Андри Лабош
| Андри Лабош | |
|---|---|
| Ту будзе Фотка.jpg | |
| Датум народзеня | 6. новембра 1826. |
| Датум упокоєня | 3. януара 1918 (92) |
| Державянство | угорске |
| Язик творох | руски, горватски |
| Школа | Ґимназия, Осиєк и Заґреб |
| Универзитет | Грекокатолїцка семинария, Заґреб |
| Период твореня | 1850-1912. |
| Жанри | душпастирство, просвита |
| Поховани | у Руским Керестуре |
| Припознаня | Папски орден Pro Ecclesia et Pontifice |
о. Андри Лабош (*6. новембер 1826-†3. януар 1918), парох новосадски и керестурски, дїяч у култури, прихильнїк илирского руху, процивнїк мадяризациї.
Биоґрафия
[ушориц | ушор жридло]Андри Лабош народзени 6. новембра 1826. року у Шидзе. Оцец Андри и мац Ана нар. Росташ. До основней, теди конфесионалней рускей школи, Андри ходзел у Шидзе и у Сримскей Митровици. Перши штири роки ґимназиї закончел у Осиєку, а пияту и шесту класу и студиї богословиї и филозофиї закончел у Грекокатолїцкей семинариї у Заґребе 1851. року.
Андри ше вельо учел и бул всестрано образовани. Знал горватски, українски, латински, нємецки и мадярски язик, прекладал зоз польского и ческого. Таке було окруженє у хторим жил и учел ше и по високих критериюмох ґрупи младих илирцох котра основала здруженє наволане Мале илирске гнїздо.
Попри познаваня язикох, млади илирец зоз Шиду на студийох указал за млади роки високе знанє зоз греческей историї, историї старого Риму, штредньоевропских жемох и Балкану. Кнїжка записнїкох о роботи Малого илирского гнїзда презентує бешеди (беседе) котри по протоколарним шоре, як и шицки члени, отримал на урядових соборох ґрупи и Андри Лабош. Вибрани теми то найлєпше илуструю: О домолюбю, О шлєбоди духа и овладованю зоз самим собу и Поняце шлєбоди поєдинца и дружтва.
Понеже здруженє Мале илирске гнїздо було предплаценe на рочнїк волани Бачка вила з Нового Саду, Андри Лабош найскорей прейґ колеґох зоз Бачкей вироятно сцел обявиц 1844. року у Бачкей вили свойо (и цало го руху, на початку утопийски) думки о заєднїцкей жеми шицких Славянох– Славиї, у поеми Славия. Тота писня ше розликує од писнї Славия хтору подписал автор „беседи” Владимир Хранилович, длугша є, глїбших думкох, естетски звучнєйша а гуманистично возвишенша. Андри Лабош теди мал лєм осемнац роки.
У илирским народним дружтве Андри Лабош, як студент филозофиї и богословиї, бул активни и з даваньом пенєжних прилогох, минималних, алє нє заоставал за другима, а тиж так окончовал и рижни длужносци у руководстве як касир и библиотекар у двох мандатох. Од Руснацох пайташе му були Дионизий Шовш, син коцурского паноца, Янко Санич и Ґабор Ґвожджак, син керестурского паноца, док зоз кругу илирцох Ґабра подполно нє виключели пре отворену потримовку мадярскому уплїву у Горватскей, як и при Руснацох у Бачкей.
За лєгчейше похопйованє припадносци Андрия Лабоша илирскому, славянскому духовному препороду, хтори познєйше зведзени на горватски национални препород, треба визначиц же дружтво студентох и ґимназиялцох Грекокатолїцкей семинариї у Заґребе основане ище 1836. року под назву Илирске народне дружтво патриотскей младежи духовней семинариї заґребскей. Бул то священїцки подросток з народу, котри постал єдна з найважнєйших подпорох у ширеню препородних идейох.
Зоз таким образованьом Андри Лабош ше рушел 1852. року до служби народу и як духовна особа и як културни дїяч. Тримал же за утвердзованє вири барз важне образованє, першенствено писменосц народу, та прето цали живот, коло душпастирскей роботи, як учитель, парохиялни школски инспектор и архидиякон, водзел борбу за отверанє конфесионалних руских школох, школованє священїцкого и учительского подростку и очуванє мацеринского язика у настави, док по мадярских законох (1892. року) шицки школи нє мушели прейсц на наставу по мадярски.
