Били кревово заренка

Рушанє леукоцитох у креви

Файти леукоцитох

Били кревово заренка або леукоцити то кревово клїтинки. Їх улога у орґанизме имунолоґийна, односно участвую у охрани од хоротох хтори спричинюю бактериї, паразити, вируси и печарочки. У литри креви здравей одроснутей особи єст од 4 до 11 милиярди били кревово заренка. Спрам форми ядра и мембрани, леукоцити ше дзеля на ґранулоцити (цитоплазма виполнєта зоз мехирками, ядро зложене зоз вецей часцох) и аґранулоцити (цитоплазма гомоґена, ядро округле).

Леукоцити наставаю у шпику, алє ше даєдни файти леукоцитох подполно формую у першовим шлїжнїку, лимфних шлїжнїкох, лимфних ґужлїкох, и у шлїжинки. Найзначнєйши першов шлїжнїк (тимус) хтори ше находзи под першову косцу, прето же є важни за розвой єдней подфайти лимфоцитох, а то Т - лимфоцити . Шицки били кревово заренка наставаю з окремних матичних клїтинкох у шпику хтори ше волаю и хематопоетски матични клїтинки. Зоз тих хематопоетских матичних клїтинкох наставаю и еритроцити и тромбоцити.

Леукоцити ше находза у цалим целу, односно и у креви и у лимфней системи. Шицки били кревово заренка маю ядро и по тим ше розликую од еритроцитох и тромбоцитох.

Подзелєнє леукоцитох

Єст два основни подзелєня леукоцитох:

1. по структури и випатрунку:

а) ґранулоцити – леукоцити зоз мехирками у цитоплазми и зложеним ядром (подфайти тих леукоцитох то: неутрофили, еозинофили и базофили);

б) аґранулоцити - леукоцити зоз гомоґену цитоплазму без мехиркох и єдним цалим ядром (подфайти тих леукоцитох то: лимфоцити, моноцити и микрофаґи хтори задлужени за знїщованє старих клїтинкох и помоц су имуней системи);

2. по системи наставаня и розвиваня заренкох:

— миєлоїдна лоза або система наставаня (леукоцити наставаю у шпику), а то:

а) неутрофили, знїщую бактериї и печарочки,

б) еозинофили, знїщую паразити, зменшую запалєнє,

в) базофили, участвую у алерґийних реакцийох и у знїщованю паразитох,

г) моноцити, задлужени за борбу од инфекциї;

— лимфна лоза або система наставаня (наставаю у шпику, алє ше розвиваю у других орґанох: першовим шлїжнїку, лимфних ґужлїкох и шлїжинки):

а) Т лимфоцити, задлужени за имунитет,

б) Б лимфоцити, задлужени за творенє антицелох,

г) НК клїтинки, задлужени за знїщованє клїтинкох заражених з вирусами и тумором.

Наставанє леукоцитох и збудова

Животни вик леукоцитох розлични, зависно од файти ґу хторей припадаю. Даєдни леукоцити оставаю у шпику док єст потреба за нїма, так же даєдним вик тирваня даскельо годзини, днї або и роки кед су нєактивовани. Велькосц леукоцитох од 7 до 80 μm (микрометери). Тоти заренка маю коло 80% води, вельке количество ґликоґену хтори жридло енерґиї, нуклеопротеїди, хастамин и хепарин. Леукоцити ше рушаю амебоїдно, односно меняю свою форму и хасную фалшиви ножки же би сцигли на место инфекциї або калїченя. Фалшиви ножки леукоцит твори так же дриля нукашню чечносц (цитоплазму) на вонка и так наставаю випупченя, односно ножки зоз хторима ше шмикаю.

Ґранулоцити ше творя у печинки плоду, а при дзецох и здравих одроснутих особох у шпику; лимфоцити ше творя у шлїжинки и лимфних ґужлїкох, а моноцити у шпику.

Число леукоцитох при одроснутей особи од 4 000 до 11 000 по мм³ креви.

Хороти як пошлїдок нєзвичайного числа леукоцитох у креви то:

1. Леукоцитоза (звекшане число леукоцитох пре бактерийни и вирусни инфекциї, физични або ментални стрес, акутни або хронїчни запалєня)

2. Леукопения (зменшане число леукоцитох пре вируси и инфекциї, реакцию на лїки и хемиотерапию, хороту шпику)

3. Леукемия (нєконтролована продукция абнормалних билих кревових заренкох, причина нє утвердзена, але ше предпоставя же хорота пошлїдок мутациї ДНК кревових клїтинкох)