Вашар

Вашар – (мадь vásár – исте) ♦. периодично одредзен сход тарґовцох и купцох пре тарґовину:

Приклад:

Бул раз єден чловек худобни ... Пойдзе вон раз на вашар;

Приклад:

Рано як поставаю, оцец ше им пита: „Но, цо ше вам шнїло, дзеци? Поведзце ми тераз, та будзем знац чи будземе мац добри вашар чи подли;

♦. прен. розруцани ствари, нєшор:

Приклад:

Яки вашар у хижи!

(од мадь. Vásár; сербске вашар ма шицки три значеня.

Фразеолоґия:

И без (през) єдного циґана вашар будзе - годни зме то покончиц и без тебе;

Мудри (ма розума) як Руснак по вашаре - змудрел (алє уж нєскоро, бо нєдобре потарґовел):

Жидови ше питали, цо би себе найбаржей жичел?

Да мам тельо розуму, як Руснак по вашаре - одповед Жид;

На каждим вашаре би бул (була) - слабого є квалитету:

Наша крава ше слабо дої, на каждим вашаре би була - гвари ше так за слабу дойку;

Прешол вашар, уж по вашаре - препущена нагода за добри заробок и под.:

Могли зме достац аграрней жеми, а тераз уж прешол вашар, прешол час, прешли времена кед ше то могло зробиц;

Указовац вашари: (тота справа, апарат и под.) указує вашари - нїч нє вредзи, лєм за вашар є.

Основни циль вашара бул же би людзе купели нєобходни ствари у чаше док нє було предавальнї у нєшкайшим смислу. Вашар ше отримовало звичайно на даяке церковне швето кед нє дошєбодзене робиц и найчастейше бул на даяким ровним терену – часто у порти найблїзшей церкви або манастира, з чим ше цалей подїї дава одредзену дозу озбильносци и дружтвеней прилапеносци. Вашар нательо важни же шицки векши вашари у Сербиї евидентовани аж и у церковним календаре. Учашнїки заєднїци – валалу, варощику дзе ше отримує вашар ше того дня шветочнє облєкаю. И розположенє шветочне.

Гоч вашар нє специялитет анї руского, анї сербского народу, вашари у другей форми маю и други народи, заш лєм сербски вашар ма и одредзени дружтвени функциї:

• На вашаре треба буц „видзени“;

• На вашаре ше патри хто кому як поздравкал и розпитовал ше за фамелию. На тот способ ше одредзує статус поєдинца у заєднїци;

• На вашаре ше пласує информациї (напр. „предал бим гевту жем, там горе коло поточку...“) и збера информациї („чуєм же ши того року запател вельо пульки...“);

• Дзивки на одай ше прибераю и кладу златни прикраски и дукати коло шиї и преходза ше по вашаре, а обовязно их провадза старши жени - родзини;

• Вашар нагода же би млади малженски пари, першираз, шицким указали свойо дзецко;

• Вашар тиж нагода же би ше млади стретли, упознали и спатрели ше;

• Старши ту же би ше розпитали о гевтей другей фамелиї, яки су, кельо чого маю...

• На вашаре (традиция хтора ше траци) обовязне коло у хторим млади танцую. Коло нагоди же би ше натанцовали, то тиж и нагода видзиц яки хто физично витримовни – порихтани танцовац (та з тим и робиц). Тото ше окреме одношело на дзивки.

• Циль „указованя“ же би ше видзело чи поєдинєц нє ма даяки „скрити хиби“ и чи є прилаплїви за заєднїцу по нєписаних законох заєднїци.

• Ринґишпили, колїмбачки и конїки части на вельких вашарох и тиж маю функцию указованя.

• Окрем того, вашар служи и за:

• Купованє и предаванє статку и других польопривредних продуктох.

• Же би ше у карчми або импровизованей карчми под шатром людзе „препровадзели“. То нагода за даєдних потришиц пенєжи хтори того дня заробели кед предали напр. статок. Кафанска шпивачка, хтора шпива на столє, обовязна.

• Баранчата и прашата ше того дня обрацаю на рожню, а у глїняних гарчкох ше вари свадзебну капусту.

• Ту и тарґовци рижних файтох, а народни облєчива, шерца з медовнїка, батоги за конї, игли и друге цо треба до обосца ше того дня купує.

• То тиж и нагода же би дзеци достали даяке бависко або дацо купче сладке.

Место дзе ше отрумую вашари вола ше вашарище. У Керестуре ше хаснує и як топоним: Вашарище.

Литература

Словнїк руского народного язика I, А – Н, Нови Сад 2017, б. 119.

Вонкашнї вязи

Вашар. Википедија на српском језику, sr.wikipedia.org, 14. фебруар 2006.