Исте ше случело и у Шидзе, кед ше 1896. року утаргує и остатнє руске оддзелєнє и шицки починаю учиц по горватски.
Андри Лабош отворел руску конфесионалну школу у Новим Садзе, водзел старосц о вибудови школского простору и школи у Руским Керестуре, о обезпечованю квалификованих учительох и їх плацох, алє и о дисциплини у отримованю настави, о вирским воспитаню дзецох, сотрудзовал зоз напреднима учителями и уплївовал на подзвигованє квалитету настави.
Очивисне же о. Андри Лабош, широкого общого образованя, обрацени ґу идейом илиризма, славизма, алє и свидомей борби за националн шлєбоду, културу, братство и добробут нашого народу, у священїцкей длужносци бул пошвецени културни дїяч. Оталь його глїбоке похопйованє улоги мацеринского язика малей националней заєднїци Руснацох у Южней Угорскей, отаргнутей од матки, за чийо обстоянє ше борел як душпастрир и инспектор рускей конфесионалней школи скоро цали свой живот.
Його робота у култури и образованю цекла у даскелїх напрямох и то:
1. Закладал ше у городох и валалох за отверанє руских школох. По Новим Садзе глєдал Руснацох и вимагал од Маґистрату дозволу, та вон и дзияк Петро Поляк отворели першу руску школу 1863. року. У Руским Керестуре, пре звекшанє числа дзецох, нєпреривно глєдал же би ше за школу добудовало учальнї, док ше конєчно нє виборел за вибудов новей школи.
2. Кед у Бачкей после Єднанки заведзена мадярска управа над школами, о. Андри Лабош водзел длугорочну борбу за очуванє рускей школи, намагаюци ше же би Руснаци у Керестуре обезпечели условия за образованє дзецох (квалификовани кадер, учальнї) и же би з тим зопар запровадзованє комуналней школи, цо значело наставу на мадярским язику. Конєчно мушел попущиц 1897. року, а лєм рок скорей престала робиц (утаргнута ище 1892. року) и руска конфесионална школа у Шидзе.
3. Як священїк, Андри Лабош кончел длужносц школского инспектора, а як архидиякон главного инспектора руских школох, закладал ше за намесцанє квалификованих учительох, за їх плаци и квартелї, за порядок у школох и їх угляд.
4. Просвищованє, образованє народу му було обща, водзаца идея у комуникациї з вирнима: препоручовал порядне уписованє дзецох до школи, старал ше о школованю и подзвигованю рускей интелиґенциї, предплати на кнїжки котри почали виходзиц у Старим краю, як и на гевти зоз Москви и Києва, отримовал контакти зоз вирнима и звонка Керестура.
5. Конєчно и сам як родитель дзешецерих дзецох, намагал ше же би ше шицки вишколовали. Його дзеци, троме синове постали духовнїки, по єден учитель и службенїк, правнїк, дзивки закончели дзивоцки школи, а за супруги их вибрали нашо познати священїки и високи службенїки Дю. Биндас, М. Сеґеди, М. Макаї.
Дїялносц на подручу духовносци
[ушориц | ушор жридло]Понеже закончел студиї богословиї и филозофиї у Заґребе, Андри Лабош за священїка пошвецени 7. новембра 1852. року у Руским Керестуре, з благословом крижевского владики Гавриїла Смичикласа. По законченю студийох Андри поставени за дочасного учителя у Керестуре, алє о рок, понеже ше оженєл и пошвецел, премесцени є за пароха до Врлики у Далмациї, дзе обставини у грекокатолїцкей церкви теди були барз чежки у вирским и материялним поглядзе. Ту вон у худобстве, зєдинєни з народом, служел осем роки.
Андри Лабош ше оженєл зоз Ану родз. Сакач. У малженстве мали дзешецеро дзеци.
Зоз Врлики є премесцени до Нового Саду на початку 1860. року на место управителя парохиї, дзе остал пейц роки, по конєц 1864. року.
