Владимир Гербут
| Владимир Гербут | |
|---|---|
 | |
| Особни информациї | |
| Датум народзеня | 18. априла 1949. |
| Датум упокоєня | 21. марца 2026. |
| Поховани | у Руским Керестуре |
| Позиция у тиме | бек |
| Спорт | Рукомет |
| Державянство | югославянске, сербске |
| Сениорска кариєра | |
| Бавел у тих тимох | РК Русин, Руски Керестур РК Гайдук, Кула РК Червинка, Червинка РК Кварнер, Риєка РК Ровинь, Ровинь РК Омладинєц, Коцур |
| Припознаня | Почесни член РК Русин |
Владимир Гербут (*18. април 1949—†21. марец 2026), визначни рукометаш и спортиста хтори зоз своїм талантом и препознатлївим моцним бицом, охабел тирваци шлїд у историї того спорту у Руским Керестуре.
Биоґрафия
[ушориц | ушор жридло]Владимир Гербут народзени 18. априла 1949. року у Руским Керестуре. Оцец Янко и мац Леона родз. Пап (Дюранїнова). Владимир мал шестру Марию. У валалє закончел основну школу.
Владимир Гербут дебитовал 1965. року, на 16 роки, у РК Русин кед ше у Керестуре лєм почал розвивац рукометни спорт. Уж теди бул замерковани як бавяч зоз моцним бицом и вельким потенциялом. Под час служеня воєного року, його талант нє остал нєзамерковани. Нєодлуга го там анґажую тренирац, же би потим место звичайней обуки, векшину часу препровадзовал на пририхтованьох и змаганьом ширцом ядранского приморя, од Славониї по Сплит.
По врацаню зоз войска Владимир предлужел брилїрац у матичним клубе РК Русин, одкадз нєодлуга прешол до кулского Гайдуку, хтори у тот час бул доминантни у Войводянскей лиґи. О його нєвироятним таланту шведочи податок зоз єдного стретнуца кед бавел за Гайдук, на хторим од вкупно 23 ґолох його тиму, вон посцигнул аж 21 ґол. Кратко тренирал и у першолиґашским клубе Червинка, а бавел и у Кварнеру зоз Риєки и у РК Ровиню y истоменовим варошу у Истри. Єден час бранєл и фарби коцурского Омладинца, а бул и на крочай од того же би облєкол репрезентативни дрес дакедишнєй Югославиї.
Штредком 80. рокох врацел ше там одкадз шицко и почало – до свойого родного Керестура и рукометного клубу Русин, дзе єден час и бавел и бул тренер.
Владимир Гербут бавел на позициї бека, роками мал епитет ґолґетера цалей лиґи, а вецейраз бул преглашени за найлєпшого спортисту Керестура.
Остатнє змаганє Владимир одбавел 18. авґуста 1985. року кед и урядово закончел свою рукометну кариєру.
На концу його кариєри, Рукометни клуб Русин преглашел Владимира Гербута за свойого почесного члена.
Владимир Гербут бул оженєти зоз Марию родз. Хованєц. У малженстве мали двох синох, Владимира и Златка.
Владимир Гербут ше упокоєл 21. марца 2026. року, у своїм 76. року. Поховани бул 22. марца на теметове у Руским Керестуре.
Ґалерия
[ушориц | ушор жридло]-
Владимир Гербут (цалком лїво) и керестурски рукометаше 18. авґуста 1985. року. Бул то дзень кед Владимир Гербут одбавел свойо остатнє змаганє и положел точку на свою рукометну кариєру. -
Владимир Гербут, Яким Грубеня Бора и Вили пред початком остатнього змаганя у його кариєри.
Вонкашнї вязи
[ушориц | ушор жридло]- Й. Грубеня, Баковово школяре – шлїдбенїки (II), новини Руске слово, www.ruskeslovo.com, 13. фебруар 2023.
- Ан. Медєши, Умар рукометаш Владимир Гербут (1949–2026), Рутенпрес, www.ruskeslovo.com, 25. марец 2026.