Балет

Балет то театрална форма танцу хтори ше почал розвивац у заходней Европи

у цеку ренесанси (1300-1600. рок). Технїка балету ше состої зоз стилизованих рухох и ставох хтори ше розвили у цеку велїх епохох и викох. Вон точно одредзени гоч дакус и пременлїви, а систем наволани академски балет. (франц. danse d’école). Саме слово балет означує и музичне дїло у хторим ше хаснує технїка танцованя як основни способ виражованя. Таки дїла часто, алє нє вше, провадзени зоз сценоґрафию и костимами.^[1]

Балет представя музично сценске дїло у хторим доминую лєм рухи, алє вше частейше мож видзиц же ше зоз оркестрову музику применює солистичне лєбо и хорске шпиванє (напр. балет Грек Зорба познатого греческого композитора Микиса Теодоракиса).

Файти и форми балету

Балет як цо и други танци, може ше зявиц на сцени як соло лєбо ґрупне виводзенє.^[2] Постоя балети зоз дїю, збуваньом лєбо без нєй, та и музика теди програмска лєбо абсолутна. Танєчнїки дакеди толкую и абсолутну музику програмски. Змист єдного балету (напр. Петрушка Иґора Стравинского) мож поровнац зоз оперу. Дїя ше найчастейше одвива так же приходзи до зменьованя солистичних часцох; дуетох (франц. pas de deux) и ґрупних наступох. Балет ше зявює у опери як епизода, дакеди без даякей повязаносци зоз дїю и збуваньом (як у Травияти Дюзепе Вердия) а дакеди є уткани до збуваня (напр. Баханал у Ваґнеровей опери Танхойзер).

Балет як фундамент танєчного руху

Балет єден зоз найстарших танєчних технїкох цела и отвореного положеня талпи, цо значи же цала нога заротирована зоз клуба спрам вонка за 90 ступнї. Балетска технїка нє позна силу и нагли рухи. Шицки рухи муша буц контроловани и нє шму ше вивесц зоз зацагнутима мишицами, алє лєм нацагнутима до далєка. Елементи хтори ше увежбую то кукнуце хторе може будз вельке и мале, вицагованє и дзвиганє ногох, рухи зоз талпу, рижни зогнуца и ротациї цела, рижнородни файти окруцаня (пируети) и скоки хтори ше можу виводзиц зоз велького и малого кукнуца, з єдну лєбо обидвома ногами и подобне.

Розвой балету

Перши початки сучасного балету зявюю ше у Италиї у 15. вику а штредком 16. вику шири ше и до Французкей. Балет ше найбаржей усовершовал у Французкей а отамаль ше розширел и до других реґионох и державох. На початку розвою танєчни сцени виводзели маскирани танєчнїки, а познєйше ше розвил дворски балет як цалосц танцу, вокалней и инструменталней музики и бешедного тексту.

Зоз снованьом балетских школох, од 1661. року почина история класичного професийного балету у хторим ше инсистує на чисоти рухох и виртуозитету, виражайносци, пантомими и лиричней чувствительносци. То заменєло до теди строго конвенцийни ґеометрийни рухи и нємотивовани цек танєчней дїї. Романтични балет, инспировани зоз сказками и леґендами, интерпретовани зоз класичну балетску технїку, до хторей вше вецей уходза елементи темпераментних народних танцох.

По 1720-их рокох, балет ше розширел и почал приказовац у оперох ширцом Европи. Женске облєчиво, костими постали лєгчейши од чежких дворских костимох, а ципели зоз високима запетками заменєни зоз нїжнима ципелками у хторих ше могло шлєбоднєйше рушац. Подсукня, предходнїца геланкох, постала состойна часц костима, сукнї поставали вше кратши, кулминовали у форми пачки (кратка балетска сукенка зоз твардого тилу, вецейнїсто нациґована). Початок хаснованя шпиц - патикох (балетанки) до балету, хтори давали подпорку ногом и талпом, оможлївели балерином же би ше подзвигли на верх пальцох, а то помогло танєчнїком же би ше створела илузия одупераня ґравитациї.

