Анафора

Приношенє дарох у цеку Служби Божей

Анафора (греч. αναφορα, лат. anafora, воздзвигованє, дзвиганє, подзвигованє) то централна часц литурґиї (Служби Божей) у православних церквох хтора одвитує канону (правилом) Евхаристиї.

Зоз тим термином ше означую три поняца:

1. Главна евхаристийна молитва у Литурґиї св. Василия Велького и св. Йована Златоустого. Молитва ма велї часци: Уводну з подзекованьом, анамнезу (спомин на шмерц и воскресенє Исуса Христа), епиклезу (поволанє, апел на висшу инстанцию, заволанє Духа Святого после вигваряня Исусових словох у Служби Божей, з хторима ше хлєб претваря до цела а вино до креви Исусовей).

2. Остатки и часточки жертвеного хлєба хтори ше дзеля по законченю литурґиї людзом у церкви.

3. Даґдзе ше так вола и найвекша плахитка/салвета з хтору ше закрива чаша и дискос (округли, метални, часто стриберни и позлацени танєрчок, даєдни дискоси маю и подставку, тип танєрчка зоз ножку) на прискомидикону и на пристолу.

Церква св.г Покрова, Диселдорф

У грекокатолїцким обряду священїк тоту молитву, заволаня окончує поцихи после анамнези на церковнославянским язику.

Анафора ше состої зоз ґрупи молитвох благодарносци, пошвеценє и доволованє, хтори провадзени зоз символичнима рухами и поступками, под час хторих ше верши претварянє-претворба (μεταβολη) святих дарох (τα δορα) до Святих Тайнох (τα αγια).

Анафора ше розвила зоз єврейского обрядного благодаря под час пасхалней вечери, теди кед отримана и перша християнска Литурґия - на Тайней Вечери.

Литература

• oт. др. Роман Миз, Церковни Литурґийно-литурґични лексикон

Вонкашня вяза

• Евхаристия. Объяснение Литургии. Анафора. portal.slovo.ru

• Рубан Ю. И. Анафора, Об анафорах византийского обряда в православном богослужении на сайту "Азбука виры"