975. року оженєл зоз Марию народзену Ковач и мали двойо дзеци, дзивку Ясминку (1976-2016) и Желька.

У швеце рок музики

Владимир Горняк Зезе од малючка полюбел музику, окремну прихильносц розвил ґу жанру забавней музики, насампредз ґу рок музики хтора у його младосци була на верху популарносци. Себе вше задумовал як соло ґитаристу, ґитару окреме любел як музични иструмент. Його оцец, и сам музичар, видзел же му син талантовани за музику та го одведол ґу искусному музичарови и музичному педаґоґови Владимирови Мученскийови при хторому Владимир звладал перши теорийни музични крочаї.

Владимир Горняк Зезе бул упарти и витирвало зберал искуство у граню, намагал ше грац цо квалитетнєйше. Роками бул подзековни Янкови Горнякови Бициґларови же го научел перши акорди на ґитари и почали грац вєдно, та направели и перши состав. У нїм були Янко Горняк (соло ґитара), Владимир Дудаш Шибер (бас ґитара), Юлин Варґа (грал гармонику и шпивал), на буґнох грал Михал Сеґеди Єва, и теди петнацрочни Владимир Горняк Зезе ритем ґитару. Так настал акустичарски состав Червени божури. То бул 1966. рок.

Року 1967. настала ґрупа Шнїгово хлапци на соло ґитари ше ґу нїм придружел уж искуснєйши Владимир Горняк Зезе.

ВИҐ Саґуаро 25 25 - Дьордє Ковачевич, Владимир Горняк, Янко Ковач, Мижо Микита и Владислав Колошняї, 1969. рок

Концом шейдзешатих и у цеку седемдзешатих рокох двацетого вику, Владимир з товаришами бул снователь перших рок ґрупох у Руским Керестуре. После перших искуствох хтори здобул у Червених божурох и Шнїгових хлапцох, вон бул потим член Канонадох, и снователь ґрупох Саґуаро 25-25 и Ореолох.

Теди, концом 1968. року, случело ше же соло ґитариста Канонадох Яким Медєши Меґре пошол до войска, а место нього поволали Владимира Горняка Зезея. У составе Канонадох теди грали Янко Ковач (бас ґитара), Дьордє Ковачевич Дьока (ритем ґитару), Владимир Венчельовски Бинди шпивал, а Владислав Колошняї Ринґо-младши грал на бубнох.

Кед зоз Канонадох Бинди и Дьока пошли до ЮНА, члени поволали до помоци Михала Микиту, ритем ґитаристу. Грали и провадзели и младих шпивачох забавних композицийох, на першей младежскей програми Ґаудеамус иґитур хтора отримана у Доме кутлтури. Програма барз крашнє прията, та ше з ню наступело и у сушедним Крущичу. Ґрупа Саґуаро 25-25 грала и у теди популарней Желєней загради. Медзитим, на початку 1969. року пар музичаре зоз составу пошли на одслуженє воєного року, медзи нїма бул и Владимир Горняк.

У цеку 1970. року ше спомнути музичаре врацели зоз войска, алє Владимир Венчельовски Бинди нєодлуга пошол на роботу до Нємецкей. Зоз свою упартосцу Владимир Горняк Зезе го „доволал” назад до Керестура же би основали нови состав. Шицко ше добре зложело, Бинди ше врацел и бул шпивач, а у составе були Дьордє Ковачевич Дьока хтори прешол грац на бубнох, Янко Ковач грал на басу, а Зезе на соло-ґитари. Нагварел вон и Верунку Жану Тиркайла же би грала на орґульох.

Ореоли упарто и длуго вежбали кажди дзень. Дзекеди були и по седем-осем годзини вєдно, мали нову, квалитетну, опрему, були искусни и музично дозрети. Теди ше будовало и нови Младежски дом у хторим вони наступели на шветочним отвераню 8. марца 1972. року. У новим амбиєнту, з новима инструментами и богатшим репертоаром, вони одушевели публику та им тот наступ остал як красна памятка.

Бул то час кед ше Ореоли лапели твориц и власни композициї. Векшину текстох, и сербски и по руски, написал им учитель Яни Романча Ґана. Так настали Сенди, Була ши моя, Остатня ноц чий автор бул Дьордє Ковачевич, а Владимир Горняк Зезе викомпоновал и нєшка познату медзи младима и популарну композицию Бабко мала. Зезе познєйше викомпоновал забавни шпиванки Волайме ше любов и Уж преквитаю орґони хтори грал оркестер Идеали а хтори и нєшка дзечнє слухани.

Теди уж порядно вежбали у Младежским доме дзе и наступали. Медзитим, состав ше помали загашел концом 1974. року.

Конєц активней кариєри

Владимир Горняк мал длугоки „гудацки” стаж, найвецей як соло ґитариста. Колеґове го тримали за одличного соло ґитаристу.

После вецей рокох активного граня у рок ґрупох Владимир Горняк Зезе грал почасово у рижних других музично оркестрох - на балох и рижних вешельох зоз Кирданцами, потим з наставнїком Якимом Сивчом, зоз Юлияном Рамачом Чамом. Потим Владимир Горняк грал велї роки и у ВИС Идеали на свадзбох, балох, вешельох. Тиж так Владимир Горняк Зезе часто наступал и зоз музичарами зоз Коцура, Кули, Червинки и Лалитю. Єден час грал и у оркестру Дома култури, зоз хторим руководзел Витомир Бодянєц, на тамбури прим.

Кед престал активно грац, Владимир Горняк витворел ище єден свой гоби, а то видео знїманє зоз власну камеру шицких фестивалох, програмох и концертох цо ше отримовали у валалє, од Червеней ружи по Крачунски концерти и шицко остало зачуване на тедишнїх ношачох, вєдно зоз фотоґрафиями котри тиж з дзеку призначовал.

Владимир Горняк умар 17. децембра 2025. року и поховани є на теметове у Руским Керестуре.

Ґалерия

• 
  ВИҐ Шнїгово хлапци, з лїва: Мирко Венчельовски (бас), Славко Малацко (бубень), Владимир Дудаш (ритем) и Владимир Горняк Зезе (соло ґитара).

Вонкашнї вязи

• М. Афич, Сцели буц лєпши и квалитетнєйши. новини Руске слово, 31. октобер 2017.

• М. Афич, На турнею по дильовох. новини Руске слово, 26. октобер 2017.

• Владимир Горняк, Ин мемориям. новини Руске слово, рок LXXXI, ч. 52 (4181), Нови Сад, 26. децембер б. 28.