Сучасни балет

Кажда епоха твори свою уметносц. Так ше и у нашим чаше попри класичного балету, хтори ше и далєй пестує, розвил сучасни балет. Вон вимага шлєбоднєйши рухи цела, хтори можу виражиц велї думки, чувства и страсци нєшкайшого чловека и його живота. На початку 20. вику Серґей Дяґилєв зазберує младих хореоґрафох и музичарох и твори сучасни балет хтори ше намага обєдинїц рухи и музику. Хаснує естетски компоненти класичней балетскей технїки, старих и сучасних народних и дружтвених танцох. Сучасни балетски вираз ма широки одгук: од танєчного еґзибиционизма, прейґ усовершованя класичного академизма по револуцийни балети зоз идеолоґийним змистом.

Званє балетского уметнїка

• Примабалерина асолута - найвисше званє за интерпретаторку класичного балету, додзелєне даскельораз у историї балетскей уметносци.

• Примабалерина (жени) / перши у балету (хлопи) - найквалитетнєйши солисти ґрупи, хтори танцую улоги першей постави.

• Солиста - балетски уметнїк (уметнїца) хтори виводзи перши и други улоги у представох лєбо солистичних часцох.

• Ансамбл (хлопски и женски) - балетски танєчнїки хтори танцую заєднїцки сцени, без поєдинєчних часцох.

Термини у балету

• Хореоґрафия – танєчна уметносц у цалосци хтору виводзи танєчнїк (балерина/балетан) лєбо формация - ґрупа танєчнїкох.

• Дивертисман – концертни програм составени зоз танцох рижнородних по жанру и характеру.

Технїчни методи балетскей настави

Постоя шейсц хасновани, медзународно признати методи за подучованє лєбо студиранє балету. Тоти методи то: французка школа, Ваґанова метода, Цекетийова метода, Бурнонвилова метода, метода Кральовскей академиї танца (анґлийски стил) и Балaнчинова метода (америцки стил).

У предшколским возросту мали дзеци жридло приходох за балетски студия, гоч настава балету ґенерално нє прикладна за мали дзеци.^[3] Початни инструкциї вимагаю сцерпезлївосц, же би ше мирно стало и повага була сконцентрована на вежби за триманє цела а нє на танєц. То дзецом монотоне, спричинює им напруженє. Прето, историйно патраци, велї балетски програми нє примали дзеци-школярох спод 8 рокох до балетских школох. Як алтернатива за почтнїкох ше препоручую предбалетски програми у хторих на практичних годзинох заступени креативни рухи и хтори нє маю вельки вимоги и напруженя.^[4]^[5]

Французка метода

Французка метода то основа каждого обучованя у балету. Кед Луй XIV 1661. року основал Кральовску академию танцу, з тим помагал твореню кодификованя технїки хтору и нєшка хасную тоти цо ше занїмаю зоз тоту професию, без огляду на тото же хтору методу обучованя потримую. Французка школа окреме ревитализована од часу Рудолфа Нуреєва, у цеку 1980-их. Його уплїв ревитализовал и обновел почитованє спрам того стилу и драстично формовал балет у цалосци.^[6] Прето ше нєшка часто французка школа наволує Нуреєв. Французка метода характерує технїчну прецизносц, флуїдносц, ґрациозносц и елеґантни чисти линиї. За тот стил ше часто хаснує швидкосц рухох ногох же би ше охабел упечаток на патрача як виводзаче лєгко и полєтно ,,трепеца, лєца'' на сцени.^[7] Два значни защитни знаки технїки то специфични способ зоз хторим ше виводзи порт де брас и епаулемент, заокруглєнши як кед ше танцує у русийским стилу, алє нє тельо заокружени як дански стил.^[8]

Найпознатши и найвиводзенши балети

Лабудово озеро, Заспана красавица, Ромео и Юлия, Евґениє Онєґин, Дон Кихот, Пепелюґа, Петрушка, Охридска леґенда и вельо други.