У городзе о. Андри Лабош упарто глєдал припаднїкох грекокатолїцкей вири котри, розошати на роботи як слугове, наднїчаре и служнїци, ступали уж до мишаних малжествох, аж и на сримским боку у винїцох. Вон пописовал вирних, контактовал з Маґистратом, зберал руски дзеци и отворел конфесионалну школу 1863. року з учительом Петром Поляком. На власне жаданє, шлїдуюци 12 роки препровадзел як капелан у Руским Керестуре, у шицких роботох одменююци хорого колеґу Янка Санича, з котрим студирал. О тих рокох єден з його биоґрафох пише:
- При хорому парохови Саничови як душпастир окончовал роботу сам. Шицки свойо обовязки провадзел барз точно и совисно, так же ше велї його сучаснїки чудовали яки є пильни и пошвецени поволаню нє лєм на богослуженьох и у парохийней канцелариї, алє и у приватним фамелийним живоце. Окреме ше то указало кед у Руским Керестуре 1871. року були вельки вилїви, а 1873. року епидемия колери. Шицких хорих нащивйовал, нє беруци до огляду же ше и сам могол обрац.
Ище раз о. Андри Лабош бул меновани за пароха у Новим Садзе 1876. року. Теди мал чесц буц предшедуюци Духовного стола, припадла му длужносц архидиякона Бачко-сримского деканату. После двох рокох конєчно постал парох керестурски, дзе служел ище по 1912. рок.
Андри Лабош и познєйше остал дошлїдни идейом своєй младосци. Уж як керестурски парох бул подказовани мадярским власцом як антимадяр и панславян. Вон ше бранєл же є нє процив Мадярох, алє заш лєм нє одрекал же му славянство миле и у души. То и конкретно доказовал: кед 80-их рокох ХIХ вику керестурскей конфeсийней школи грожела нєбезпека же ю власци претворя до державней Андри Лабош пробовал, вєдно зоз тедишнїм крижевским владиком Илийом Храниловичом, прешвечиц керестурски Школски одбор же ше нє шме дошлєбодзиц же би ше руска конфесийна школа претворела до державней, з мадярским наставним язиком, бо так започнє мадяризация Руснацох. Медзитим, Школски одбор и валалци го нє слухали, а пошвидко ше и сами могли прешвечиц же парохово предсказованє мадяризациї хтора придзе з державну школу нє було лєм антимадярска пропаґанда.
Року 1902, на Митра, о. Андри Лабош преславел 50-рочнїцу священїцкей длужносци, отримал шветочну литурґию, а сослужовали велї присутни парохове. Тедишнї Папа Лєв XIII послал ювилантови благослов и одликовал о. Андрия Лабоша старшого з орденом „Pro Ecclesia et Pontifice”.
У своєй роботи запровадзовал принцип же руска церква муши помагац меншим ґрупом сонароднїкох розошатим по Бачкей, Сриме и Славониї, у правеню церквох и школох и так унапрямовал народ зоз Керестура и Коцура („народ своєй численшей парохиї одушевйовал за помоц своїм малочисленшим братом”). Високи, збити, велї роки крипкого здравя, о. Андри Лабош пожил 92 роки. Поцагнул ше зоз служби 1912. року, а 3. януара 1918. року ше упокоєл. Поховани є у Руским Керестуре.
З тестаментом Андри Лабош зохабел 2.000 коруни худобним у Керестуре, 6.000 коруни Священїцкому дружтву св. Йосафата, а пенєжни прилог дал и Парохиї свойого родного места, Шиду.
Литература
[ушориц | ушор жридло]- Тамаш, др Юлиян, „Андрий Лабош (1826-1918)ˮ, Руски Керестур, лїтопис и история (1745-1991), Месна заєднїца Руски Керестур, 1992, боки 395, 410, 412 .
- Мирон Жирош, „Руска школа и чуванє руского националного идентитетаˮ, Бачванско-сримски Руснаци дома и у швеце 1745-1991, Том I I, Грекокатолїцка парохия св. Петра и Павла, Нови Сад, 1998, б. 146.
- Леона Лабош Гайдук, "О фамелийним конаре о. Андрия Лабоша ст.", Цеплота дїлох, перли словох, Видаватель Дружтво за руски язик, литературу и културу, Нови Сад-Шид, 2015, б. 20.
- Леона Лабош Гайдук, "Живот и робота Андрия Лабоша старшого", Цеплота дїлох, перли словох, Видаватель Дружтво за руски язик, литературу и културу, Нови Сад-Шид, 2015, б. 26.
Вонкашнї вязи
[ушориц | ушор жридло]- Мирон Жирош, „Нaродни предняци, дружтвени дїячe, нaукови роботнїки, новинaрe, публицистиˮ, Мaлочислени, a вельки нaрод, вебсайт Руснаци у Панониї, rdsa.tripod.com
- Мирон Жирош, Руска школа и чуванє руского националного идентитета, вебсайт Руснаци у Панониї, rdsa.tripod.com.