Василь Уйфалуши
| Василь Уйфалуши | |
|---|---|
| Фотка.jpg | |
| Народзени | 14. децембра 1910. |
| Умар | 13. юния 1976 (66) |
| Державянство | австроугорске, югославянске |
| Школа | Роботня за декоративне малярске ремесло Павела Ружички, Петроварадин |
| Период твореня | 1935-1976. |
| Жанри | Церковне малярства и фрескопис |
| Поховани | На городским теметове у Новим Садзе |
Василь Уйфалуши (*14. децембер 1910†13. юний 1976), церковни декоративни маляр, уметнїк церковного малярства и фрескопису.
Василь Уйфалуши народзени у Дюрдьове 14. децембра 1910. року. Старе обисце Уйфалушових ше находзело на концу Сербского (Церковного) шора, ґу Девеню, на самим углє крижаня нєшкайших Святосавскей и Костичовей улїцох. У фамилийней историї записане же ше Васильов чукундїдо Михал Уйфалуши преселєл у другей половки ХIХ вику зоз Коцура до Катю, а отамаль до Дюрдьова. Васильов прадїдо бул Дюра Уйфалуши и мал ерґелу коньох у Дюрдьове. Васильов дїдо Петро Уйфалуши достал, як окремну чесц, фамелийне назвиско: Чикош-Петрово.
Васильов оцец Микола и мац Катарина родз. Олеяр мали ище сина Амб(в)розия и три дзивки, Юлу, Веруну и Марю. У фамилийней историї Уйфалушових записана и єдна траґедия: Васильов брат Амброзиє бул у рациї 1942. року заштрелєни и руцени под ляд до Тиси.
Уходзенє до тайнох декоративного малярства
[ушориц | ушор жридло]Василь Уйфалуши ходзел до основней школи у Дюрдьове. Декоративне малярске ремесло Василь учел при єдному од остатнїх школованих новосадских представительох декоративней уметносци, першенствено церковного малярства и фрескопису а то бул Павел Ружичка (1888 – 1973) зоз Петроварадину (найпознатши його мурово малюнки находза ше у шветочней сали новосадскей Городскей хижи у фурми медальонох у хторих декоративно-фрескописно намальовни симболи |ремесельнїцких, польопривредних и тарґовинских социялних пасмох жительства Войводини.
Василь Уйфалуши бул оженєти зоз Левону, дзивоцке Скубан. Мали сина Миколу и дзивку Ксению.
Замерковани шлїди художествених щеточкох Василя Уйфалуша остали у двацецштирох (24), преважно сербских православних церквох насампредз у Банаце (у Избишту, Ульми, Яша Томичу, Сакулами и у Зренянину, як православней, так и у катедралней римокатолїцкей). У Сриме Василь Уйфалуши омальовал православну церкву у Буковцу, а у Бачкей церкви у Сивцу, Змаєву, Качу и православну церкву у Дюрдьове.
Цала фамелия Уйфалушових ше 1960-их рокох прешлого столїтия преселєла до Нового Саду. Од грекокатолїцких руских церквох Васил Уйфалуши декоративно омальовал церкву свойого родного места и свойого кресценя у Дюрдьове 1970. року, а тоту його роботу з чинодїйством пошвецаня обновеного храму пошвецели троме руски владикове Гавриїл Букатка, Йоаким Сеґеди и Йоаким Гербут, на дюрдьовски кирбай 21. септембра 1970. року.
Пейц роки познєйше Василь Уйфалуши декоративно омальовал и новосадску церкву св. первоверховних апостолох Петра и Павла, Церковного руского Общества, чий бул парохиян од свойого преселєня з Дюрдьова до Нового Саду по свою жемну кончину.
Василь бул барз пошвецени своєй роботи
[ушориц | ушор жридло]По шведоченю власного сина Миколи зоз Телепу у Новим Садзе, котри ше тиж учел од власного оца схопносцом декоративней уметносци и учествовал у дзепоєдних малярских декоративних подняцох оца Василя, алє ше до конца нє одважел предлужиц живот тей фамилийней уметнїцкей дїялносци, його оцец бул позарядово роботни и пошвецени свойому дїлу. У жимских периодох, кед малярски роботи одпочивали, оцец рихтал рисунки на превидних паперох и годзинами, сцерпезлїво, дзирковал зоз шидлом шицки контури рисункох вельких розмирох, хтори помагали тому, же ше, кед пукла яр, на пририхтани чисто умити мури кладли тоти дзирковани рисунки и по нїх ше зоз ботошу наполнєту зоз фарбовим пиґментом, чухало, же би на муре оставали контури рисункох по хторих ше вец зоз пиґментну фарбу, помишану зоз цеплим и чечним клийом, мальовало вельки поверхносци мурох у церкви.
Остатня робота уметнїцкого церковного декоративного маляра Василя Уйфалуша бул руски грекокатолїцки св. Храм верховних апостолох Петра и Павла у Новим Садзе. По законченю тей роботи виробени Василь Уйфалуши пошол до краткотирвацей єднорочней пензиї, и у 66. року напущел тужемне пребуванє, хторе ше старал украшиц и озмисловиц зоз свою пошвецену уметнїцку дїялносцу визначного декоративного маляра.
Василь Уйфалуши ше упокоєл 13. юния 1976. року у Новим Садзе, и бул поховани на городским теметове.