Композиторе балету

Петро Илїч Чайковски: Лабудово озеро, Крцко Орещкар, Заспана красавица

Адолф Адам: Жизела

Чезаре Пунї: Есмералда,

Лудвиґ Минкус: Дон Кихот, Баядера

Лео Делиб: Копелия, Силвия

Микис Теодоракис: Грек Зорба

Балет у Сербиї

Стеван Христич: Охридска леґенда

Зоран Мулич: Вични млоди (Вечити младожења), Виберна (Избирачица)

Литература

A Beginner’s Guide to Ballet web.archive.org
Соллертинский, И. Иванович Статьи о балете. — Л.: Музыка, 1973. — 208 c.
Балет. Энциклопедия / Гл. ред. Ю. Н. Григорович; Ред. коллегия: В. В. Ванслов (первый зам. гл. ред.), П. А. Гусев, В. Ф. Кухарский, А. А. Лапаури, О. В. Лепешинская (зам. гл. ред.), А. А. Макаров, И. И. Моравек, Ю. И. Слонимский, Е. Я. Суриц. — М.: Издательство Советская энциклопедия, 1981. — 624 с. — 100 000 экз.
Суриц, Елизавета Яковлевна Балет и танец в Америке. Очерки истории. — Екатеринбург: Издательство Уральского университета, 2004. — 392 с., ил. — 1000 экз. — ISBN 5-7525-1290-5.
Музыка и хореография современного балета. Сборник статей. Выпуск 3 / Общая редакция Петра Андреевича Гусева. — Ленинград : «Музыка». Ленинградское отделение, 1979. — 208 с. — 10 000 прим. (рос.)

Вонкашня вяза

Балет, Музика мој пут до среће muzikamojputdosrece.wordpresscom
Балет као уметност baletkaoumetnost.wordpress.com

Референци

↑ Мишић, Милан, ур. (2005). Енциклопедија Британика. А-Б. Београд: Народна књига : Политика. стр. 99. ISBN 86-331-2075-5.
↑ Wulff, Helena (1998).Ballet Across Borders: Career and Culture in the World of Dancers.Oxford: Berg. ISBN 978-1-85973-998-3.
↑ Kaufman, Sarah L. Kaufman (10. 10. 2019).[„Parents, you're enrolling your little ones in the wrong kind of dance class”.] The Washington Post.
↑ Paskevska, Anna (1997-10-20). Getting started in ballet : a parent's guide to dance education (на язику: анґлийски). Oxford University Press, USA. стр. 30. ISBN 978-0-19-802773-7.
↑ Medova, Marie-Laure (2004).Ballet for Beginners (на језику: енглески). Sterling Publishing Company, Inc. стр. 11. ISBN 978-1-4027-1715-4.
↑ Klapper, Melissa R. (2020). Ballet Class: An American History Oxford University Press. стр. 70. ISBN 9780190908683.
↑ Kassing, Gayle (23. 5. 2014)Discovering Dance Human Kinetics. стр. 150. ISBN 9781492584544.
↑ he Paris Opéra Ballet School Архивирано из оригинала 2017-11-11.

[1] Мишић, Милан, ур. (2005). Енциклопедија Британика. А-Б. Београд: Народна књига : Политика. стр. 99. ISBN 86-331-2075-5.

[2] Wulff, Helena (1998).Ballet Across Borders: Career and Culture in the World of Dancers.Oxford: Berg. ISBN 978-1-85973-998-3.

[3] Kaufman, Sarah L. Kaufman (10. 10. 2019).[„Parents, you're enrolling your little ones in the wrong kind of dance class”.] The Washington Post.

[4] Paskevska, Anna (1997-10-20). Getting started in ballet : a parent's guide to dance education (на язику: анґлийски). Oxford University Press, USA. стр. 30. ISBN 978-0-19-802773-7.

[5] Medova, Marie-Laure (2004).Ballet for Beginners (на језику: енглески). Sterling Publishing Company, Inc. стр. 11. ISBN 978-1-4027-1715-4.

[6] Klapper, Melissa R. (2020). Ballet Class: An American History Oxford University Press. стр. 70. ISBN 9780190908683.

[7] Kassing, Gayle (23. 5. 2014)Discovering Dance Human Kinetics. стр. 150. ISBN 9781492584544.

[8] Paris Opéra Ballet School Архивирано из оригинала 2017-11-11.

[1]

[2]

[3]

[4]

[5]

[6]

[7]

[8]