Бакшиш
Бакшиш (слово превжате з турского язика) найчастейше мале количество пенєжу хтори ше як знак подзековносци або як награду дава дакому за квалитетно окончену услугу.[1] Треба го розликовац од мита, дзе ше звичайно дава векше количество пенєжу, а обчекує ше услугу хтора процивзаконїта. У рижних жемох бакшиш ше дава конобаром, таксистом, ношачом, персоналу по готелох и под. У готелох на югу Европи, бакшиш ше нє дава директно особи, алє ше го зохабя на столє. У велїх културох бакшиш ше подрозумює, алє ше у даєдних азийских готелох трима за увреду.[2] Медзитим, бакшиш призвичаєни у готелох дзе єст иножемних туристох.[3] На Тайвану бакшиш уж ураховани до цени и виноши 10% вредносци.[4] Исте и у Румуниї (у ресторанох и за услуги таксия,[5] а подобне и у Боливиї, дзе ше як пристойне трима 5% цалей цени.[6] У Зєдинєним Кральовстве муштерия може одбиц плациц ураховани бакшиш кед трима же услуга нє одвитуюца.[7] Интересантне же у Квебеку и Онтарию давателє роботи маю право дац менши плаци занятим за хторих ше очекує же буду доставац бакшиш.[8] У Австралиї, бакшиш у казинох ше нє практикує, бо ше го повязує з подплацованьом, цо и реґуловане зоз законом яки важи у Тасманиї.[9]
Правила за даванє
[ушориц | ушор жридло]Понежє єст иншаки правила у рижних културох, фаховци пробовали дац даяки общи правила хтори буду важиц у найвекшим чишлє случайох. У Европи ше препоручує же би бакшиш бул од 5 та по 15% цалей цени, окреме кед ше роби о драгших ресторанох. За такси-услуги тота вредносц коло 10%, а за ношачох у готелох ше як пристойне трима евро по ташки. Єден евро ше дава и за орґанизацию превоженя або резервацию у даяким ресторанє. Медзитим, окремни вимаганя ше наградзує и зоз 15 еврами. Совити ше за обиходзеня у готелох плаци лєм з подзековносцу. У Японє бакшиш увредлїви, алє нє и у Китаю дзе ше очекує голєм 3% цалей цени. Напроцив, китайски таксисти нє очекую бакшиш, алє тоти у Гонґконґу гей. У ЗАД, велькосц бакшишу варирує од места до места. У векших варошох, як цо Нюйорк очековани бакшиш виноши 15% цени, док по менших местох досц дац и дробни. Тиж так, висину бакшишу одредзує и екслузивносц самей услуги. У скромнєйших готелох, бакшиш за ношача виноши долар по ташки, алє у драгших, цена ше руша од 2,5 долари та и вецей, кед ташка чежша. Заключенє фаховцох таке же найчастейше лєпше зохабиц дацо як нїч.[10]
Референци
[ушориц | ушор жридло]- ↑ Вујаклија, М. 1992. Лексикон страних речи и израза. Просвета: Београд. ISBN 978-86-07-00672-4.
- ↑ Политикин забавник број 3002, датум: 21. август 2009. Рубрика: „Јесте ли већ чули да…”, страна 2. Издаје и штампа: Политика АД.
- ↑ A few tips on handling gratuities worldwide
- ↑ Taiwan Government Information Office.„Chapter 20: Tourism”. Taiwan Yearbook 2006.
- ↑ „Tipping Etiquette in Romania Архивирано на сајту Wayback Machine (1. октобар 2008)”
- ↑ DHL„Cultural Tips" Arhivirano на веб-сајту Wayback_Machine (27. септембар 2007).” How to Ship Internationally.
- ↑ restaurant rights: the bill на веб-сајту Архивирано на веб-сајту Wayback Machine (29. август 2008) „if the service has been poor. You are entitled to reduce it by the amount shown to be the service charge.”
- ↑ „Minimum Wage Rates Across Canada.” Manitoba Labour and Immigration.
- ↑ Tasmanian Gaming Control Act 1993
- ↑ Стил-магазин број 137: „Бакшиш није град у Турској!”Архивирано на веб-сајту Wayback Machine (5. март 2016); датум: 10. август 2009.