Богослужебни кнїжки

Християнска релиґия то кнїжки, богослужебни кнїжки. То, насампредз, значи же християнска вира и релиґиозносц свойо вирски, морални, законски, богослужебни норми дознава зоз Библиї, т.є. зоз 74-ох библийних кнїжочкох. Тота библиотека ше дзелї на Стари и Нови Завит. У Старим Завиту 47 кнїжки, а у Новим Завиту 27.

Кнїжки Старого Завиту настали през длуги час до Христа, и наказую Христа у приходу, а кнїжки Нового Завиту настали у релативно кратким чаше, наказую Исуса хтори уж пришол, оцелотвореного, витвореного.

Церва, як Старозавитна так и Новозавитна Христова, трима же библийни кнїжки надихнути зоз дїйством Духа Святого, цо значи же им прави автор Бог, прето су слово Боже, а лєм технїчни автор одредзени чловек, хтори бул по надихнуцу Божим писатель одредзеней библийней кнїжки.

Библия

Библия основна богослужебна кнїжка, прецо нєт анї єдно богослуженє, чи обще чи поєдинєчне, у хторим нє заступене читанє зоз Библиї.

Библийне Слово, значи, Боже Слово, Боже Писмо, Боже порученє о Христовим спасительним дїйствованю. Прето Библия нєзаменлїва нормативна кнїжка Христовей Церкви, як заєднїци християнох, так и каждого християна окреме. И, окрем того, пре високу авторитативносц, вона основна богослужебна кнїжка.

Библийни тексти, хтори богослужебни особи хасную у богослуженю, позберани до цалосцох под менами:

♦ Евангелия (Нови Завит)

♦ Апостол (Нови Завит)

♦ Паримейнїк (Стари Завит)

♦ Псалтир (Стари Завит).

У Новим Завиту єст 27 кнїжки, 4 Евангелиї и 22 у Апостолу и єдна кнїжка хтора ше у нашим обрядзе нє хаснує, а то Апокалипса.

У Старим Завиту єст 47 кнїжки.

Други кнїжки

Християнске богослуженє витворело и свойо власни богослужебни тексти: молитви, писнї, читаня. Тот обширни богослужебно-кнїжковни материял змесцени у вецей богослужебних кнїжкох, та так, окрем Библиї, єст и тоти хтори служа общому богослуженю, а то шлїдуюци:

♦ Служебнїк

♦ Чиновнїк

♦ Октоих

♦ Минея

♦ Триод

♦ Ирмолоґион

♦ Часослов

♦ Типик

♦ Зборнїк

Друга ґрупа богослужебних кнїжкох то кнїжки зоз хторих ше служи поєдинцом або заинтересованим ґрупом, а то шлїдуюци:

♦ Требнїк

♦ Молебнїк

♦ Акафистнїк

♦ Канонїк

♦ Молитвослов

♦ Молитвенїк

Тоти два ґрупи богослужебних кнїжкох, попри Библиї, творя другу богослужебну библиотеку. Вони нє маю таку вельку улогу як Библия, алє су одличне жридло християнского поучованя и воспитаня: тексти тих кнїжкох толкую и презентую науку яка ше находзи у Святим Писме, односно, жридло су християнскей вири, моралу и закону.

Литература

• Дзвони, християнски часопис, децембер 2003. рок, протоєрей ставрофор о. Йоаким Холошняй