Венямин Бульчик
| Венямин Бульчик | |
|---|---|
 | |
| Датум народзеня | 7. септембра 1946. |
| Датум упокоєня | 2. новембра 2025 (80) |
| Державянство | югославянске |
| Язик творох | руски, сербски |
| Школа | ґимназия Сава Шуманович, Шид |
| Период твореня | 1964-2004. |
| Жанри | новинарство, аматерска ґлума, култура, дружтвена робота |
| Поховани | у Шидзе |
Венямин Бульчик (7. септембер1946–2. новембер 2025), новинар, дружтвено-политични роботнїк, културни дїяч, ґлумец аматер.
Биоґрафия
[ушориц | ушор жридло]Венямин Бульчик ше народзел 7. септембра 1946. року на Руским краю у Шидзе.[1] Оцец Яков и мац Юлка народзена Сеґеди. Венямин мал брата Мирослава. Основну школу, а потим и ґимназию Сава Шуманович Венямин закончел у Шидзе. По законченю штреднєй школи Венямин почал робиц у тарґовинскей фирми Центропромет у Шидзе. Ище у штреднєй школи Венямин Бульчик ше почал аматерски занїмац зоз новинарством як дописователь Сримских новинох, новинох Руске слово и Рускей редакциї Радио Нового Саду, бул сотруднїк у МАК-у. Любов ґу новинарству у нїм змоцнєла и вон прешол на роботу новинара до Радио Шиду. Бул новинар у Сербскей редакциї Радио Шиду и редактор емисиї на руским язику од 1980 по 1987. рок. Бул виберани за секретара ОК ССРНВ у Шидзе дзе робел од 1988. по 1989. рок. З тей длужносци ше ознова врацел до Радио Шиду дзе бул новинар у Сербскей редакциї и редактор емисиї на руским язику у периодзе 1989. по 2004. року, кед пошол до пензиї. Як пензионер Венямин Бульчик бул дописователь за Радио Нови Сад и ТВ Войводину.
Венямин Бульчик бул у малженстве зоз Ану родз. Микловш. У малженстве мали два дзивки, Валентину и Наташу.
Венямин закончел 1976. року єднорочну школу Югославянского института за новинарство у Беоґрадзе.
Дружтвено-политични анґажман
[ушориц | ушор жридло]
З часом Венямин Бульчик постал активни на дружтвно-политичним, спортским и гуманитарним планє. Як млади активиста бул вибрани за секретара ОК ССМ Шид а потим бул и член Покраїнскей конференциї, Републичней конференциї и Союзней конференциї ССМ Югославиї. У ОК СКВ у Шидзе Венямин робел як службенїк и информатор од 1972. по 1978. рок.
Трудзел ше допринєсц унапредзеню условийох живота у месце дзе жил та бул виберани, як волонтер, два мандати за предсидателя Вивершного одбору МЗ Шид. Под час того мандата Венямин Бульчик вельо зробел на витворйованю условийох же би КПД Дюра Киш достало свой будинок за шицки файти активносци хтори були у дружтве запровадзовани.[1]
Венямин Бульчик бул и предсидатель Горяцкого дружтва у Шидзе.
Бульчик бул член и вецейрочни секретар Здруженя за борбу процив диябетесу у Шидзе.
За свою нєсебичну активносц у тих орґанизацийох и здруженьох Венямин Бульчик достал числени дружтвени припознаня и дипломи.
Орґанизатор и дїяч у култури
[ушориц | ушор жридло]Як ґимназиялєц Венямин Бульчик почал писац поетски твори и як плод тей литературней активносци була му 1970. року друкована кнїжка поезиї Заря и цинь.[2]
У фахових критикох заключене же Бульчикова поезия вирастала на традициї поетскей творчосци Михала Ковача. Чувства за чловеково судьбински огранїченя при Бульикови досц заоштрени, язик твардейши, директнєйши а емоциї боляцши. Бульчиково доприношенє рускей литератури то циклус писньох Судьба чловекова така. Живот то цма рика ноци та кед вона и ошвицена - и далєй панує ноц. Живот полни нєправди, зла, спреводзикох, биди, муки, ушорени по началє зла у ту нє мож найсц потїху анї за чловека анї за поету. Директнєйше и сировше, констатує критичар, тоти правди нє виповед анї єден поета у рускей литератури.[3]
Венямин Бульчик бул член КПД Дюра Киш у Шидзе од вчасней младосци. Цалого себе укладал до розвою активносцох того КПД. З часом постал уметнїцки руководитель дружтва. Учитель Янко Саламон порушал активносц на пририхтованю драмских фалатох у рамикох КПД Дюра Киш. До тей уметнїцкей дїялносци вон прицагнул и Венямина Бульчика хтори познєйше одбавел даєдни замерковани ґлумецки витвореня за хтори бул и наградзовани на театралних смотрох.
Шидски театрални аматере посцигли надзвичайни успих зоз двома театралнима фалатами хтори режирал Дюра Папгарагаї. Були то театрални фалати Н.В. Ґоґоля Женїдба и Камень за под главу Милици Новкович. Венямин Бульчик вецейраз ґлумел и у монодрамох прирхтованих у рамикох КПД Дюра Киш.
Бульчик бул и активни член Дружтва за руски язик, литературу и културу з Нового Саду.
Венямин Бульчик ше упокоєл 2. новембра 2025, у 80. року, у шпиталю у Сримскей Митровици. Поховани є на грекокатолїцким теметове у Шидзе.
Вонкашнї вязи
[ушориц | ушор жридло]- Златка Перович, Хто Венямин Бульчик, youtube.com, 20. новемебер 2025.
- Владимир Дїтко, Умар новинар у пензиї Венямин Бульчик (1946–2025), Рутенпрес, 3. новембер 2025.
Референци
[ушориц | ушор жридло]- ↑ 1,0 1,1 Златка Перович, Хто Венямин Бульчик, youtube.com, 20. новемебер 2025.
- ↑ Јулијан Тамаш, "Књижевна дела објављена на русинском језику 1890-1980", Русинска књижевност, историја и статус, Матица српска, 1984. б. 453
- ↑ Јулијан Тамаш, "Вењамин Буљчик" (1946), Русинска књижевност, историја и статус, Матица српска, 1984. б. 322-323.